Read Mongondow IBRANI 9 Bible Online

IBRANI 9 - Mongondow bible

IBRANI 9

¹Dodandian inta muna oyúonbí in atorang pooibada bo oyúon doman in tampat pooibadaan inta pinomia in intau.

²Kon ḷoḷaigan tatua in inaidan domandon in tobatú yuang inta sinangoian “Yuang Motusi.” Kon tua oyúon in tampat pototuduan kon togá, bo oyúon doman meja bo roti inta pinosumba kon i Allah.

³Kon dotá in bonunea, inta kon tumimai in gorden induanea, oyúon in yuang inta sinangoian “Yuang Totok Motusi.”

⁴Kon bonu in yuang tatua oyúon in tobatú meja pototubáan kon sosumba, meja inta pinomia nongkon buḷawan. Oyúon doman in poti Dodandian inta komintan inoḻitan in buḷawan. Kon bonu in poti tatua oyúon in kuyon buḷawan inta binonuan in manna, tungkud i Harun inta ain nomoḻimping, bo batu doyowa inta pinomaisan kon parenta i Allah inta mopuḷú.

⁵Kon tudu in poti tatua oyúon in kerub doyowa, tuata in mahaḷuk kokoḻikipan inta nobaḻí lambang koangoian i Allah. Koḻikip in mahaḷuk doyowa tatua noibuká mako kon tudu in taḷob in poti tatua, tobatú tampat pongongampungan kon dosa. Táe tua mita in diá koinsilangan batu-batúon tanaa mako.

⁶Natuata, sinompia komintan intua. Pomuḷoi in singgai imang mita tumuot kon bonu in ḷoḷaigan tatua kon tampat inta kon muna totok, bo mopobayá in oaidan monia kon tua.

⁷Bo inta motaau tumuot kon yuang inta totok in moako tua in tongábí imang inta totok moḷoben. Sia in tumuot mogaid kon oaidannea, komintan in totaong. Sia in tumuot kon tampat tatua takin kodia-dia in dugú inta posumba kon i Allah saḷaku sosumba inta potobutnea kon dosanea tontaní bo dosa mita in umat i Allah inta diá sinuod pinomia.

⁸Roho i Allah nopoontongdon kino tarang pinongin atorang tatua, kon solama ḷoḷaigan dotá in muna moisindogpa mako, yo daḷan tumuot kon bonu in yuang inta totok in motusi tatua in diápa nobukat.

⁹Naa nobaḻí lambang kon sempo in tanaa; mangaḻenea kon sosumba mita bo kuruban mita mahaḷuk inta pinosumba kon i Allah, diábí mokosompurna kon gina intau inta nodia kon sosumba.

¹⁰Sin upacara mita tatua in tongábí soaḷ kokaanon bo oinumon bo noyagi-yagimaidon upacara pondaritan. Bayongan intua tongábí atorang mita in intau inta pakéon modapot wakutunea ki Allah monoimbagu kon dunia naa.

¹¹Táe ki Kristus ain namangoi saḷaku Imang Moḷoben nongkon soaḷ mita mopia inta aindon oyúon.[7] Sia in sinumuotdon bo ain nopobayá in oaidan-Nea saḷaku Imang Moḷoben kon bonu in ḷoḷaigan moḷoben bo inta totok in nosompurna. Ḷoḷaigan tatua in deemanbí pinomia in intau; mangaḻenea in deemanbí nongkon dunia inta tongá doman pinomia naa.

¹²Ki Kristus in sinumuot kon Yuang Totok in Motusi kon ḷoḷaigan tatua tongábí komintan, diá bidon mopobui-buimai. Dodai intua Sia in diábí nodia kon dugú in bembé koḷakian andeka dugú adí in sapi sin posumba, táe dugú-Neabí tontaní in dinia-Nea. Bo dugú-Neabí tatua in nopobebas kon i naton dapot in kopaḷutannea.

¹³Dugú in bembé bo dugú in sapi koḷakian takin ḷobud in kuruban ki adí in sapi, pinaké nondarit kon intau mita inta nokotor podudui atorang in agama sinbá mobaḻí modarit in mosia.

¹⁴Dá aka dugú bo ḷobud mokodarit kon onu inta nokotor kon intau mita tatua, yo bambíkabí dugú i Kristus! Pinongin Roho inta diá mato-matoi, ki Kristus ain noposumba in awak-Nea tontaní kon i Allah saḷaku kuruban inta nosompurna. Tuabí in nondarit kon gina naton nongkon upacara mita inta diá in baragunanea, sinbá kita umuran mosumba kon i Allah inta nobiag.

¹⁵Tuamai ki Kristus in nobaḻí tonsigad kon tobatú dodandian inta nobagu, sinbá intau inta inoinídon i Allah in motarimadon kon barakat mita mononoi inta ain pinodandi i Allah. Tua komintan in mobaḻíbí sin oyúon in minatoi; Siata in ki Kristus. Kinopatoian-Nea tatua in nopobebasbí kon intau mita nongkon taḷá mita inta pinomia monia wakutu in dodandian inta muna pinaképa.

¹⁶Aka oyúon in surat warisan, yo mustibí doman oyúon in bukti kon intau inta nomia kon surat tatua in minatoidon.

¹⁷Sin diápabí mangaḻe in surat warisan tatua aka intau inta nomia kon surat tatua nobiagpa. Surat tatua in motaau pakéon aka minatoidon intau inta nomia kon surat tatua.

¹⁸Tuamai dodandian[8] inta muna in musti dugúon sinbá mo sah.

¹⁹Munapabí in ki Musa nopotaau in bayongan hukum i Allah kon intau mita in Israel. Onda intua sia nogamá kon dugú in ki adí in sapi bo dugú in bembé koḷakian bo binaukannea in tubig. Noiduduimai kon tua pinisikanneadon in Buk inta pinomaisan kon hukum mita inta nongkon i Allah bo bayongan intau in Israel. Sia in nomisik kon tua takin hisop bo bubuḷ in domba inta nopuya totok in batangannea.

²⁰Koyogot nopobayá in oaidannea tatua sia in nosingog nanaa, “Naadon in dugú inta noposah kon dodandian nongkon i Allah inta musti duduian monimu.”

²¹Natua doman in pinomia i Musa kon ḷoḷaigan i Tuhan bo kon bayongan in pakakat inta pakéonmai kon pooibadaan, nodaitnea pinisikan in dugú tatua.

²²Aka podudui kon hukum in agama Yahudi, yo gogió bayongan in yagi-yagi daritanbí in dugú, bo dosa mita in motaau ampungan táe musti dugúon.

²³Bayongan yagi-yagi inta nobaḻí lambang kon onu inta kon soroga in mustibí daritan natua. Táe aka kon soaḷ mita inta kon soroga, paraḷuonbí in sosumba inta totok in mopia.

²⁴Sin ki Kristus in diábí sinumuot kon Yuang Motusi inta pinomia in intau, inta nobaḻí lambang in yuang Motusi inta totokea. Ki Kristusbí tontaní in sinumuot kon soroga; tanaa Sia in minayá kon tayowon i Allah sin lantaran kopontingan naton.

²⁵Aka Imang Moḷoben intau in Yahudi yo pomuḷoibí in taong tumuot kon yuang inta Totok in Motusi kon bonu in baḷoi Tuhan takin kodia-dia in dugú in mahaḷuk. Táe ki Kristus in diábí nopobui-buimai in sinumuot sin moposumba in awak-Nea tontaní.

²⁶Sin aka natua dá tantú mopobui-buibí domanmai Sia in monahang kon roriga inta mulaipamai dunia naa pinomia. Táe noniata magí, tanaa kon singgai tumi naa, Sia in namangoi tongábí komintan bo noposarakan in awak-Nea tontaní sin potobut kon bayongan in dosa naton.

²⁷Bo sinantú domandon i Allah, kon intau in tongábí komintan matoi, onda intua adilondon i Allah.

²⁸Natua doman in ki Kristus, tongábí komintan pinosumba saḷaku kuruban pinotobut kon dosa in intau mobayong. Sia in mamangoipabí bui, táe deeman bidon mamangoi mogimpaḷut kon persoalan dosa, táe dongka bidon moposaḷamat kon intau mita inta mogoḷat mako kon koangoian-Nea bui.