Read Mongondow YAKOBUS 1 Bible Online

YAKOBUS 1 - Mongondow bible

YAKOBUS 1

¹Utatku mita, bayongan in umat i Allah inta noibaya-bayá mako kon dunia! Akuoi ki Yakobus, mogogaid kon oaidan i Allah bo i Tuhan Yesus Kristus, mopoyaput in salam kon i monimu.

²Utatku mita! Aka moiko bo mokouḻí kon sobaan morupa-rupamai, yo anggap intua tobatú kopiaan.

³Sinbá kotaauandon monimu, kon aka moiko bo umuran mopirisaya kon i Tuhan kon dodai in koantugan in sobaan, yo tua in mokopobaḻí kon i monimu moropot.

⁴Ḷukadai sinbá umuran moropot in ginamu tua modapot in totu-totuudon mosompurna in moiko bo diádon kodai-daitan in bayongan yagi-yagi.

⁵Aka oyúon in kon sigad monimu in diápa totok mobijaksana; yo musti mopoigum kon i Allah, dá ogoianbí i Allah in kabijaksanaan in sia. Sin takinbí pia in gina bo tabi in ki Allah in mobogoi kon batúan in intau.

⁶Tongá intau inta moigum in musti mopirisaya bo mokopotantú kon gina. Sin intau inta diá motantú in gina naonda bo bokoḷ kon dagat inta poyambá magí-mako in tompot.

⁷Intau natua in diábí motantú in raiannea; sia diá motaau in mogamá kon kaputusan kon soaḷ onukadon in inaidannea. Tuamai, donaaidon in sia moharap mako kon mokouḻí kon onu bo onu nongkon i Allah.

⁹Intau in Keresten inta nobiag nobogá, kosanangbí aka sia in poḷantudon i Allah.

¹⁰Bo intau Keresten inta nooyúon, kosanangbí aka sia in poompáan i Allah. Sin intau inta nooyúon in moyoyangbí naonda bo bungai in bonok.

¹¹Kon dodai mata in singgai momuká bo mopatúdon totok, yo moḷaḷow in bonok tatua sahingga in bungainea moḷabúdon bo diá domandon mopira. Natua doman intau nooyúon, morimumud in sia kon dodai in sia yogot mopobayá in totayaknea.

¹²Kosanangdon in intau inta motaba wakutu in kinoantugan in sobaan. Sin aka sia bo mokotahangdon kon sobaan tatua, yo tarimaanneabí in bungainea. Bungainea tua in kobiagan inta ain pinodandi i Allah kon intau inta motabi kon i-Nia.

¹³Bo aka tobatú intau kinotungkulan, yo dikabí in sia mosingog nanaa, “Godaan tanaa nongkon i Allahbí,” sin ki Allah in diábí kogodaan in inta moraat, bo diábí doman in Sia mosoba kon tobatúmai intau.

¹⁴Táe intau mita tanaa in kinogodaanbí in ibognea tontaní inta moraat.

¹⁵Moiduduimai kon tua, aka ibog inta moraat tatua bo duduian, dá mobaḻídon in oaid inta diá mopia; bo aka aid diá mopia tatua bo moguyangdon, dá popatoi in bungainea.

¹⁶Utat mita inta kinotabiku, dika moibog koakaḷan in moiko!

¹⁷Pomuḷoi in oogoi inta mopia bo tombuinag inta mosompurna, namangoibí intua nongkon soroga, pinopoponag i Allah inta nomia kon bayongan inta nobayag kon ḷangit. Sia tua in ki Allah inta diá kon dodai in onda mobaḷui bo diábí doman mokopopisí in mogaid kon inta mosindip.

¹⁸Ibog-Neabí tontaní in nopobaḻí kon i naton ki adí-Nea mita pinongin Pirman-Nea inta nobanar. Tua komintan in pinomia-Nea sinbá kita in mokouḻí kon tampat inta moponting kon sigad in bayongan mahaḷuk inta pinomia-Nea.

¹⁹Utat mita inta kinotabiku, tarukira kopira in naa! Pomuḷoi in intau musti ḻimikat in mokidongog, tongá mokopoḷaḷoi in mosingog bo donaai doman baḷú tumorú.

²⁰Sin intau inta tumorú, diá mokopogaid kon inta mopia, inta mokosanang kon gina i Allah.

²¹Tuamai ḷumbúdon in tabiat inta nonajis bo moraat. Táe koaḷusdon in gina motarima kon pirman inta pinomuḷa i Allah kon bonu in ginamu, sin moḷoben kawasa in pirman tatua kon moposaḷamat kon inimu.

²²Musti aidan monimu in onu inta pinoki aid i Allah, deemanbí tongá indongogan mako bo diá aidan, sin aka diá aidan yo tua in mangaḻenea moiko in nonguboḷdon kon i monimu tontaní.

²³Intau inta nokidongog kon pirman i Allah táe diá dinumudui kon onu inta pinoguman i Allah tua, yo sia tua in notongkaibí in intau inta noḻiḻímai kon pogotnea kon tayowon in posilag.

²⁴Naonda iḻiḻíannea mako kinopira, minayá in sia dá baḷúneadon kinoḻiongan in batangannea tatua.

²⁵Hukum i Allah tua in nosompurna bo moḷoben in kawasa-Nea moposaḷamat kon intau. Táe intau inta momirikisa bo monarukira kinopira poḷat nopoaid doman, deeman tongá inindongogan mako bo ḻiongon, yo intau natua in barakatanbí i Allah in bayongan oaidannea.

²⁶Aka oyúon in tobatú intau inta monganggap kon sia tua in motoḷutui in mopobayá kon parenta in agama, táe sia in diá mokotahang in diá mosingog kon intau, dá nonguboḷdon in sia kon inia tontaní; bo diádon mangaḻe in ibadanea tatua.

²⁷Podudui ibog i Allah, ibada inta moitutui in motuḷungbí kon adí mita inta uno-unondon bo kon i monia inta dongkadon boba-bobay inta nobiag moyoyiga, poḷat doman moḷukad kon awak tontaní sinbá diá poguyaaton in dunia naa.