Read Mongondow YAKOBUS 4 Bible Online

YAKOBUS 4 - Mongondow bible

YAKOBUS 4

¹Onu in pinomangkoian in ropatoi bo rogenggeng kon sigad monimu? Tua in pinangkoibí kon ibogmu mita inta umuran mobobayowan kon bonu in ginamu popisí in moibog mokouḻí kon kasanangan in dunia naa!

²Moibog in moiko, táe diá mokouḻí, dá moibog in moiko moḻimod! Totok moḷoben in ibog monimu, táe diá kodapotan monimu onu inta sinayak monimu tua, dá mobobayowan bo moropatoi in moiko. Moiko in diábí mokouḻí kon onu bo onu, sin moiko in diá noigum kon i Allah.

³Bo umpaka ain noigum in moiko, táe diábí doman mokouḻí in moiko, sin noitaḷá in tujuan pinoigumanmu; sin onu inta inigum monimu tua in tongábí kasanangan monimu tontaní.

⁴Moiko nion in intau inta diá mosatia! Diá kinotaauan monimu degá kon aka moiko moyobayat in dunia naa, yo moiko in mobaḻí saturu i Allah! Dá ki ine in moibog mobaḻí yobayat in dunia naa, yo mangaḻenea kon tua, baḻíonnea in sia saturu i Allah.

⁵Dikabí anggapon monimu kon diá in dodoyonan Buk Motusi moguman, “Kon bonu in awak naton naa sinampatdon i Allah in Roho inta motogat in ibognea.”[2]

⁶Umpaka natua, totabi Allah inta inogoi kon i naton moropo-ropot nongkon ibog in roho naton tatua. Tuamai kon bonu in Buk motusi in pinais doman, “Ḷawangonbí i Allah in intau inta mokaḷakuang, táe Sia in motabibí kon intau inta moompá in dodia.”

⁷Tuamai, kotoinduduidon kon i Allah bo ḷawangdon in Ibilis, dá moḷaguidon in Ibilis nongkon i monimu.

⁸Diugaidon in ki Allah, bo ki Allah in dimiugdon kon i monimu. Daritaidon in ḻimamu, moiko inta binaradosa! Bo insilangaidon in ginamu, moiko inta nonanga in gina!

⁹Musti in moiko totu-totuu momanasaḷ bo mongombaḷ poḷat mogamui; kosingmu in baḻídon ombaḷ bo ḷungangamu in baḻídon ajar in gina!

¹⁰Moiko in musti mokopoompá kon dodia kon tayowon i Tuhan, dá poḷantudon i Tuhan in moiko.

¹¹Utatku mita, donaai in moiko mosiponapudan ande mosipotaḷáan. Intau inta moponapud ande mopotaḷá kon i utatnea inta tumpaḷa Keresten, yo intau tatua in moningkuḻe bo mopotaḷá in hukum i Allah. Bo aka moiko in mopotaḷá kon hukum i Allah, mangaḻenea kon tua moiko in diá dinumudui kon hukum mita tatua, táe moiko in mobaḻídon hakimnea.

¹²Bokaka tongábí tobatú in kokawasa mobogoi in hukum kon intau bo mohakim kon intau. Sia tuata in ki Allah inta kokawasa moposaḷamat bo momutú. Dá, ki ine in moiko nion, sahingga in moiko moibog mopotaḷá kon tumpaḷa intau?

¹³Utat mita inta nosingog: “Singgai naa ande ikoḷom kami in mayá in kotá i Kuon bo mogutun kon tua totaong in koonggotnea sin modagang bo motayak kon doit,” — indongogai in tongginaku tanaa.

¹⁴Onu in mobaḻí kon kobiaganmu ikoḷom, diábí doman kinotaauanmu tontaní! Moiko nion in tongábí naonda bo poyok inta koontongan motoyong, onda intua diádon.

¹⁵Mustibí nanaa in singogon monimu: “Aka ogoi i Tuhan mobiag in kami dá mogaid in kami kon naa ande kon tua.”

¹⁶Táe tanaa mako moiko in mokaḷakuang bo moambungangaḷ. Bayongan in ambungangaḷ natua in noitaḷábí.

¹⁷Tuamai, intau inta kinotaauannea in mopia, táe diá aidannea, yo binaradosa in intau tatua.