Read Mongondow PETRUS 1 1 Bible Online

PETRUS 1 1 - Mongondow bible

PETRUS 1 1

¹Utatku mita umat inta piniḻí i Allah, inta noibaya-bayá mako kon butá in Pontus, Galatia, Kapadokia, Asia bo Bitinia! Akuoi, ki Petrus, rasul i Yesus Kristus in mopoigum mako sinbá ki Allah mobogoi in barakat bo kobiagan motompia kon i monimu. Moiko in piniḻí nobaḻí umat i Allah podudui in tomayá i Allah, Amá naton. Roho i Allah nopobaḻídon kon i monimu umat inta mokudus, inta mobiag bo tongá mosumba kon i Allah, sinbá moiko in tongá motoindudui kon i Yesus Kristus bo potusion in dugú-Nea.

³Koḻigaidon in kita mosukur kon i Allah, ki Amá i Tuhan naton ki Yesus Kristus! Sia in totok motabi kon i naton, manangka intua kita in inogoian-Nea in kobiagan mobagu inta pinodoyon kon kinobiagan bui i Yesus Kristus nongkon kinopatoian. Naabí in mobogoi in harapan moroton kon i naton.

⁴Kita in moharap mako sinbá mokouḻí kon barakat mita inta ain sinadia i Allah kon umat-Nea. Barakat mita tatua ain sinagú-Nea kon soroga, sahingga in diábí mogoguyaat, ande mobongkog ande mobaḷui.

⁵Tua komintan in ogoi kon i monimu, sin moiko in mopirisaya kon i Allah. Moiko iḷukadanbí doman in kawasa i Allah sinbá moiko in motarima kon kasaḷamatan inta sinadiadon bo poponiata kon singgai tumi.

⁶Tuamai moiko in musti mokoposanang kon gina, umpakabí tanaa mako moajarpa in gina, sin moiko in kinoantugan in noyagi-yagimai in totungkuḷ.

⁷Tujuan intua komintan in mogujibí kon i monimu mongo totuudon mopirisaya kon i Tuhan andeka diá. Buḷawanpa inta mogogu-goguyaatbí, mustibí ujionpa muna in tuḷu. Pirisayabí monimu in momaha-mahaḷ nongkon buḷawan mita tatua, tuamai mustibí doman ujion sinbá moiko in mobaḻídon totok in moroton. Aka natua yo moiko in dayowonbí bo horomaton poḷat diaan mayá in soroga aka ki Yesus Kristus buidon mamangoi.

⁸Bo umpakabí moiko in diápa dodai onda nokoontong kon inia, táe moiko in motabibí bo umuran mopirisaya kon i-Nia. Manangka intua moḷungangabí totok in gina monimu, ḷunganga in gina inta diábí in poporupaan.

⁹Sin tujuan in pirisayamu kino dapotandon, tuata in kasaḷamatan in jiwamu.

¹⁰Kasaḷamatanbí tanaa inta ain pinirikisa kinopia totok in nabi mita inta nopoyaput in koyow i Allah soaḷ totabi bo barakat inta inogoi i Allah kon i monimu.

¹¹Mosia in nonaridi mongo naonda bo toonu in kobaḻían intua,[1] inta imakusud in Roho i Kristus tua in onubí inta oyúon kon awak monia. Kon wakutu intua Roho-Nea ain noguman muna kon i monia soaḷ roriga mita inta musti korasaan i Kristus bo soaḷ kamuliaan-Nea inta moiduduimai onda intua mopaḷut.

¹²Ki Allah ain noguman kon nabi mita tatua, kon onu in pinomia monia tatua, deemanbí inaidan monia sin kopontingan monia tontaní, táe kopontinganbí monimu, tua in soaḷ mita inta tanaa mako ain dinongog monimu notarang nongkon intau mita inta nopoyaput in Habar Mopia soaḷ ki Yesus Kristus. Mosia in nopoyaput intua komintan kon i monimu takin kawasa in Roho i Allah inta pinotabá-Nea mangoi nongkon soroga. Bo umpakabí malaekat mita yo moibogbí doman totok monotaau kon habar inta pinoyaput monia tua.

¹³Tuamai moiko in musti umuran mobasadia. Pokoingat bo totu-totuu poharap kon barakat inta bain ogoi kon i monimu kon wakutu in ki Yesus Kristus mamangoi bui.

¹⁴Kotoinduduidon kon i Allah, bo donaaidon mobiag podudui in ibogmu koḻipod, wakutu i moiko diápa nonotaau kon i Allah.

¹⁵Táe aidaibí in naa, kotusidon in moiko kon bayongan in yagi-yagi inta inaidan monimu, ná ki Allah inta ain nogoiní kon i monimu tua in motusibí totok.

¹⁶Kon bonu in Buk Motusi in pinais nanaa: “Kotusibí in moiko, sin Akuoi in motusi.”

¹⁷Ki Allah tangoion monimu ki Amá wakutu in moiko mosambayang. Bá kotaauan monimu kon ki Allahbí tatua in mohakim kon intau podudui in oaid monia tontaní bo diábí poyoposion-Nea in intau. Tuamai wakutu in moiko kon duniapa naa koondokbí kon i Allah aka mobiag.

¹⁸Sin kinotaauan bidon monimu kon moiko in sinobut bidon nongkon kobobiag monimu inta diá in mangaḻenea, sin tuabí in pinopoponag in mogoguyang monimu. Pinoguboḻi kon i monimu tua in deemanbí barang inta mogogu-goguyaat ná saḷaka andeka buḷawan,

¹⁹táe dugúbí inta totok in momahaḷ, tuata in dugú i Kristus inta pinodugú naonda bo dugú in ki adí in domba inta diá nobogit ande diá pinaḻi-paḻían. Sia pinokuruban kon i Allah.

²⁰Ki Kristus in piniḻídon i Allah kon wakutupa in dunia naa diápa pinomia. Bo kon singgai mita tumi naa, sia namangoi in dunia naa sinbá posaḷamaton in moiko.

²¹Sia in pinopodoyonan in pirisaya monimu kon i Allah inta ain nomiag bui kon i-Nia. Dá ki Allahbí in pinirisaya monimu bo ki Allahbí doman in pinopoandoḷan monimu in harapan.

²²Popisí in moiko bo umuran dinumudui kon onu inta sinundú i Allah, dá tabidon in nondarit kon i monimu sahingga in totu-totuudon in moiko motabi kon intau mita inta tumpaḷa mopirisaya kon i Kristus. Pogumanku bui, totu-totuudon positabian in moiko kon tobatú bo tobatú takin gina motuḻid.[2]

²³Sin lantaran moiko mopirisaya kon pirman inta nobiag bo inta mononoi tua, dá moiko binaḻídon intau inta mobagu bo deemanbí pinolahir nongkon intau inta mato-matoi tua, táe nongkon i Amábí inta diá mato-matoi.

²⁴Kon bonu in Buk Motusi pinaisdon nanaa: “Bayongan in intau kon dunia naa naonda bo bonok, bo bayongan in kamuliaannea naonda bo bungai in bonok. Bonok moḷaḷow, dá bungainea in mototak doman;

²⁵táe pirman i Tuhan in mononoibí.” Pirman tatua in Habar Mopia inta ain pinotaau kon inimu.