Read Mongondow PETRUS 2 1 Bible Online

PETRUS 2 1 - Mongondow bible

PETRUS 2 1

¹Utat mita inta totu-totuudon nopirisaya ná doman kami naa! Ki Yesus Kristus, inta Allah bo Datu Mopoposaḷamat naton in nobogoidon in kasampatan kon i naton mopirisaya kon i-Nia, sin Sia ain nogaid kon onu inta mobanar. Surat tanaa in nongkon i Simon Petrus, tobatú mogogundoi bo rasul i Yesus Kristus.

²Poigumon mako ki Allah mobogoi in barakat bo kobiagan motompia totok kon i monimu, sin moiko ain nonotaau kon i Allah bo kon i Yesus Tuhan naton.

³Ki Allah in nomakédon kawasa-Nea sin mobogoi kon i naton in bayongan yagi-yagi inta paraḷu pakéon kon kobiagan sinbá motoindudui kon i-Nia. Tua in inaidan-Nea pinongin onu inta kinotaauan naton soaḷ ki Yesus Kristus, inta ain nogoiní kon i naton sinbá mobiag moyotakin-Nea[1] kon tampat-Nea inta mopia bo moonow.

⁴Natua in aid i Allah mobogoi kon i naton in barakat-Nea inta moḷoben bo baraguna totok inta ain pinodandi-Nea. Sinbá aka barakat tatua oyúondon kon i monimu, yo moiko in diádon kawasaan in ibog mita moraat inta mokogoguyaat kon dunia naa, bo moiko in moitakin motarima kon sipat i Allah.

⁵Manangka intua poramujidon totu-totuu sinbá umuran mopirisaya in moiko kon i Kristus bo mogaid doman kon inta mopia sin pirisaya monimu tatua. Bo poramuji doman bá mobaḻí intau mopandoi,

⁶koḻikud in mopandoi, moiko in musti doman mokotahang kon gina. Koḻikud in mokotahang kon gina moiko in musti moramuji doman sinbá motaba in tumayow kon bayongan in yagi-yagi. Koḻikud in motaba tumayow kon bayongan yagi-yagi, moiko in musti doman mobiag podudui kon inta kinoibog i Allah.

⁷Bo aka mobiag podudui in ibog i Allah yo musti intompodan in tabi kon i utat mita inta tumpaḷa mopirisaya kon i Allah bo tabi doman kon bayongan intau.

⁸Tua mita in sipat inta paraḷuon monimu. Aka sipat mita tatua bo nobayongdon totok in kon i monimu, yo morajing bidon totok in moiko mogaid bo moḷobenbí in mangaḻe in oaidanmu, bo kototaau monimu soaḷ ki Yesus Kristus Tuhan naton in modugangdon mopia.

⁹Táe intau inta diá kinogonúan in sipat mita natua, mopoḷokbí totok in pomomikirnea; sia in diá mokoontong bo koḻionganneabí kon dosanea mita koḻipod ain inampungan.

¹⁰Tuamai utatku mita, poramuji totok, sinbá moiko inta ain inoiní bo piniḻí i Allah in morotondon totok in pirisayamu. Aka aidan monimu intua komintan, yo diá bidon mobaḷui in pirisayamu.[2]

¹¹Aka natua, dá moiko in motaaudon totok tumuot kon dodatuan inta mononoi nongkon i Tuhan bo Datu Mopoposaḷamat naton ki Yesus Kristus.

¹²Tuamai tantú ponoropku intua kon i monimu, umpakabí kinotaauandon monimu, sinbá moiko in mopirisayadon totok kon totundú nongkon i Allah inta ain sinarima monimu tatua.

¹³Kon dodai in akuoi mobiagpa, nobaḻíbí kowajibanku in moponorop intua kon i monimu.

¹⁴Sin kinotaauanku bidon kon diá bidon moonggot in akuoi bo matoi, sin pinotaau bidon notarang i Tuhan Yesus Kristus kon inakó intua.

¹⁵Dá tantú ramujionku sinbá umpakabí akuoi in diádon, yo umuranpa doman kotoropan monimu in soaḷ mita tatua.

¹⁶Kon wakutu in kami nopotaau kon inimu kon naonda in komomulia in koangoian i Tuhan naton ki Yesus Kristus, tua in inouman nami deemanbí tongá pinodoyon kon ouman mita in intau inta diá in mangaḻenea. Táe kamuliaan i Kristus tatua ain bidon inontong in mata nami tontaní.

¹⁷Kon tuabí in kami wakutu in Sia i horomat bo pinomulia i Allah Amá. Kon wakutu intua kinodongogandon in singog nongkon i Inta Totok Momulia, inta noguman kon i-Nia, “Naabí in ki Adí-Ku inta Kinotabi-Ku. Sia in kinosanang in gina-Ku!”

¹⁸Kamibí tontaní in nokodongog kon singog tatua namangoi nongkon soroga wakutu in kami koyota-yotakin-Nea kon tudu in buḷud inta motusi tatua.

¹⁹Tuatabí in nokodugang kon pirisaya nami kon koyow i Allah inta ain pinoyaput in nabi mita. Maníka moiko in monarukira totok kon koyow tatua, sin koyow tatua in naonda bo togá inta nonindar kon wakutu in doḷom modapot in mobayagdon, bo sindar in tundi inta kon dotá in pomukaan monimbayag kon bonu in ginamu.

²⁰Naabí in soaḷ inta totok in moponting bo musti kotaauan monimu: Koyow nongkon i Allah inta pinoyaput in nabi mita in diábí motaau raion in mangaḻenea podudui kon ibog monimu.

²¹Sin diábí kon dodai in onda koyow inta nongkon i Allah tatua in pinotaau tongá pinodudui kon ibog in intau inta noibog nopoyaput in koyow-Nea tatua.