Read Mongondow PETRUS 2 3 Bible Online

PETRUS 2 3 - Mongondow bible

PETRUS 2 3

¹Utatku mita inta kinotabiku! Naa in suratku inta induaneadon kon i monimu. Kon bonu in suratku induanea tanaa, akuoi noramujidon totok sinbá moiko in tongá umuran morai kon inta mopia bo inta mokobiag.

²Bo umuranku doman anjuron mako sinbá tantú monorop kon onu inta ain pinoguman in nabi mita i Allah tungkuḷ intua bo moponorop doman mako kon parenta i Tuhan bo i Datu Mopoposaḷamat, inta ain pinotaau in rasul mita kon i monimu.

³Inta musti totok kotaauan monimu in nanaabí: Kon singgai tumi mamangoi in intau mita inta kobobiag monia kinawasa ibog in awak monia tontaní. Mosia in moningkuḻe kon i monimu.

⁴Mosia in mosingog nanaa: “Dongogonmai ki Tuhan in nodandi mamangoi! Yo ondabí in nion! Nodaitdon minatoi in mogoguyang naton táe bayongan in yagi-yagi umuranpabí ná kaadaan tungkuḷ intua, wakutu in dunia naa bagupa inaidan!”

⁵Tuodonbí monia diá pirisayaan, kon dunia naa in pinomia i Allah takin singog-Nea. Butá naa pinomia-Nea nongkon tubig doman, bo takin tubig;

⁶Bo tubigbí doman naa in pinaké i Allah nonginggamá kon dunia naa bo tombonunea mita tungkuḷ intua.

⁷Táe ḷangit bo butá in umuranpa oyúon in tanaa mako, iḷukadandon in singog i Allah nongkon tuḷu sin popogoḷat kon singgai ponantúan bo koyoyangan in intau mita inta moraat.

⁸Táe utatku mita, dika koḻiongan monimu in soaḷ tobatú tanaa, “Aka kon tayowon i Tuhan, tosinggai notongkaibí in toribu notaong, bo toribu notaong ná doman onda bo tongá tosinggai, diábí in yoposinea kon tua.”

⁹Diábí moḷaḷoi in ki Tuhan mogintompod kon onu inta ain pinodandi-Nea, umpakabí oyúon intau in mosingog kon moḷaḷoi in Sia. Táe ki Tuhan in umuranbí mosabar in moindoi mako kon oaid monimu, sin doíbí in Sia aka tobatúpamai intau kon sigad monimu in moputú. Ibogon-Nea, bayongan intau in mogogaidon in mogaid kon dosa.

¹⁰Táe Singgai koangoian i Tuhan in diábí butungonmai, sin naondabí bo koangoi in mononakow. Kon singgai tatua ḷangit moyoyang takin gotup inta totok in mokoondok, bo onukadon in kon ḷangit modaitbí mopokak, natua doman in butá bo bayongan in tombonunea modait doman moinggamá.[4]

¹¹Lantaran bayongan intua bo daiton rimumudon takin cara natua, dá moiko in musti mobiag mokopotoḷutui? Bo tongá doman mobantung kon i Allah,

¹²kon dodai in moiko mogoḷat mako bo mokotanob kon koangoian in Singgai i Allah. Kon Singgai tatua ḷangit modait mopokak, bo popisí patúnea tatua, dá bayongan in yagi-yagi kon ḷangit modait motatom.

¹³Táe kita in umuranbí mogoḷat mako kon dandi i Allah. Dandi i Allah tua in soaḷbí Ḷangit bo Butá inta Mobagu inta motompia bo moadil.

¹⁴Manangka intua, Uḻe utatku mita inta kinotabiku, wakutu in moiko mogoḷatpa mako kon koangoian in Singgai tatua, yo poramujibí totu-totuu sinbá mobiag modarit takin diábí in mokotor kon tayowon i Allah. Bo ḷukadaibí in hubungan mopia takin i Allah.

¹⁵Baḻíbí in kososabar i Tuhan naton tua in tobatú kasampatan inta inogoi-Nea kon i naton sinbá kita komintan in posaḷamaton-Nea. Soaḷ tanaa ain pinais doman i Paulus ki utat naton kon i monimu. Tua in pinaisnea lantaran kabijaksanaan i Allah inta inogoi kon inia.

¹⁶Kon bayongan surat i Paulus tua mita umuranbí pinaisnea. Bo totuubí kon oyúon in tongonumai nohal kon suratnea mita in mororiga totok komangaḻean in bonunea tua. Bo inta mororiga totok komangaḻean tatua, sinokotuui in intau mita inta diá nonotaau kon onu bo onu bo inta diá noroton in pirisayanea. Soaḷ mita tatua in diá bidon mokoherang, sin bonupa in Buk Motusi ramujion doman monia pomiaan natua. Tongá oaid monia tatua in mokoboditobí doman kon i monia tontaní.

¹⁷Táe moiko utat mita inta kinotabiku, kinotaauan bidon monimu intua. Tuamai mokopoingat sinbá moiko in diá moidudui kon aid in intau mita moraat tatua bo inta diá doman nonotaau in hukum, bo moiko in moḷabú nongkon dodoyonan kobiagan monimu inta moroton.

¹⁸Umurandon kobiag in moiko kon bonu in totabi i Tuhan Yesus Kristus, Tuhan bo Mopoposaḷamat naton. Poramuji totok sinbá moiko modugangdon monotaau kon soaḷ Sia. Dinayo-dayowdon in ki Allah nongkon tanaa mako modapot in kopaḷutannea! Amin. Horomat nami, Ki Petrus