Read Mongondow YOHANES 1 5 Bible Online

YOHANES 1 5 - Mongondow bible

YOHANES 1 5

¹Intau inta mopirisaya kon ki Yesus tua in Datu Mopoposaḷamat inta namangoi nongkon i Allah, yo intau tatua ki adí i Allah. Intau inta motabi kon i-Nia inta nopoangoi tua in motabibí doman kon i-Nia inta namangoi nongkon i Allah.

²Naa in daḷan naton monotaau kon kita in motabi kon i adí mita i Allah: Kita motabi kon i Allah bo motoindudui kon parenta-Nea mita.

³Sin aka motabi kon i Allah yo mustibí motoindudui kon parenta-Nea mita. Bo parenta-Nea mita in diábí mobogat kon i naton,

⁴sin bayongan intau inta nobaḻídon ki adí i Allah mokosanggupbí mita in monaḷow kon dunia inta moraat naa. Bo tongábí pirisaya naton kon i Tuhan tua in monaḷow kon in dunia naa.

⁵Ki ine degá in mokotaḷow kon dunia naa? Tongábí intau inta mopirisaya kon ki Yesus tua in ki Adí i Allah.

⁶Ki Yesus Kristus tuata inta namangoi kon dunia takin tubig inta pinobaptisan kon i-Nia bo takin doman dugú in kinopatoian-Nea. Sia in namangoi deemanbí tongá takin tubig, táe takinbí tubig bo dugú. Bo Roho i Allah tontaní nobogoi in kosakusian kon totuubí intua, sin Roho in diábí kon dodai in onda in monguboḷ.

⁷Toḷu in sakusi kon soroga: ki Amá, Pirman bo Roho Mokudus. Toḷu tatua in notobatúbí:[5]

⁸Toḷu doman in sakusi kon dunia naa, tuata in Roho i Allah, tubig bo dugú. Toḷu tatua in komintan nobogoi in kosakusian inta notongkai.

⁹Kita in mopirisayabí kon kosakusian intau, táe kosakusianbí i Allah in moropo-ropot kon tua. Bo tuata in kosakusian inta ain inogoi i Allah soaḷ ki Adí-Nea.

¹⁰Tuamai, intau inta mopirisaya kon i Adí i Allah ain notarima kon kosakusian tatua kon bonu in ginanea; táe intau inta diá mopirisaya kon i Allah, inanggapnea in ki Allah tua in mouboḷ, sin diá in sia mopirisaya kon onu inta pinoguman i Allah soaḷ ki Adí-Nea.

¹¹Naa in kosakusian tatua: Ki Allah ain nobogoi kon i naton in kobiagan mopia bo mononoi, bo ki Adí-Nea tatua in pangkoi in kobiagan tatua.

¹²Intau inta mopirisaya kon i Adí i Allah, in mokouḻí kon kobiagan tatua; bo intau inta diá mopirisaya kon i Adí, in diábí mokouḻí kon kobiagan tatua.

¹³Pinaisku in naa kon i monimu inta ain nopirisaya kon i Adí i Allah, sinbá kotaauandon monimu kon moiko ain nokouḻí kon kobiagan mopia bo mononoi.

¹⁴Bo kita in mobaranibí in mayá kon tayowon i Allah, sin moyakinbí in kita kon indongoganbí i Allah in onu in pinoigum naton, aka inta pinoigum naton tua noyokaan kon onu inta kinoibog-Nea.

¹⁵Sin kinotaauandon naton kon indongogan-Neabí in kita aka mopoigum kon i-Nia, dá kinotaauan domandon naton kon ogoi-Neabí in onu inta ain pinoigum kon i-Nia.

¹⁶Aka moiko bo mokoontong kon tobatú intau inta tumpaḷa Keresten nogaid kon dosa inta diá mokopopisí kon intau tatua kobuḻiandon in kobiagan inta mopia bo mononoi, yo moiko in musti mosambayang kon i Allah; bo ki Allah in mobogoibí in kobiagan tatua kon inia. Naa in tongábí kon i monia inta nogaid kon dosa inta diá mokopopisí kon i monia kobuḻian in kobiagan tatua. Táe oyúon in dosa inta mokopopisí kon intau kobuḻian in kobiagan tatua. Aka kon soaḷ tanaa yo akuoi in diábí moguman kon i monimu kon moiko in musti mosambayang kon i Allah.

¹⁷Bayongan in oaid inta moitaḷá in dosabí, táe oyúon in dosa inta diábí mokopopisí kon intau tatua kobuḻian in kobiagan mopia bo inta mononoi tua.

¹⁸Kinotaauan naton kon bayongan intau inta ain nobaḻí ki adí mita i Allah, in diábí umuran mogaid kon dosa, sin ki Adí i Allah in umuran moḷukad kon inia, bo ki Inta Moraat in diá mokopongonu kon inia.

¹⁹Kinotaauanbí naton kon kita naa in kapunyaanbí i Allah, umpakabí komintan dunia kinawasaandon in Inta Moraat.

²⁰Kinotaauan bidon naton kon ki Adí i Allah ain namangoi bo ain nobogoi in pongortian kon i naton, sinbá kotaauan naton in ki Allah inta mobanar. Kita in nobiag notobatú takin i Allah inta mobanar bo umuran nobiag notobatú takin i Adí-Nea ki Yesus Kristus. Naadon in ki Allah inta mobanar, bo naadon in kobiagan inta mopia bo mononoi.

²¹Adíku mita, mokopoyayúdon in moiko kon berhala mita!