Read Mongondow HAKIM MITA 1 Bible Online

HAKIM MITA 1 - Mongondow bible

HAKIM MITA 1

¹Naonda in ki Yosua minatoi, umat in Israel noḻibó kon i TUHAN, “TUHAN, suku táonda degá in kon sigad nami naa inta muna-munamai mayá monubu kon intau in Kanaan?”

²Ki TUHAN notubag, “Suku in Yohuda. Mosia tua inogoian-Kudon in kawasa mogagow kon butá tatua.”

³Bo suku i Yohuda noguman kon suku i Simeon, “Tuḷungaipa in kami monubu kon intau mita in Kanaan bo mogagow kon butá inta ain sinantú i TUHAN kon inami. Bain bantungan doman nami in moiko mayá mogagow kon butá inta ain sinantú i TUHAN kon i monimu.” Dá minayádon in suku i Simeon

⁴bo i Yohuda noparang noyotakin. Bo pinopountung i TUHAN in mosia nongkon intau mita in Kanaan bo intau in Peris. Mopuḷú noribu in tontara in musung in minatoi kon Bezek.

⁵Nouḻí monia in ki Adoni-Bezek, datu kon butá tatua, bo sinubu monia in sia.

⁶Noḷagui in sia, táe inaḷowan monia bo dinomok in sia bo poḷat pinongkóan kon ki iná in ḻima bo sioḷnea.

⁷Guman i Adoni-Bezek, “Koḻipod in pitu nopuḷú in datu inta pinongkóanku kon ki iná in ḻima bo sioḷ monia, bo binió-biókudon mako in mosia nokaan kon ki agat in kaanon inta noḷabú nongkon mejaku. Tanaa in ki Allah nopoaidon kon inakó ná onu inta pinopoaidku kon i monia.” Noiduduimai kon tua ki Adonia-Bezek dinia pinobayá in Yerusalem, bo kon tuadon in kinopatoiannea.

⁸Intau in Yohuda nonubu kon Yerusalem, bo nogagow poḷat nonurub kon kotá tatua bo noḻimod kon intau mita inta nogutun kon tua.

⁹Nopaḷut mako kon tua mosia minayá bui nonubu kon intau mita in Kanaan inta nogutun kon buḷud, bo kon obaga mita in buḷud; bo inta nogutun doman mita kon butá mita inta noingkag kon dotá in toḷatan,

¹⁰bo kon kotá in Hebron, kotá inta dungkuḷmai sinangoian Kiryat-Arba. Kon tua intau in Yohuda nonaḷow kon inanakan in Sesai, Ahiman bo Talmai.

¹¹Nongkon Hebron, intau in Yohuda minayá nonubu kon kotá in Debir, inta dodai intua sinangoian Kiryat-Seper.

¹²Ki Kaleb, intau tobatú nongkon suku in Yohuda, in noguman, “Ki ine in mokoagow kon Kiryat-Seper, yo sia in motaau motonibuḷoi i adíku bobay ki Akhsa.”

¹³Ki Otniel, adí i Kenas inta ki ai-ai i Kaleb, nokoagow kon kotá tatua. Dá inogoidon i Kaleb in ki Akhsa, ki adínea, pinobuḷoi i Otniel.

¹⁴Kon singgai pinonikaan monia, ki Otniel nondodak kon i Akhsa[1] sinbá moigum kon butá totampat nongkon i amánea. Dá noponagdon in ki Akhsa nongkon keledainea, bo iḻibó i Kaleb mongo onu in koibognea.

¹⁵Ki Akhsa notubag, “Koibogku in butá inta oyúon in tubig, sin butá inta inogoi i amá kon inakó in butá inta diá in tubig.” Dá inogoian i Kaleb in sia in butá inta oyúon in tubig kon uḷuannea bo kon sioḷannea.

¹⁶Buí inunuton i Musa, inta intau mita in Keni, dinumudui kon intau in Yohuda iḻumuai nongkon Yerikho, kotá in kurma, bo minayá in padang gurun kon dotá in toḷatan in Arad kon Yohuda. Kon tua in mosia nogutun kon yua-yuak in bangusa Amalek.[2]

¹⁷Noiduduimai kon tua noyotakin in suku i Simeon, suku i Yohuda tatua minayá nonubu bo nonaḷow kon intau in Kanaan inta nogutun kon kotá in Zepat. Mosia nogodi-godimai kon kotá tatua, onda intua iyompat monia bo dongka sinontangoian Horma.[3]

¹⁸Ki TUHAN notuḷung kon intua in Yohuda dá kinoagowan monia in butá kon buḷud. Táe diá kinoagowan monia[4] in Gaza, Askelon ande Ekron bo butá mita kon diugneamai, sin bangusa mita inta nogutun kon bingkí mita in tubig oyúon in kereta mita in parang inta pinomia nongkon uatoi; tuamai intau mita in Yohuda in diá nokopoguntun kon i monia.

²⁰Ná inta ain pinarenta i Musa, Hebron inogoi kon i Kaleb, sin koḻipod in toḷu nogolongan in inanakan buí i Enak in inuntundon i Kaleb nongkon kotá tatua.

²¹Suku i Benyamin in diá nokopoguntun kon intau in Yebus nongkon kotá in Yerusalem. Tuamai intau in Yebus umuranpa doman nogutun kon tua noyotakin in intau in Benyamin.

²²Suku Epraim bo Manasye buí i Yusup, minayá nonubu kon kotá in Betel, inta kon dodai intua Lus in tangoinea. Bo ki TUHAN in notuḷung kon i monia. Kon tungkuḷ in toimata mita pinotabá minayá in kotá tatua,

²⁴mosia noyodungkuḷ in ḷoḷaki tobatú inta namangoi nongkon kotá. Guman monia kon inia, “Aka iko motuḷung kon inami sinbá kami moituot in kotá tanaa, yo mopiabí in pogogaid nami kon inimu.”

²⁵Dá sinundú in intau tatua kon i monia in daḷan tumuot kon kotá tatua. Bo intau mita in Epraim bo Manasye sinumuot kon kotá tatua bo noḻimod kon bayongan in intau inta nogutun kon tua, koḻikudon in intau tatua takin tombonu in baḷoinea bo ginaḷumnea.

²⁶Onda intua sia nomampingdon kon butá in intau in Het, bodongka noposindog in kotá tobatú kon tua bo sinangoiannea Lus. Kotá tatua umuranpabí doman natua in tangoinea.

²⁷Suku in Manasye in diábí nopoguntun kon intau inta nogutun kon Bet-Sean, Taanakh, Dor, Yibleam bo Megido takin ḻipú mita kon diugneamai. Dá intau in Kanaan umuran nogutun kon tua.

²⁸Totuu kon naonda in intau in Israel nodugangdon noropot, mosia in nomakisa kon intau mita in Kanaan nogaid kon oaidan monia, táe diábí doman pinoguntun monia in intau mita in Kanaan tatua nongkon tua.

²⁹Kon kotá in Gezer, suku in Epraim in diábí nopoguntun kon intau in Kanaan, inta nogutun kon kotá tatua. Dá intau in Kanaan umuranpabí nogutun kon tua noyotakin monia.

³⁰Intau mita inta nogutun kon kotá in Kitron bo Nahalol diábí doman pinoguntun in suku Zebulon. Tuamai in bangusa Kanaan umuranpa nogutun kon tua noyotakin monia, tongá intau mita in Kanaan tatua pinakisa nogaid kon i monia.

³¹Intau mita inta nogutun kon kotá in Ako, Sidon, Ahlab, Akhzib, Helba, Apek, bo Rehob in diábí doman pinoguntun in suku Asyer.

³²Tuamai in intau in Kanaan, intau mita taakan kon butá tatua nogutunpa doman kon butá tatua noyotakin in suku Asyer.

³³Intau mita inta nogutun kon kotá in Bet-Semes bo Bet-Anat in diábí doman pinoguntun in suku Naptali. Manangka intua intau in Kanaan, inta taakan kon butá tatua nogutunpa doman kon tua noyotakin in intau in Naptali. Táe mosia in pinakisa mogaid kon oaidan in intau in Naptali.

³⁴Bangusa in Amori tantúpa nogutun kon Ayalon, Saalbim bo Buḷud in Heres, sin suku i Dan dinodakan monia minayá in butá kon buḷud, bo diá binió mako in mosiḻig kon butá inta noratá kon ḷopá. Táe bangusa in Amori tatua in umuranbí doman kon bonu in kawasa in suku Epraim bo Manasye poḷat doman pinakisa sin moduḷu mogaid kon oaidan in suku doyowa tatua.

³⁶Kon dotá in utuan kon Sela, sigad in butá in intau mita in Amori noitaḻib kon Pononakodan Akrabim.