Read Mongondow HAKIM MITA 12 Bible Online

HAKIM MITA 12 - Mongondow bible

HAKIM MITA 12

¹Kon tungkuḷ intua suku in Epraim nosadiadon sin moparang, bo minayá iḷumoḷan kon Ongkag in Yordan nopobayá ná Zapon. Mosia in noguman kon i Yepta, “Nongonu sin iko in minayá nonubu kon bangusa in Amon tongá diábí nonongganut kon inami? Tanaa in turubondon nami in iko takin tombonu in baḷoimu.”

²Nosingogdon in ki Yepta, “Kon sigad in intau in Amon bo inami intau in Gilead oyúon in rogenggeng inta motoyang totok. Moiko inoiníkudon motuḷung mopoḷuat kon inakó nongkon kawasa in intau mita in Amon tatua, táe moiko in diábí namangoi.

³Dá naonda in kinotaauanku kon moiko in diábí mamangoi motuḷung kon inakó, nomakisadon in akuoi minayá nomarang kon intau mita in Amon tatua, umpakabí akuoi matoi. Bo ki TUHAN nopountung kon inakó nongkon i monia. Yo nongonu sin tanaa moiko in mamangoibí monubu kon inakó?”

⁴Onda intua ki Yepta nosipun kon bayongan in intau in Gilead, bo nomarang poḷat nonaḷow kon intau in Epraim. (Intau in Gilead inta nogutun kon Epraim bo kon Manasye aindon pinoponapudan in intau in Epraim kon mosia in aindon sinumondí nongkon Epraim, sukunea.)

⁵Intau mita in Gilead inta noparang tatua, nongawasadon kon tampat mita inta ḷoḷoḷanan kon Ongkag in Yordan, sinbá motaau moḷabot kon intau mita in Epraim inta moḷagui. Kon dodai in oyúon intau Epraim, inta moḷagui, bo mopoigum sinbá ogoipa ḷumoḷan, dá intau in Gilead moḻibó kon inia, “Degá iko naa intau in Epraim?” Aka sia motubag, “Deeman,”

⁶dá sia pokitangoian monia in tosingogon “Syibolet”. Sia in moguman “Sibolet” sin diá in sia motaau monangoi moitutui kon tosingogon tatua. Bo domokon monia in sia bo ḻimodon kon tobatú ḷoḷoḷanan tatua. Dá kobayong in intau in Epraim inta iḻimod tungkuḷ intua in 42.000.

⁷Onom notaong in ki Yepta in nobaḻí itoi kon Israel. Onda intua sia minatoi bo iḷobong kon ḻipúnea tontaní[10] tuata in kotá in Mizpa kon Gilead.

⁸Nopaḷut kon i Yepta, itoi kon umat in Israel in ki Ebzan nongkon Betlehem.

⁹Ki Ebzan kogadí kon ḷoḷaki toḷu nopuḷú bo kogadí doman kon adí bobay toḷu nopuḷú. Ki adínea mita bobay tatua pinopotonibuḷoinea kon intau mita inta nongkon suku mita ibanea, bo sia in nogamá doman kon toḷu nopuḷú in mongodeaga nongkon suku ibanea sin pinotonibuḷoinea kon i adínea mita ḷoḷaki. Pitu notaong in ki Ebzan in nobaḻí itoi kon umat in Israel,

¹⁰onda intua minatoi in sia bo iḷobong kon Betlehem.

¹¹Nopaḷut mako kon i Ebzan, itoi kon Israel in ki Elon inta nongkon suku in Zebulon, bo sia in nobaḻí itoi mopuḷú notaong in koonggotnea.

¹²Onda intua minatoi in sia bo iḷobong kon Ayalon kon butá in Zebulon.

¹³Nopaḷut mako kon i Elon, ki Abdon ki adí i Hilel nongkon Piraton in nobaḻí itoi kon umat i Israel.

¹⁴Ki adínea ḷoḷaki in opat nopuḷú bo ki ompunea mita ḷoḷaki in toḷu nopuḷú. Mosia notukidbí in keledai totakoian. Waḷu notaong in ki Abdon in nobaḻí itoi kon umat in Israel.

¹⁵Onda intua minatoi in sia bo iḷobong kon Piraton kon butá in Epraim kon buḷud in intau Amalek.