Read Mongondow HAKIM MITA 16 Bible Online

HAKIM MITA 16 - Mongondow bible

HAKIM MITA 16

¹Kon singgai tobatú ki Simson minayá in Gaza. Kon tua sia noyodungkuḷ in bobay sundaḷ tobatú bo minayá in sia nosiug takin bobay tatua.

²Bo kinodongogandon in intau mita inta nogutun kon Gaza kon ki Simson in kon tua. Dá, binayádon iḻipung monia in tampat tatua bo iḷukadan monia in tonggobii tua kon ngara in kotá. Táe mosia in diábí nomia kon onu bo onu in doḷom tua sin mosia in norai, “Bain momuká in mata in singgai bo ḻimodon naton in sia.”

³Táe ki Simson in diábí nosiug kon tua dapot in doḷo-doḷom. Noonggot kon doḷom nobangon in sia bo minayá kon ḷoḻingkop in ngara in kotá. Irabutnea in ḷoḻingkop tatua takin bayongan in oigi bo takin bonoboinea mita. Onda intua pinotaannea in ḷoḻingkop tatua, bo dinianea kon tudu in buḷud kon ḷoḷan in Hebron.

⁴Nopaḷut mako kon tua ki Simson noibogdon kon bobay tobatú nongkon Ḷopá in Sorek. Ki Delila in tangoi in bobay tatua.

⁵Dá namangoidon in intau ḻima pongawasa in Pilistin kon bobay tatua bo noguman, “Dondouḷugaidon in ki Simson sinbá potaauneadon kon inimu onu in nobaḻí dodoyonan in ropotnea, bo naonda in pongonginggamá kon ropotnea tatua. Aka kotaauandon dá kami in mamangoidon bo motogot kon inia poḷat monaḷow kon inia. Bain kon batúan nami in mobogoidon in doit kon inimu tumongo ribu bo mogatut in doit saḷaka.”

⁶Dá ki Delila in noguman kon i Simson, “Simson, nongonu sin iko in totuubí moropot? Onubí in potogot kon inimu sinbá moinggamá in ropotmu tatua? Pogumanka in inta noibuni tatua!”

⁷Ki Simson in notubag, “Aka akuoi bo togoton in tontogot in piot pitu inta mobagu inta diápa moingkag totok, yo moḻemédon in akuoi bo mobaḻídon akuoi ná intau biasa.”

⁸Bo pongawasa mita in Pilistin tatua nobogoidon kon i Delila in tontogot in piot pitu inta mobagu inta diápa totok in noingkag. Onda intua, koyogot in intau in Pilistin nogoḷat mako kon yuang ibanea, ki Delila nopotogotdon kon i Simson in tontogot tatua bodongka nomaḷú, “Simson! Intau in Pilistin nion!” Baḷúdon i Simson binontow in tontogot mita in piot tatua. Tontogot mita tatua nobontow naonda bo siningkoi inta kinotugatan in tuḷú. Kinodoyonan in ropot i Simson diápa doman kinotaauan.

⁹

¹⁰Bo ki Delila noguman kon i Simson, “Ah, nonguboḷ in iko! Iko nion in tongábí mopoyambá kon inakó. Oumandon kaasí kon inakó mongo onu in motaau potogot kon inimu!”

¹¹Tubag i Simson, “Aka akuoi togoton in tontogot mobagu inta diápa dodai in onda pakéon, yo moḻemédon in akuoi bo mobaḻídon naonda bo intau biasa.”

¹²Koyogot in intau in Pilistin mogoḷat mako kon yuang ibanea, ki Delila nogamá kon tongonumai in tontogot inta nobagu, bodongka notogot kon i Simson. Onda intua sia nomaḷú, “Simson! Intau in Pilistin nion!” Táe binontow i Simson in tontogot mita tatua nongkon ḻimanea naonda bo nomontow kon siningkoi.

¹³Bo ki Delila in noguman kon i Simson, “Ah, iko in nopoyambádon bui kon inakó. Iko in nonguboḷbí. Oumandon awú kon inakó mongo onu in motaau potogot kon inimu!” Ki Simson in notubag, “Aka buokku pitu nougat poyoḷubidon in siningkoi kon pakakat in sosuji tatua, onda intua popogakod kon kayu pakakat in sosuji tatua yo moḻemédon akuoi bo mobaḻídon ná intau ibanea.”

¹⁴Dá ki Delila noposiugdon kon i Simson dapot in noḷoḷot bo sinuḷapidneadon in pitu nougat in buok i Simson kon siningkoi kon pakakat pososuji. Nopaḷut mako kon tua pinopotogotnea kon kayu pakakat pososuji tatua bodongka nomaḷú, “Simson! Intau in Pilistin nion!” Dá nobangondon in ki Simson bo nogugut kon buoknea dapot in nougut nongkon pakakat pososuji tatua.

¹⁵Onda intua ki Delila noguman kon inia, “Ah, kainimu iko in motabi kon inakó táe ginamu in deemanbí kon inakó! Kotoḷudon in iko nopoyambá kon inakó, bo umaai in tanaa iko in doí doman mopotaau kon inakó nongonu sin iko in totokbí in moropot námai tua.”

¹⁶Pomuḷoi in singgai ki Delila mongombaḷmai bo mondodak, dá nobúdon in ki Simson in nokodongog.

¹⁷Pangabisannea inoumandon i Simson onu in kino doyonan in ropotnea tatua. “Buokku naa diápa kon dodai in onda in ginonsingan,” guman i Simson. “Akuoi naa in inogoidon kon i Allah nobaḻí kapunyaan-Nea. Nongkon noilahirpamai akuoi naa ain nobaḻí intau Nazir.[16] Aka buokku naa bo gonsingan, yo ropotku naa in moinggamádon; moḻemédon in akuoi bo mobaḻídon ná intau biasa.”

¹⁸Nopirisayadon in ki Delila kon ki Simson in totu-totuudon nopotaau kon onu in nobaḻí kino doyonan in ropotnea. Tuamai in sia nokidiadon in habar tanaa kon pongawasa mita in Pilistin, “Angoipa bui komintanpa naa. Ki Simson ain nopotaau in onu inta nobaḻí kino doyonan in ropotnea kon inakó.” Dá namangoidon in mosia kodia-dia in doit ogoi kon i Delila.

¹⁹Nopaḷut mako kon tua ki Delila noyapumai kon buok i Simson nodapot in noḷoḷot kon paanea, bo sia nogoiní kon intau bo nokigonsing in pitu notuḷapid in buok i Simson. Onda intua pinoposikisadon in bobay tatua in ki Simson, sin ropot i Simson in noinggamádon.

²⁰Bo sia in nomaḷú, “Simson! Intau in Pilistin niondon!” Ki Simson in nobangon bo kainia kamai sia in moiḷuatpa ná biasamai. Diábí kinotaauannea kon ki TUHAN in nonaḷámaidon kon inia.

²¹Dá intau mita in Pilistin nodomokdon kon inia bo nonurak kon batoḷ in matanea. Dinia monia in sia minayá in Gaza bo sinogot monia in rante bitú doyowa, bo pinotuot monia kon ponjara. Kon tua pinoki giḻingan monia in sia.

²²Táe kon dodai intua buoknea momangkoidon mobiag bui.

²³Kon singgai tobatú pongawasa mita in Pilistin noyosipun sin momia kon rame moḷoben bo moposumba in kuruban kon i Dagon, dewa monia. Mosia in nodondong, “Dewa naton ain nopountung kon inaton nongkon i Simson, musung naton!”

²⁴Koyogot in mosia norame takin ḷunganga in gina mosia noguman, “Diadon mangoi in ki Simson sinbá sia in baḻíon naton yambá!” Dá mosia in nogamá kon i Simson nongkon ponjara, bo sia in binaḻí monia yambá. Pinoki sindogan monia in sia kon sigad in oigi doyowa inta moḷoben. Naonda in intau mobayong tatua nokoontong kon i Simson, mosia in nodayow kon i Dagon bo nodondong, “Dewa naton ain nopountung kon inaton nongkon musung inta ain nomoguraat kon butá naton bo noḻimod kon nobayong totok in intau naton!”

²⁵

²⁶Guman i Simson kon adí ḷoḷaki inta nokapit kon inia, “Ukataidon in ḻimaku sinbá motaau in akuoi mokadai kon oigi mita inta nobaḻí ropot in bangunan tanaa, sin moibogpa in akuoi umandoḷ kon tua.”

²⁷Gedung tatua nopuḻing totok in intau. Pongawasa in Pilistin taya ḻima tua kon tua doman. Bo kon ḷundukan nogintoḷu in bangunan tatua toḷumai noribu degá in intau. Mosia in komintan inimindoi kon i Simson bo noningkuḻe kon i Simson.

²⁸Kon dodai intua ki Simson nosambayang; Kai nia, “O, TUHAN Inta Totok in Moḷantud, toropa kaasí in akuoi naa. Ogoiaipa bui akuoi in ropot tongákadon komintan naa, o Allah, sinbá takin aidku tanaa mokotuḻí in akuoi kon aid in intau in Pilistin inta ain nonurak kon batoḷ in mataku doyowa naa.”

²⁹Nopaḷut mako kon tua ki Simson nokadai kon oigi doyowa kon yuak inta nobaḻí kino doyonan in ropot in bangunan tatua. Bo takin kokada-kadai in ḻimanea doyowa nosimpaḷ kon batúan in oigi, tatua,

³⁰sia nomaḷú, “Umpakabí in akuoi matoidon moyotakin in intau mita in Pilistin tanaa! Bo takin ḻimbatú in ropotnea inundudnea in oigi mita tatua nodapot in noumpag bo noidantug kon pongawasa taya ḻima tatua takin bayongan in intau inta kon tua. Ki Simson in minatoi domandon. Táe, noyododai in kinopatoiannea tatua sia in noḻimodon kon intau mobayong, kobayongnea in noiḻiu kon dodai in sia nobiagpa.

³¹Onda intua namangoidon in ginaḷumnea bo bayongan in inanakan in motoḷuadínea sin mogamá kon mayatnea. Mosia in nodia kon mayatnea tatua nobui, bo iḷobong monia kon bonu in poḷoḷobongan i Manoah, ki amánea. Poḷoḷobongan tatua in noiukat kon sigad in Zora bo Eshtaol. Ki Simson nobaḻí itoi kon Israel doyowa nopuḷú notaong in koonggotnea.