Read Mongondow HAKIM MITA 17 Bible Online

HAKIM MITA 17 - Mongondow bible

HAKIM MITA 17

¹Oyúon in intau ḷoḷaki ki Mikha in tangoinea. Sia in nogutun kon buḷud kon butá in Epraim.

²Kon singgai tobatú sia in noguman kon i inánea, “Iná, kon tungkuḷ in ki iná kinobuḻian in toribu bo mogatut in doit saḷaka, dinongogku ki iná in nogodi-godimai kon intau inta nonakow. Naa, Iná, in doit tatua! Akuoibí in nonakow.” Ki inánea notubag, “Igumon mako iko in barakatan i TUHAN, adíku!”

³Ki Mikha nopobui in doit tatua kon i inánea, bo ki inánea in noguman, “Bá iko, adíku, moiḷuat nongkon odi-odi inta ain siningogku tatua, yo posumbaku in saḷaka tanaa kon i TUHAN sin pakéon pogaid kon patong kayu inta inaipan in saḷaka. Dá doit tatua in pobuionkudon kon inimu.”

⁴Dá naonda in ki Mikha nopobui in doit tatua kon i inánea, ki inánea nogamá kon doyowa nogatut in doit tatua, bo inogoinea kon intau inta mononontaḷ kon saḷaka. Bo nokiaid in sia kon mononontaḷ tatua in patong kayu inta inaipan in saḷaka tatua. Onda intua patong tatua inukat kon baḷoi i Mikha.

⁵Ki Mikha naa in koyongandon oyúon in tobatú tampat pososumbaannea. Sia in nomia kon tongonumai in patong berhala bo todit in epod[17] bo noduí kon i adínea ḷoḷaki tobatú nobaḻí imang.

⁶Kon tungkuḷ intua Israel diádon in datu; batúan intau mogaid kon onu in irainea moitutui.

⁷Kon dodai doman intua oyúon in tayowmobiag tobatú nongkon suku i Lewi. Koḻipod nogutun in sia kon Betlehem kon butá in Yohuda.

⁸Táe tanaa in nonaḷámaidon in sia kon kotá tatua bo minayá notayak kon pogutunan ibanea. Kon binayáannea tatua nodapotdon in sia kon baḷoi i Mikha kon buḷud kon butá i Epraim.

⁹Ki Mikha noḻibó kon inia, “Intau in onu in ki utat?” Intau tatua in notubag, “Akuoi naa intau in Lewi nongkon Betlehem kon Yohuda. Akuoi in yogot motayak kon tampat pogutunan.”

¹⁰Ki Mikha noguman, “Pogutundon takinku kon naa, sinbá iko in mobaḻí monononggina bo imang nami. Bain ogoianku iko in mopuḷú in doit saḷaka pomuḷoi in taong, bo pakeang takin kaanon.”

¹¹Tayowmobiag intau in Lewi tatua noibog, bo sia in dinuí i Mikha nobaḻí imangnea. Sia in nogutun kon baḷoi i Mikha bo pinomia naonda bo ki adí i Mikha tontaní.

¹³Dá ki Mikha noguman, “Akuoi in noyakinbí kon tanaa in ki TUHAN in momiadon kon inta mopia kon inakó sin oyúondon in intau in Lewi inta nobaḻí imangku.”