Read Mongondow HAKIM MITA 18 Bible Online

HAKIM MITA 18 - Mongondow bible

HAKIM MITA 18

¹Kon dodai intua kon Israel diá in datu. Suku in Dan umuranpa motayak kon butá inta mobaḻí butá monia, sin mosia in diápa doman nokouḻí kon butá kon yua-yuak in suku mita in Israel ibanea.

²Tuamai in mosia nomiḻí kon intau ḻima inta mongotorindog nongkon sigad in bayongan inanakan kon bonu in suku monia inta nogutun kon Zora bo Eshtaol, bodongka nobogoi in oaidan kon i monia ḻima tatua sin monaridi kon butá tatua. Dá nobuatdon in intau mita tatua, bo nodapotdon in mosia kon buḷud inta kon butá in Epraim. Kon tua in mosia nongandupa kon baḷoi i Mikha.

³Naonda in tumuotdon kon baḷoi tatua mosia nokodongog kon tayowmobiag in Lewi tatua nongonguman, bo kinotaauandon monia in ḻegúnea. Dá mosia in namangoi kon inia bo noḻibó, “Nongonu sin kon naabí in iko? Onu in oaidanmu? Ki ine in nodia kon inimu?”

⁴Tayowmobiag tatua notubag, “Akuoi in kon naa sin inoiní i Mikha. Sia in noduí kon inakó nobaḻí imangnea, bo nobogoi in tondan in pogaidanku.”

⁵Bo mosia in noguman kon inia, “Aka natua, yo tuḷungaipa bo ḻibó kon i Allah mongo bobayáan nami naa in mokodungkuḷ kon onu inta sinayak andeka diá.”

⁶Tubag in imang tatua, “Dika moḻi-ḻiaw in gina. Kino ibog bidon i TUHAN in bobayáan monimu tanaa.”

⁷Nopaḷut mako kon tua taya ḻima tua minayá in Lais. Kon tua nonaridimai in mosia kon intau mita inta nogutun kon tua. Noniata magí kobobiag in intau mita in Lais tatua naonda bo kobobiag in bangusa in Sidon. Umpakabí noitontaní in mosia, bo noyayú nongkon bangusa in Sidon, mosia tua in nobiagbí noaman bo motompia, diá in musung, nooyúon, bo diábí in diá kon i monia.

⁸Naonda in taya ḻima tua minayádon bui kon intau mita tongosuku monia kon Zora bo Eshtaol, pinoiguman in mosia kon tosingogon.

⁹Dá mosia in noguman, “Koḻigai tubuon naton in Lais. Kami in minayádon intua, bo inontongdon nami kon butánea in mopia, mooḷad bo nooyúon, bayongan in yagi-yagi komintan oyúon. Dika tongá umuran kon naa bo kibio-biómai. Koḻikatdon mayá intua bo mogagow kon butá tatua. Kobayáanmai monimu yo intau mita kon tua in diábí mosangka-sangka kon mosia in tubuon. Noyakin bidon in kami kon ki Allah in nobogoi bidon in butá tatua kon i monimu.”

¹¹Tuamai, in pobuatdon nongkon Zora bo Eshtaol in 600 in intau nongkon suku Dan. Takin pakakat mita in parang inta notouḷut,

¹²mosia in minayá kon dotá in toyopan kon Kiryat-Yearim kon butá in Yohuda bo nononḷoḷaigan kon tua. Tuamai in tampat tatua tantúpa sinangoian Pinononḷoḷaigan i Dan.

¹³Nongkon tua minayá in mosia ná buḷud in Epraim nodapot kon baḷoi i Mikha.

¹⁴Intau toimata taya ḻima inta muna pinotabá tatua noguman kon yobayatnea mita, “Bá kotaauandon monimu kon baḷoi tobatú kon naa oyúon in patong inta inaipan in saḷaka! Oyúon doman in patong mita ibanea bo epod. Raika mongo onu in musti pomiaan naton.”

¹⁵Bo mosia minayá in baḷoi i Mikha, baḷoi inta pinogutunan in tayowmobiag in Lewi tatua, bo noḻibó kon kaadaannea.

¹⁶Kon dodai intua tontara in suku Dan inta onom nogatut, inta nodia kon pakakat mita in parang inta notouḷut, sinimindogdon mako kon tayowon in ngara moḷoben.

¹⁷Toimata taya ḻima tatua bayá-bayádon sinumuot kon baḷoi, bo nogamá kon patong kayu inta inaipan in saḷaka tatua takin patong mita ibanea, bo epod. Tayowmobiag in Lewi tatua in sinimindogdon mako takin tontara mita onom nogatut inta kon ngara moḷoben.

¹⁸Naonda in intau ḻima tatua sinumuot kon baḷoi i Mikha bo nogamá kon epod takin patong mita berhala tatua, tayowmobiag in Lewi tatua noḻibó, “Onu in pomiaan monimu tanaa?”

¹⁹Mosia in notubag, “Kibio-biómai! Dika moḻibó. Duduidon kon inami, bain mobaḻí in iko imang bo mononggina kon inami. Mopia-piabí kon mobaḻí imang kon tongosuku dika in tongá mobaḻí imang kon motoḷuadí tobatú!”

²⁰Nopia in gina in tayowmobiag tatua in nokodongog kon tosingogon tatua. Dá, nogamádon in sia kon epod bo patong mita berhala tatua bo dinumudui kon i monia.

²¹Onda intua paanan in intau mita tatua nongingguputdon kon bobayáan monia, mongoadí mita, bobiagon bo barang mita monia in kon muna.

²²Onda in noyayú in mosia, ki Mikha nogoiní kon topodiugnea mita bo noyotakin nogaḷow kon intau mita in suku Dan tatua. Naonda in nodiugdon kon i monia,

²³ki Mikha bo intaunea mita nomaḷúdon kon i monia. Intau mita in suku Dan tatua nobobui bo noḻibó kon i Mikha, “Onu in nobaḻí? Nongonu sin namangoibí takin intau mobayong naníon?”

²⁴Ki Mikha notubag, “Moiko nogamá kon patongku mita bo imangnea, nodapot in diádon koonu bo onu in akuoi, bo moiko in noguman, ‘Onu in nobaḻí!’ ”

²⁵Intau mita in suku Dan tatua noguman, “Maníka kibio-biómai; dika modapot in intau mita tanaa tumorú bo monubu kon inimu, bo iko takin bayongan in ginaḷummu mita matoi.”

²⁶Naonda in nosingog mako natua, intau mita in suku Dan nongingguputdon kon bobayáan monia. Naonda in inontong i Mikha kon mosia tua in moropo-ropot nongkon inia, dá nomurowdon in sia bo nobui.

²⁷Naonda in suku mita in Dan tatua nodia minayá kon imang tatua takin pakakat mita in ibada inta pinomia i Mikha tatua, minayá in mosia nonubu kon Lais, kotá inta intaunea mita nobiag noaman bo nobiag nooyúon. (Kotá tatua noiukat kon bonu in ḷopá tobatú takin kotá Bet-Rehob.) Intau mita in Dan tatua noḻimod kon bayongan in intau inta nogutun kon Lais bodongka nonurub kon kotá tatua. Diábí in namangoi notuḷung kon intau mita in Lais sin tampat monia tua in noitontaní bo noyayú nongkon Sidon. Nopaḷut mako kon tua intau mita in suku Dan noposindogdon bui in kotá tatua bo nogutun kon tua.

²⁹Tangoi in kotá tatua binaḷuian monia nobaḻí Dan, pinodudui kon tangoi in mogoguyang monia, inta ki Dan, adí i Yakub.

³⁰Patong berhala inta dinia monia tatua, pinosindog monia kon kotá tatua bo nopobaḻí kon i Yonatan, ki adí, i Gersom, ki ompu i Musa, nobaḻí imang monia. Buí i Gersom naa in umuran nobaḻí imang in suku Dan tatua nodapot kon tungkuḷ in umat Israel dinia bo iḷumbú kon butá intau ibanea.

³¹Patong berhala inta pinomia i Mikha tatua umuranbí kon Lais kon dodai in Ḷoḷaigan i Tuhan kon Silo.