Read Mongondow HAKIM MITA 20 Bible Online

HAKIM MITA 20 - Mongondow bible

HAKIM MITA 20

¹Dá namangoidon in bayongan umat in Israel nongkon Dan kon utuan nodapot in Bersyeba kon toḷatan, bo Gilead kon pomukaan, sin dumudui kon oiní tatua. Mosia in noyosipun bo notobatú kon Mizpa kon tayowon i TUHAN.

²Kobayong monia inta nosipun tatua in 400.000 in tontara inta minaya-mayá in sioḷ. Itoi mita nongkon batúan in suku bangusa in Israel noiangoi doman intua.

³Soaḷ tatua in kinodongogandon in intau mita kon suku Benyamin kon bayongan intau in Israel ibanea ain noyosipun kon Mizpa. Dá noḻibódon in intau mita in Israel tatua kon intau in Lewi inta ki buḷoinea ibanea minatoi pinogutú tatua, “Oumanka kon inami mongo naonda in kinobobaḻí in aid mita moraat tatua!” Intau in Lewi tatua notubag, “Akuoi bo ki buḷoiku ibanea tua in nongandup kon Gibea kon butá in Benyamin bo nosiug kon tua.

⁴

⁵Onda intua intau mita in Gibea namangoi wakutu in doḷom sin motayak kon inakó. Iḻipungdon monia in baḷoi inta pinongandupanku sin makusud moḻimod kon inakó, táe onda intua mosia in nomogutú kon i buḷoiku ibanea tatua nodapot in minatoi.

⁶Dá ginamákudon in mayatnea bodongka pinongko-pongkó bo pinoki dia in pongkóan mita tatua kon suku in bangusa naton inta mopuḷú bo doyowa tua, tumongo pongkó in tongo suku. Tua in pinomiaku sin intau mita in Gibea tua in nomiadon kon inta moraat bo mokopooyámai kon umat in Israel.

⁷Moiko komintan inta kon naa in intau mita in Israel. Dá raika in tanaa monimu!”

⁸Bo noyododaidon in intau mita inta noyosipun kon tampat tatua sinimindog bo noguman, “Kita komintan in diábí in mobui kon ḷoḷaigan ande kon baḷoi.

⁹Naa in pomiaan naton: Kita in mopogonik in undi sin monantú mongo ki ine mako in mayá monubu kon Gibea.

¹⁰Mopuḷú noporosen nongkon bayongan in ḷoḷaki kon Israel in musti moposadia in kaanon kon i monia inta mayá moparang. Ibanea in mayá monubu kon Gibea sin mohukum kon i monia popisí in aid monia inta moraat inta pinopoaid monia kon sigad in umat in Israel.”

¹¹Tuata in nobaḻí, umat in Israel notobatú sin monubu kon Gibea.

¹²Naonda in umat Israel nopotabádon kon intau mita minayá kon butá in suku Benyamin sin mopotaau in habar tanaa: “Aid moraat onu inta ain nobaḻí kon i monimu?

¹³Ogoidon in intau mita moraat nongkon Gibea tua kon inami sinbá ḻimodondon nami in mosia bo bá inggamáandon in aid moraat tatua kon sigad in Israel.” Táe intau in Benyamin in diábí nokidongogmai kon tosingogon in intau mita in Israel ibanea tatua.

¹⁴Sedang bo bayongan in intau mita in kotá kon butá in Benyamin tua namangoi kon Gibea sin momarang kon intau mita in Israel ibanea mako tua.

¹⁵Singgai tua mosia in nosipun nongkon bayongan in kotá monia in tontara mita 26.000 in kobayongnea. Bo koḻikud intua intau mita in Gibea tontaní ain nosipun kon 700 in intau inta ain piniḻí. Mosia tua in komintan mopomaké in ḻima koḷoigi inta mongotoyang mongantipol. Aka mosia mongantipol, yo diábí dodai in onda in moibandai.

¹⁶

¹⁷Bo kon intau mita in Israel ibanea aindon nosipun in 400.000 in tontara mita inta ain sinokotundú moparang.

¹⁸Tontara in umat in Israel tatua minayá in tampat pooibadaan kon Betel, bo noḻibó kon i Allah, “O TUHAN, suku táonda degá inta kon sigad nami naa inta kon dungkuḷ totok mayá monubu kon intau in Benyamin?” Ki TUHAN in notubag, “Suku in Yohuda.”

¹⁹Nopoikoḷomai doḷo-doḷom nobuatdon in mosia bo nononḷoḷaigan kon diug in kotá in Gibea.

²⁰Tontara mita monia in sinimindogdon kon tayowon in kotá tatua, bodongka nonubu.

²¹Dá tontara mita in suku Benyamin iḻumuai domandon bo nonubu bo noḻimod kon tontara in Israel kon singgai tua 22.000 in kobayongnea.

²²Popisí in kinotaḷowan tatua, dá minayádon in umat Israel kon tampat pooibadaan bo nongombaḷ kon i TUHAN kon tua nodapot in doḷom. Mosia noḻibó, “TUHAN, degá buipa mayá in kami monubu kon i utat mita nami intau mita in Benyamin tatua?” Ki TUHAN in notubag, “Oo, bayádon.” Tuamai in tontara mita in Israel buidon noropot in gina, dá mosia in buidon noposadia in tontara monia ná kon singgai dungkuḷ.

²³

²⁴Kon induaneadon in mosia in minayá nonubu kon tontara in suku Benyamin tatua.

²⁵Bo kon induanea domandon in intau mita in suku Benyamin iḻumuai nonubu. Kon tanaa mosia noḻimod kon tontara mita in Israel 18.000 in kobayongnea.

²⁶Dá buidon minayá in umat in Israel kon Betel bo nongombaḷ kon i TUHAN. Kon tua in mosia nopuasa nodapot in doḷom noposumba in kuruban pondamean bo kuruban payongon kon i TUHAN.

²⁷Kon dodai in intua Poti Dodandian i Allah kon Betel, bo ki Pinehas ki adí i Eleazar, ompu i Harun, in nogaid kon oaidan saḷaku imang. Dá noḻibódon umat in Israel kon i TUHAN, “TUHAN, degá mustipa in kami mayá monubu kon i utat mita nami intau mita in Benyamin tatua, ande degá gogaiandon nami in parang tanaa?” Ki TUHAN in notubag, “tubudon in mosia! Ikoḷom popountungkudon in moiko nongkon i monia.”

²⁸

²⁹Nokodongogmai kon tubag i TUHAN natua, intau mita in Israel nopotabádon kon tontara mita monia kon tampat mita inta noiadop kon Gibea.

³⁰Bo kon singgai nogintoḷu mosia nonubu kon tontara in suku Benyamin takin pipidan in tontara sinumayow kon Gibea ná inta inaidan monia kon singgai mita muna.

³¹Intau mita in Benyamin nonubu doman, bo kino kailandon monia iḻumuai in kotá. Ná inta ain nobaḻí muna, mosia momangkoidon noḻimod kon intau mita in Israel kon tampat mita inta nosimbanat kon ḷuai in kotá kon daḷan inta nopobayá ná Betel bo kon daḷan inta nopobayá ná Gibea. Toḷu nopuḷúdon intau in Israel in kinoḻimodan.

³²Tuamai intau mita in Benyamin norai kon sinaḷowdon monia in intau mita in Israel ná kon singgai mita muna. Táe tontara in Israel ain nonomayá umundok sin mongail kon tontara in Benyamin tatua mayá in daḷan mita moḷoben, moyayú kon kotá.

³³Naonda in tontara in Israel inta ḷontúnea inumundok bo nogator bui kon pipidan in tontara kon Baal-Tamar, intau mita monia inta sinampat kon diug in Gibea, baḷúdon iḻumuai kon tampat pinogadopan monia kon butá inta kon ḷuai in kotá.

³⁴Mosia tua in intau mita inta sinoko piniḻí nongkon bayongan in intau in Israel; kobayong monia tua in 10.000. Bo nobaḻídon in parang inta totok in motoyang kon dodai in intau inta 10.000 tatua nonubu kon Gibea. Intau mita in Benyamin in diábí noirai kon diádon moonggot bo taḷowon in mosia.

³⁵Ki TUHAN nopountungdon kon intau in Israel nongkon intau mita in Benyamin, dá kon singgai tatua intau in Israel nokoḻimod kon 25.100 in tontara mita in Benyamin.

³⁶Bain tua bo intau mita in Benyamin nonotaaudon kon sinaḷowdon in mosia. Tontara in Israel inta ḷontú mita in sinumuod bidon noḷagui kon intau mita in Benyamin sin mosia in nopongatadon kon intau mita monia inta kon tampat pinogadopan mita monia kon diugmai in Gibea.

³⁷Intau mita inta nogadop tatua in iḻimikatdon sinumuot bo nonubu kon Gibea; mosia in irumangkap kon bayongan in tampat kon bonu in kotá bo noḻimod kon bayongan in intau kon tua.

³⁸Táe mosia in muna bidon noyopakat kon aka oyúondon in poyok mobunod kon bonu in kotá,

³⁹yo tontara mita inta ḷontú inta inumundok tua in mustibí momurow bo monubu kon musung. Kon dodai intua intau mita in Benyamin ain noḻimod kon 30 in tontara in Israel bo kai monia kamai mosia in nonaḷow bidon kon intau mita in Israel ná kon singgai mita muna.

⁴⁰Táe daḻídon in poyok nomangkoi nomonik nongkon yua-yuak in kotá in Gibea. Intau mita in Benyamin noitaḻikokog naonda in mosia nobobui bo nokoontong kon bayongan in kotá monia nopokak.

⁴¹Bo kon dodai doman intua tontara mita ḷontú in Israel nomurowdon bo nonubu, dá tontara in Benyamin mita tatua noḻingúdon sin kinotaauandon monia kon taḷowondon in mosia.

⁴²Dá, noḷaguidon in mosia nongkon intau mita in Israel nopobayá ná padang gurun, táe diá in mosia nokoḷagui. Kinokopungandon in mosia in tontara mita ḷontú in intau Israel bo tontara mita inta kon dodai intua koyogotdon mopoangoi nongkon kotá. Sinaḷowdon totok in intau in Benyamin.

⁴³Intau mita in Israel noḻibut bo nondudur kon i monia nodapot kon tampat tobatú kon dotá in pomukaan kon Gibea. Kodudu-dudur in mosia, koḻimo-ḻimod domandon

⁴⁴bo noḻimodon in mosia kon 18.000 in tontara in suku Benyamin inta mongopandoi moparang.

⁴⁵Tontara in Benyamin ibanea nomurow bo noḷagui nongin padang gurun nopobayá ná buḷud mita batu kon Rimon. Ḻima noribu in kon sigad monia tua in iḻimod kon yuak in daḷan. Ibanea in dinuduran nodapot in Gideom.[20] Bo nongkon intau mita tatua 2.000 in iḻimod.

⁴⁶Dá, tontara in Benyamin inta iḻimod singgai tua in 25.000 in kobayongnea — komintan tontara inta motorindog bo mobarani.

⁴⁷Táe kon sigad monia inta noḷagui nongin padang gurun nopobayá ná buḷud mita batu kon Rimon 600 in nokoḷagui. Mosia in nogutun kon Rimon opat nobuḷan in koonggotnea.

⁴⁸Onda intua intau in Israel bui minayá bo nonubu bo noḻimod kon bayongan in ki agat in intau mita in Benyamin — ḷoḷaki, bobay, adí mita bo bobiagon doman. Bayongan in kotá kon butá tatua sinurub monia.