Read Mongondow HAKIM MITA 21 Bible Online

HAKIM MITA 21 - Mongondow bible

HAKIM MITA 21

¹Kon tungkuḷ in intau in Israel noyosipun kon Mizpa, mosia in nodandidon kon i TUHAN kon diábí in tobatúmai in kon sigad monia in mobogoi kon i adí monia bobay inta pobuḷoion in intau in Benyamin.

²Tanaa in mosia minayá in Betel bo iḻimitú nopongoibú in gina nodapot in doḷom kon tayowon i Tuhan. Mosia in nongombaḷ bo nokuani,

³“O TUHAN, Allah in Israel, nongonu sin bayongan in naa in mustibí mobaḻí? Suku i Benyamin, suku tobatú kon bangusa nami, gogiódon in moputú!”

⁴Nopoikoḷomai kon singgai, subupa totok, umat in Israel noposindogdon in mezbah kon tua, bodongka noposumba kon i TUHAN in kuruban payongon bo kuruban pondamean.

⁵Onda intua mosia nonaridi kon sigad in suku mita in bangusa Israel mongo oyúon in diá minayá noyosipun sinumayow kon i TUHAN kon Mizpa in koḻipod. (Kon dodai intua mosia ain nongibot kon intau inta doí nokidongog kon oiní mayá in Mizpa musti hukumon matoi.)

⁶Umat in Israel notabi kon i utat mita monia suku in Benyamin; mosia noguman, “Singgai in naa Israel kinobuḻiandon in sukunea tobatú.

⁷Popisí in kita ain nongibot kon i TUHAN kon kita in diábí motaau mobogoi kon i adí naton bobay pobuḷoion intau in Benyamin, dá onu in pomiaan naton sinbá ki agat intau in Benyamin tanaa mokouḻípa kon buḷoi?”

⁸Dá sinarididon monia mongo oyúon in tobatúmai in inanakan nongkon suku bangusa in Israel inta diá minayá noyosipun kon Mizpa. Bo noniata magí monia dá intau mita in Yabesh kon Gilead, diá tobatúmai in minayá kon Mizpa.

⁹Sin, naonda in sinaridimai in tangoi in intau mita inta noiangoi, noniata magí yo diá in tobatúmai in intau nongkon Yabesh in kon tua.

¹⁰Tuamai, intau mita inta noyosipun kon Betel tatua nopotabá in intau 12.000 inta totok in mobarani kon sigad monia sin moḻimod kon bayongan in intau kon Yabesh, potakin doman in bobay bo mongoadí mita.

¹¹Mosia in pinarentaan sin moḻimod kon bayongan in intau ḷoḷaki, bo bayongan in bobay inta ain nokoimontandon nosiug takin ḷoḷaki.

¹²Dá kon sigad in intau mita inta nogutun kon Yabesh tatua, nouḻí monia in mongodeaga 400 in kobayongnea inta diápa nosiug takin ḷoḷaki. Dinia monia in mongodeaga mita tatua kon pinononḷoḷaigan monia kon Silo inta noiukat kon butá in Kanaan.

¹³Onda intua bayongan in umat in Israel nopotabá in intau minayá kon intau mita in Benyamin inta kon buḷud mita batu kon Rimon sinbá moyodamedon.

¹⁴Tuamai intau mita in Benyamin tatua nobui, bo umat in Israel nobogoidon kon i monia in mongodeaga mita nongkon Yabesh inta diá iḻimod tatua. Táe diá tugat kon intau mita in Benyamin in mongodeaga mita tatua.

¹⁵Umat in Israel notabi kon intau in Benyamin, sin ki TUHAN ain nomoguyaat kon pinonobatúan in suku mita in bangusa Israel.

¹⁶Manangka intua, intau mita inta sinon itoi inta noyosipun kon Betel tatua noguman, “Kon bonu in suku in Benyamin diádon in bobay. Táe, onu in pomiaan naton; diábí motaau in kita mobogoi in adí mita naton bobay pobuḷoion monia, sin initu-itumandon naton in intau mita inta kon sigad naton kon diábí in motaau in mopotonibuḷoi in adínea mongodeaga kon intau in Benyamin! Dá, onu in musti pomiaan naton kon i monia inta diápa nokouḻí kon buḷoi sinbá mokouḻípa doman in mosia kon intau pobuḷoion monia? Dika modapot in Israel kobuḻian in suku tobatú inta kon sigad in suku mopuḷú bodoyowá tanaa. Musti in kita motayak kon daya sinbá suku in Benyamin umuranpa mokouḻí kon buí bo tantúpa doman mogutun kon butá monia.”

¹⁹“Nanaa,” guman monia, “oyúon in daḷannea, oḷatdon kon dodai in poramean taongan kon i TUHAN kon Silo.” (Kon dotá in toḷatan Silo tanaa oyúon in kotá in Betel, bo kon dotá in toyopannea oyúon in daḷan moḷoben in Betel mopobayá ná Sikhem, bo kon dotá in utuannea oyúon in kotá in Lebona.)

²⁰Dá intau mita inta sinon itoi kon pinoyodungkuḷan kon Betel tatua in noguman kon intau mita in Benyamin inta ki agatnea tatua, “Bayádon in moiko pogadop kon gobá mita in anggur kon Silo,

²¹bo poḷukadon kon tua. Bain aka mongodeaga mita in Silo ḷumuai sin momanari kon dodai in poramean taongan kon i TUHAN, moiko in mustidon ḷumuai nongkon gobá mita in anggur tatua. Bo kon batúannea in mustidon modomok kon mongodeaga tumongobatú kon sigad monia bo diaan monimu poḷagui kon butá in Benyamin sin baḻíon ki buḷoimu.

²²Aka ki amá ande ki utatnea ḷoḷaki mamangoi bo monuntut kon inia, moiko[21] motaau moguman, ‘Poigumon nami, pomayádon mako in mosia kon inami. Diábí inagow nami in mosia kon parang. Bo popisí in moiko diá mobogoi kon i monia kon inami, dá moiko in diábí iḻimimpat kon dandi, dá diábí kotaḷá.’ ”

²³Dá intau mita in Benyamin tatua nomiadon kon onu in pinoguman kon i monia. Kon batúan monia in nopoḷagui in mongodeaga tumongo batu kon sigad in mongodeaga mita inta nomanari kon Silo. Onda intua mosia in nobui kon butá monia tontaní bo noposindog bui in kotá monia bo nogutun notantú kon tua.

²⁴Intau mita in Israel inta ibanea tatua nobuat domandon. Mosia in nobui kon butá monia tontaní inta kon wilayah monia tontaní podudui in inanakan bo sukunea-sukunea.

²⁵Kon dodai intua diápa in datu kon Israel. Batúan in intau mogaid kon onu in irainea noitutui.