Read Mongondow HAKIM MITA 3 Bible Online

HAKIM MITA 3 - Mongondow bible

HAKIM MITA 3

¹Sin makusud monungkuḷ kon bangusa mita in Israel inta diá kon dodai in onda noparang kon Kanaan, pinomayá mako i TUHAN in tongonumai in bangusa nogutun kon butá tatua.

²Pinomia i TUHAN intua tongábí makusud motundú kon bayongan in intau mita topobiagan kon Israel moparang, inta dungkuḷ totok in mosia inta diápa kon dodai in onda sinumakin noparang.

³Bangusa mita inta nogutunpa kon butá tatua in bangusa inta nogutun kon ḻima in kotá in Pilistin, bayongan in bangusa Kanaan, bangusa Sidon, bo bangusa Hewi inta nogutun kon buḷud in Libanon, pinangkoi kon Buḷud in Baal-Hermon nodapot kon daḷan inta nopobayá in Hamat.

⁴Mosia in kon tuapa sin mobaḻí totungkuḷ kon bangusa in Israel. Takin natua dá kotaauandon mongo bangusa in Israel dinumuduipa kon parenta mita inta ain inogoi i TUHAN kon mogoguyang monia pinongin i Musa.

⁵Tuamai intau mita in Kanaan, Het, Amori, Peris, Hewi bo Yebus umuranpa nogutun mako kon butá tatua noyotakin in umat in Israel.

⁶Umat in Israel noyobuḷoidon magí-mako in bangusa mita tatua, bo sinumakindon nosumba kon dewa mita monia.

⁷Umat in Israel binaradosa kon i TUHAN, ki Allah monia. Mosia nokoḻiong kon i-Nia nodapot in mosia nosumbadon kon berhala mita i Baal bo i Asyera.

⁸Dá ki TUHAN sinumorú kon umat in Israel, bo pinomayá-Neadon mako in mosia sinaḷow i Datu Kusyan-Risyataim nongkon Mesopotamia. Waḷu notaong in koonggotnea in datu tatua nongawasa kon i monia.

⁹Onda intua umat in Israel nokuani nokituḷung kon i TUHAN, bo inogoi i TUHAN in ki Otniel sin mopoḷuat kon i monia. (Ki Otniel ki adí i Kenas, inta ki ai-ai i Kaleb.)

¹⁰Sia in kinawasa in Roho i TUHAN dá sia in nobaḻí itoi kon umat in Israel. Sia in minayá noparang, bo pinopountung i TUHAN in sia nongkon datu in Mesopotamia.

¹¹Dá nobiagdon noaman bo notompia in butá tatua kon bonu in opat nopuḷú notaong in koonggotnea. Onda intua minatoidon in ki Otniel.

¹²Umat in Israel buidon binaradosa kon i TUHAN, dá binaḻídon i TUHAN in ki Eglon, datu in Moab, moropo-ropot nongkon Israel.

¹³Datu in Eglon dinumugang kon bangusa in Amon bo Amalek, bo nonaḷow kon intau in Israel, bo nogagow kon Yerikho, kotá in kurma tatua.

¹⁴Mopuḷú bo waḷu notaong in koonggotnea umat in Israel nobiag sinonggata i Eglon.

¹⁵Táe naonda in umat Israel nokuani nokituḷung kon i TUHAN, inogoi i TUHAN in ki Ehud sin nopoḷuat kon i monia. Ki Ehud naa in ḻimanea koḷoigi in moropot; sia in ki adí i Gera nongkon suku Benyamin, bo sia tua inta biasamai mogatod kon i Datu Eglon kon iba inta musti uboḻian in umat in Israel.

¹⁶Kon singgai tobatú ki Ehud nonontaḷ kon pitow inta noḷanit kon posiḷosi inta kobanatnea in gogió bo tongobotak in meter. Pinogabitnea in pitow tatua kon dotá in koḷanan tongá pinopobuninea kon ḷambungnea,

¹⁷Bo minayá nobogoi in iba in umat israel kon i datu Eglon. Ki datu tatua in moḷongó totok.

¹⁸Naonda in nobogoi mako kon iba tatua, ki Ehud nopotabádon kon intau mita inta nomotaan kon doit buḷawan tatua nobui.

¹⁹Táe ki Ehud tontaní in nogogai naonda in nodapot in batu mita inta sinokokurig kon diug in Gilgal, bo nobui minayá kon i Eglon. Kon dodai intua ki Eglon kon bonu in gopot inta moonow kon ḷundukan kon ḻimonik in komaḻignea. Guman i Ehud kon i Eglon, “Tuangku Inta Momulia! Ki atamu naa in nodia kon habar inta tongá ki Tuangku in motaau monotaau.” Dá ki datu noguman, “Oḷatpa muna,” bo sia nopotabá kon bayongan in bobantungnea iḻumuai nonaḷámai kon inia bo kon i Ehud. Onda intua, ki Ehud dinimiug kon i datu inta iḻimitú mako, bo noguman, “Oyúon in habar nongkon i Allah kon i Tuangku!” Nokodongogmai kon natua, sinimindog in ki datu.

²¹Bo baḷúdon irabut i Ehud in ḻimanea koḷoigi in pitownea inta kon ogotannea dotá in koḷanan, bo pinonumbuknea kon sian i datu. Mata in pitow tatua nodait noibonu kon ḷongó mita in sian i datu tatua, nodapot in noiḷambai kon ḻikud. Diadon i rabut i Ehud in pitow tatua kon sian i datu,

²³bo iḷumuaidon in sia poḷat nongunsí kon ḷoḻingkop in gopot tatua,

²⁴bodongka minayá. Naonda in bobantung mita i datu namangoi bo noindoimai kon ḷoḻingkop mita in gopot sinoko kunsían, dá kai monia kamai ki datu in kon bonuneapabí sin mointaḷú.

²⁵Naonda in noonggotdon in pinogoḷatan monia bo ki datu in diá doman nomukat kon ḷoḻingkop, notoboḻingo in mosia bo nogamá kon kokunsi bo nomukat kon ḷoḻingkop tatua. Noniata magí yo ki datu monia tua in noiukatdon mako kon taḷog sin minatoidon.

²⁶Koyogotpa in mosia mogoḷat mako, ki Ehud noḷaguidon minayá ná Seira nongin batu mita inta kinurig.

²⁷Naonda in nodapot kon buḷud in Epraim, sia in nogirup kon torompet sin mogoiní kon intau in Israel moparang. Mosia in namangoi bo dinianea in mosia nosiḻig kon buḷud tatua.

²⁸“Dudui kon inakó,” gumannea kon i monia, “Ki TUHAN ain nonaḷow kon intau mita in Moab, mosia kon bonudon in kawasamu.” Dá kon bonu in tongganut i Ehud, nosiḻigdon in intau mita in Israel tatua nongkon buḷud. Mosia in nogagow kon ḷoḷoḷanan in intau in Moab kon Ongkag in Yordan. Diá in tobatúmai in musung mita tatua pinomayá mako iḷumoḷan takin nosaḷamat.

²⁹Kon pinoparangan tatua mosia noḻimod kon intau degá 10.000 in tontara in Moab inta mongopia moparang; diá in nokoḷagui.

³⁰Singgai intua Moab sinaḷow in Israel, dá noaman bo nobiagdon notompia in butá tatua waḷu nopuḷú notaong in koonggotnea.

³¹Itoi noiduduimai kon tua in ki Samgar ki adí i Anat. Sia in totok doman in irumopot nopoḷuat kon intau in Israel. Takin nomaké in tungkud pobobuntun kon sapi, sia noḻimod kon 600 in intau in Pilistin.