Read Mongondow HAKIM MITA 7 Bible Online

HAKIM MITA 7 - Mongondow bible

HAKIM MITA 7

¹Kon singgai tobatú ki Gideon takin intaunea mita nobangon nododop totok. Mosia minayá bo nononḷoḷaigan kon diug in bokaká in tubig in Harod. Pinononḷoḷaigan in intau in Midian kon dotá in utuan nongkon i monia, kon ḷopá kon diug in Buḷud in More.

²Ki TUHAN noguman kon i Gideon, “Intaumu mita noiḻiudon in antó. Doíbí in Akuoi mopountung kon i monia nongkon intau in Midian, sin dikabo mosia morai kon nountung in mosia sin ropotbí monia tontaní, dá doí in mosia modayow kon i-Nakó.

³Dá, potaaudon kon intaumu mita, ‘Ki ine in moondok, yo musti ḷagi monaḷámai kon Buḷud in Gilead tanaa bo mobui kon baḷoinea.’ ” Dá 22.000 intau in nobui; bo tongádon 10.000 in kon tua.

⁴Bo ki TUHAN noguman kon i Gideon, “Noantópabí doman totok in intaumu nion. Diadon in mosia mayá in ongkag. Bain kon tua bo piḻíon-Ku in mosia bo ogoi kon inimu. Aka Akuoi moguman kon inimu, ‘Intau tanaa in musti mayá takinmu,’ yo sia in mustibí mayá. Táe aka Akuoi moguman, ‘Intau tanaa in diá motaau mayá takinmu’ yo diábí doman motaau in sia mayá.”

⁵Dá dinia i Gideon in intau mita tatua minayá in ongkag, bo ki TUHAN noguman kon i Gideon, “Intau mita inta nodilá kon tubig naonda bo ungkú, musti poyotondíonmu nongkon intau mita inta sinumungkud bo nonginum.”

⁶Dá 300 in intau in noponayuk in ḻima monia kon tubig bo dinilá; bo ibanea mita in sinumungkud bo nonginum.

⁷Onda intua ki TUHAN noguman kon i Gideon, “Takin 300 in intau inta nodilá kon tubig tatua, Poḷuaton-Kudon in moiko bo pountungon-Ku kon intau mita in Midian. Pokipobuiaidon in ibanea nion.”

⁸Tuamai in pinoki pobuiandon i Gideon in bayongan intau in Israel ibanea koḻikudon in toḷu nogatut tatua. Bayongan in tongkaaḷ bo torompet ginamádon nongkon intau mita inta nobui tatua. Intau in Midian kon ḷopá inta kon ḻimonaganmai in inta pinononḷoḷaigan in intau in Israel.

⁹Doḷom tua ki TUHAN noguman kon i Gideon, “Pobangon, Gideon! Bayádon tubu in pinononḷoḷaigan in intau in Midian. Popountung-Kubí in iko nongkon i monia.

¹⁰Táe aka iko moondok, dá anutaidon in ki Pura, bobantungmu tua mayá moyotakinmu kon pinononḷoḷaigan in musung.

¹¹Kodongoganmubí in onu in yosingogon in musung, bo tua in mokopomukádon kon baranimu monubu.” Bo minayádon in ki Gideon takin ki Pura, kon pinosigadan in pinononḷoḷaigan in musung.

¹²Intau in Midian, Amalek bo intau mita ibanea nongkon padang gurun, noibaya-bayádon mako kon ḷopá tatua. Koontongan in nádon onda bo pangkoḷá inta noyosipun. Unta mita monia mobarong totok naonda bo bungaion kon pintad.

¹³Naonda in ki Gideon nodapot in tua, sia nokodongog kon intau tobatú nongonguman kon togoindopnea kon yobayatnea. Intau tatua noguman nanaa, “Akuoi in sinumogoindop kon oyúon in roti tobatú noḻiḻid bo noituot kon pinononḷoḷaigan naton bo noitaḻib kon ḷoḷaigan tobatú. Ḷoḷaigan tatua noumpag nodapot in notondodaidon in butá.”

¹⁴Tubag in yobayatnea, “O, tua in notantú bidon kon pitow i Gideon ki adí i Yoas, intau in Israel tatua! Mangaḻenea, kon ki Allah ain nopountung kon inia nongkon intau in Midian bo bayongan in tontara naton!”

¹⁵Naonda in kinodongogan i Gideon in togoindop in intau tatua takin mangaḻenea, dá sia sinumungkudon bo nosumba kon i Allah. Onda intua sia nobuidon kon pinononḷoḷaigan in intau Israel bo noguman, “Posadiadon! Ki TUHAN in mobogoidon in kauntungan kon inimu nongkon tontara mita in intau in Midian!”

¹⁶Bo sinilaidon i Gideon in intaunea inta toḷu nogatut tatua nobaḻí toḷu notonsilai. Kon batúannea inogoian in torompet bo kendi tobatú inta binonuan in poḷombow.

¹⁷Guman i Gideon kon i monia, “Aka akuoi in moyaputdon kon posigadan pinononḷoḷaigan in intau in Midian, yo taridiai totok in akuoi kopia, bo duduiai onu in aidanku.

¹⁸Aka akuoi takin intauku mita mogirupdon kon torompet, yo moiko in musti mogirup domandon kon torompetmu. Bo moiko in musti mayá kon ḻibumai in pinononḷoḷaigan tatua bo pomaḷú nanaa, ‘Kon i TUHAN bo kon i Gideon!’ ”

¹⁹Naonda in nopangádon kon doḷom, ki Gideon bo intaunea mita nodapotdon kon posigadan pinononḷoḷaigan in musung. Kon dodai intua intau inta noḷukad kon pinononḷoḷaigan tatua, bagu noyoḷuan kon poḷukadan. Bo ki Gideon takin intaunea nogirup kon torompet bo noḷosi kon kendi mita monia.

²⁰Doyowa nopaanan ibanea in dinumudui domandon nomia kon natua. Bo mosia in notonggódon komintan kon poḷombow mita monia takin nomaké in ḻima monia koḷoigi, bo nogirup kon torompet inta kon ḻima monia koḷanan. Mosia nomaḷú, “Kedang kon i TUHAN bo kon i Gideon!”

²¹Mosia komintan in umuranpabí sinimindog mako kon sinindogan monia tontaní inta kon ḻibumai in pinononḷoḷaigan tatua. Dá bayongan in tontara in musung tatua noroḷaguidon sindaḷan kinumarak.

²²Naonda in ki Gideon bo intaunea mita koyogotpa in nogirup kon torompet, pinoporopatoi i TUHAN in tontara in musung takin nopomaké in kedang monia tontaní. Mosia noḷagui nopobayá ná Zerera nodapot kon Bet-Sita bo kon kotá in Abel Mehola kon diug in Tabat.

²³Dá suku i Naptali, i Asyer, bo suku i Manasye, pinomayá inta kon dotá in pomukaan andeka inta kon dotá in toyopan kon Ongkag in Yordan inoiní doman. Bo mosia nondudur kon tontara in intau in Midian.

²⁴Bo kon bayongan doman in butá kon buḷud in Epraim, ki Gideon nokidia doman in tongganut tanaa, “Koḻigai mosiḻig bo momarang kon intau in Midian. Ḷukadaidon in Ongkag in Yordan bo bayongan in tapánea modapot kon Bet-Bara. Dika pomayá mako in intau in Midian ḷumoḷan kon tua.” Dá intau mita in Epraim inanutan domandon, bo mosia in noḷukad kon Ongkag in Yordan bo bayongan in tapá nodapot in Bet-Bara.

²⁵Doyowa in itoi intau in Midian, inta ki Oreb bo ki Zeeb in dinomok monia. Ki Oreb iḻimod kon Batu Oreb bo ki Zeeb in iḻimod kon pomomugutan kon anggur i Zeeb. Intau mita in Epraim tatua umuran nondudur kon intau in Midian, bo nodia kon uḷu i Oreb bo i Zeeb kon i Gideon kon ḷoḷan in Yordan kon dotá in pomukaan.