Read Mongondow HAKIM MITA 8 Bible Online

HAKIM MITA 8 - Mongondow bible

HAKIM MITA 8

¹Intau in Epraim noguman kon i Gideon, “Nongonu sin kami in diábí inanutan kon tungkuḷ in iko nobuat sin mayá monubu kon intau in Midian? Nongonu sin pinomiamubí natua in kami?” Natuata in unsingog monia kon i Gideon.

²Táe ki Gideon in notubag, “Onu in pinomiaku diábí totok in moḷoben in mangaḻenea aka poyobandingonmai in onu inta ain pinomia monimu. Umpaka inta pinomia monimu tua tongá topiḻik, táe inta topiḻikbí tua in moḷobe-ḷoben in mangaḻenea nongkon bayongan inta ain inaidan in tontara nongkon inanakanku.

³Moikobí nion in nokouḻí kon kawasa nongkon i Allah dá nokoḻimod kon i Oreb bo kon i Zeeb, itoi doyowa in intau Midian tua! Aka poyobandingonmai intua yo onubí in mangaḻe in aidku naa?” Naonda in ki Gideon noguman natua, mosia diádon sinumorú bui.

⁴Kon dodai intua ki Gideon takin intaunea inta toḷu nogatut nodapotdon kon ḷoḷan in Ongkag in Yordan. Mosia noḷopídon totok táe umuranpa doman nondudur kon musung.

⁵Onda intua mosia nodapotdon in Sukot. Kon tua ki Gideon in noguman kon intau inta nogutun kon kotá tatua, “Tuḷungaipa ogoiai in kaanon topiḻikmai in intauku mita tanaa. Mosia in moḷopídon totok tongá kami in mustipa mogaḷow kon i Zebah bo kon i Salmuna, datu mita in Midian tua.”

⁶Táe itoi mita kon Sukot tatua noguman, “Ah, moiko nion in diápabí nokodomok kon i Zebah bo kon i Salmuna, bo moiko in muna bidon moigum kon kaanon! Onubí in mangaḻe in pobogoian kon kaanon kon intaumu mita?”

⁷Dá ki Gideon noguman, “Mopia! Aka popountungdon i TUHAN in akuoi nongkon i Zebah bo kon i Salmuna, yo moiko in sambokonkudon in dugi bo bonganga nongkon padang gurun!”

⁸Onda intua ki Gideon nongingguputdon kon bobayáan bo nodapot kon Pnuel. Kon tua in sia noigum doman kon kaanon sin ogoi kon intaunea mita. Táe tubag in intau in Pnuel ná doman tubag in intau in Sukot.

⁹Tuamai in ki Gideon noguman kon i monia, “Bain mobui mangoi in akuoi takin saḷamat. Bo kon dodai intuata bo umpagonkudon in ḷangkeang in kotá tanaa!”

¹⁰Kon dodai intua ki Zebah bo ki Salmuna takin bayongan in tontara monia kon Karkordon. Nongkon bayongan in tontara in intau mita kon padang gurun, dongkadon degá 15.000 in intau in kiagatnea; 120.000 in tontaranea in minatoidon.

¹¹Ki Gideon minayá nongin posigadan in padang gurun kon dotá in pomukaan Nobah bo Yogbeha bo dongka daḻí nonubu kon musung.

¹²Ki Zebah bo ki Salmuna, datu doyowa in intau in Midian tatua noḷagui, táe inaḷowan i Gideon bo poḷat dinomoknea in taya dua tua, dá bayongan in tontara monia notoboḻingodon.

¹³Onda intua kon binayáan monia nobui nongkon pinoparangan, ki Gideon nongin daḷan inta tumaḻib kon ponakodan kon Heres.

¹⁴Kon tua in sia nodomok kon tayowmobiag tobatú inta nongkon Sukot, bo iḻibónea kon tayowmobiag tatua in tangoi mita in itoi mita kon Sukot. Dá pinais in intau tatua in tangoi in itoi mita tatua bo inogoinea kon i Gideon — kobayongnea in pitu nopuḷú bo pitu komintan.

¹⁵Nopaḷut mako kon tua ki Gideon minayá nokipodungkuḷ kon itoi mita kon kotá tatua bo noguman, “Tantú kinotoropanpabí monimu kon pernadon in moiko in doí notuḷung kon inakó, sin diápa noaḷapku in ki Zebah bo ki Salmuna, natua degá ma? Moiko in doí nobogoi in kaanon kon intauku mita; bokaka mosia in totokdon in moḷopí tungkuḷ intua. Indoiai, naa in ki Zebah bo ki Salmuna.”

¹⁶Onda intua ki Gideon nogamá kon dugi bo bonganga nongkon padang gurun, bo nosambok kon itoi mita kon kotá in Sukot tatua.

¹⁷Kon Pnuel inumpagnea domandon in ḷangkeang bo noḻimod kon bayongan in intau ḷoḷaki kon kotá tatua.

¹⁸Nopaḷut mako kon tua ki Gideon noḻibó kon i Zebah bo kon i Salmuna, “Naonda in batangan in intau mita inta iḻimod monimu kon Tabor tua?” Ki Zebah bo ki Salmuna notubag, “Mosia tua in komintanbí notombatanganmu, naonda bo buí in intau mita moḷoben.”

¹⁹“Mosia tua in ki utatku mita — ki adí mita i ináku,” guman i Gideon. “Aka kuma bo diá iḻimod monimu in mosia, yo totuu kon diábí doman ḻimodonku in moiko.”

²⁰Bo ki Gideon noguman kon i Yeter, ki adínea guya-guyang, “Ḻimodon in mosia!” Táe ki Yeter in nobagupa. Dá, noondokpa in sia nodapot in sia diá norabut kon kedangnea sin moḻimod.

²¹Ki Zebah bo ki Salmuna noguman kon i Gideon, “Koḻigai, aka iko ḷoḷaki, yo ikodon tontaní in moḻimod kon inami!” Dá iḻimodon i Gideon in mosia bo poḷat ginamánea in ḷambá inta kon sigogow in unta monia.

²²Onda intua umat in Israel nogumandon kon i Gideon, “Iko in aindon nopoḷuat kon inami nongkon kawasa in intau in Midian. Tuamai in ikodon in mobaḻí itoi nami — iko bo buímu.”

²³Tubag i Gideon, “Diá. Akuoi in diábí mobaḻí itoimu; ki adíku doman in diábí. Ki TUHANbí in itoimu.”

²⁴Tongá noiduduimai kon tua ki Gideon noguman nanaa, “Tongá tobatú in igumonku; nganti-nganting inta inagow monimu kon musung, ogoidon komintan kon inakó.” (Intau in Midian nobiasa mogi nganti-nganting buḷawan; ná doman intau ibanea inta nogutun kon padang gurun.)

²⁵“Mopia,” tubag monia, “takinbí pia in gina mobogoi intua kon inimu.” Bo nobuká in mosia kon kaeng tobatú, onda intua kon batúan in intau namangoi nogukat kon tua kon nganti-nganting inta ain inagow monia nongkon musung.

²⁶Bayongan in nganti-nganting buḷawan inta inogoi kon i Gideon dodai intua kobogatnea in gogió bo doyowa nopuḷú nokilo, diápabí pinotakin in ḷambá mita, boboḷ, kaeng nokasumba inta pinaké in datu mita in Midian, bo boboḷ inta ginamá kon sigogow in unta mita monia.

²⁷Nongkon buḷawan mita tatua, ki Gideon nomia kon patong berhala, bo pinosindognea kon ḻipúnea inta kon Opra. Bayongan in intau in Israel minayá intua sin nosumba kon patong berhala tatua, nodapot in mosia diádon noindoimai kon i Allah. Bo soaḷ tatua in nobaḻí naonda bo poyogaḷap tobatú kon i Gideon bo motoḷuadínea.

²⁸Intau in Midian diádon mokopongonu; mosia in sinaḷowdon in intau Israel. Dá noamandon in butá tatua kon bonu in opat nopuḷú notaong in koonggotnea kon dodai in ki Gideon nobiagpa.

²⁹Nopaḷut mako in pinoparangan tatua, ki Gideon nobui kon ḻipúnea tontaní bo nogutun kon tua.

³⁰Sia in kogadí kon pitu nopuḷú in adí ḷoḷaki, sin nobayong in ki buḷoinea.

³¹Oyúon doman in kinoboyotannea kon Sikhem; bobay tatua nokouḻí kon adí ḷoḷaki inta sinangoiannea ki Abimelek.

³²Naonda in nogoguyangdon totok bain tua bo minatoi in ki Gideon ki adí i Yoas. Sia iḷobong kon pinoḷobongan kon i Yoas, ki amánea. Pinoḷobongan tatua in noiukat kon Opra, inta kotá in inanakan i Abiezer.

³³Naonda in ki Gideon minatoi, intau in Israel diádon mosatia kon i Allah. Mosia in nosumbadon kon dewa mita i Baal bo binaḻídon monia in ki dewa Baal-Berit dewa monia.

³⁴Mosia in diá bidon noibada kon i Allah, ki TUHAN monia, inta ain nopoḷuat kon i monia nongkon kawasa in bayongan musung inta kon diugmai monia.

³⁵Diá domandon sinuḻían monia kon motoḷuadí i Gideon in bayongan inta mopia inta ain pinomia i Gideon kon umat in Israel.