Read Mongondow HAKIM MITA 9 Bible Online

HAKIM MITA 9 - Mongondow bible

HAKIM MITA 9

¹Kon singgai tobatú ki Abimelek ki adí i Gideon minayá in kotá in Sikhem ḻipú in motoḷuadí i inánea. Kon tua in sia nongonguman monia, kainia,

²“Tungkuḷaika ḻibó kon bayongan in intau in Sikhem, onda in mopia-pia: Parentaan i adí i Gideon inta pitu nopuḷú, andeka tongá intau tobatú? Ponoropdon kon i monia kon akuoi naa in oyúonpabí in uput in kompong nongkon i monia tua.”

³Dá minayádon in inanakan in motoḷuadí i iná i Abimelek tua kon intau mita in Sikhem bo nopotaau in koyow i Abimelek kon i monia. Bo intau mita in Sikhem nonantúdon kon tosingogon kon dumudui kon i Abimelek, sin kinotaauandon monia kon sia in oyúonpabí in uput in kompong takin i monia.

⁴Onda intua mosia nobogoi kon inia in doit saḷaka pitu nopuḷú inta ginamá nongkon baḷoi pososumbaan kon i Baal-Berit. Doit tatua pinonondan i Abimelek kon kolompó in intau mita inta mongoraat sinbá moyotakinneadon,

⁵bo minayá in ḻipú i amánea inta kon Opra. Kon tua iḻimodneadon in ki utatnea mita inta pitu nopuḷú tua kon tudu in batu tobatú. Táe ki Yotam adí ai-ai totok i Gideon in diá noitakin kinoḻimodan sin nogadop in sia.

⁶Dá noyosipundon in bayongan intau in Sikhem bo Bet-Milo, bo minayá in pangkoi in kayu terpentin inta mokaramat kon Sikhem. Kon tua binaḻídon monia in ki Abimelek datu monia.

⁷Naonda in dinongog i Yotam in soaḷ tatua, sia minayá sinimindog kon tudu in Buḷud Gerizim, bo nomaḷú kon intau mita tatua, “Indongogai in akuoi, ei intau mita in Sikhem, sinbá indongogan domandon i Allah in moiko!

⁸Nokoimontandon in nobaḻí noyosipundon in pangkoi mita in kayu, noyosipun sin momiḻí kon datu kon i monia. Dá nogumandon in mosia kon pangkoi in zaitun, ‘Kobaḻídon datu nami.’

⁹Tubag in pangkoi in zaitun, ‘Ah doíbí in akuoi. Sin aka akuoi mobaḻí datumu, akuoi in mustibí mogogaidon mobogoi in ḷana in zaitun inta pakéon mohoromat kon dewa mita bo intau.’

¹⁰Bo guman in pangkoi mita ibanea kon pangkoi in ara, ‘Ikodon uḻe in mobaḻí datu nami.’

¹¹Táe pangkoi in ara tatua notubag, ‘Doí in akuoi, sin aka mobaḻídon datumu yo akuoi in mustidon mogogai in mopomungai in bungai in ara inta mongoromimit.’

¹²Nopaḷut mako kon tua, nogumandon in pangkoi mita tatua kon pangkoi in anggur, ‘Aka natua, dá ikodon uḻe in mobaḻí datu nami.’

¹³Táe pangkoi in anggur in notubag, ‘Umpaka dá akuoi in mustibí mogogai mopomungai in anggur inta mokosanang kon gina in dewa mita bo intau, sin tongábí popisí in mobaḻí datumu!’

¹⁴Tuamai in nogumandon in bayongan pangkoi kon bo bonganga, ‘Ikodon in mobaḻí datu nami.’

¹⁵Bonganga tatua notubag, ‘Aka totu-totuubí in moiko moibog mopobaḻí kon inakó datumu, dá koḻigaidon kon siungonku. Aka doí in moiko, dá nongkon tangaku mita inta dodugian naa ḷumuaidon in tuḷú inta momokak kon bayongan pangkoi in aras kon Libanon.’ ”

¹⁶“Yo,” guman i Yotam noiduduimai, “Degá naonda in nopobaḻí mako datu kon i Abimelek, yo mosatia bo mobayag in gina monimu in mogaid? Degá totuudon in pinogogaid monimu nion kon i Gideon, ki amáku, bo inanakan motoḷuadínea? Sinuḻiandon degá monimu in onu inta ain inaidan i amáku

¹⁷inta ain irumopot totok sin kopontingan monimu? Pokotorop, sia ain nopotaru in nyawanea sin mopoḷuat kon i monimu nongkon kawasa in intau mita in Midian.

¹⁸Táe tanaa moiko in nomarontakdon kon motoḷuadí i amáku. Ki adínea mita ain iḻimod monimu komintan — pitu nopuḷú in intau pinoyododai kon tudu in batu tobatú. Ki Abimelek nion in ki adí i amáku nongkon i atanea. Táe binaḻídon monimu in sia datu kon Sikhem, tongá popisí in sia oyúonpa in uput in kompong monimu.

¹⁹Aka oaid monimu singgai in naa kon i amáku bo kon motoḷuadínea notuḻid bo nobayag, dá pobarasanangdon takin i Abimelek, bo biódon mako in sia mobarasanang doman takin i monimu.

²⁰Tongá aka diá natua, dá igumon mako in nongkon i Abimelek ḷumuaidon in tuḷú inta momokak modait kon bayongan in intau inta nogutun kon Sikhem bo Bet-Milo. Bo igumon doman mako nongkon intau mita inta nogutun kon Bet-Milo in ḷumuai domandon in tuḷú inta momokak doman modait kon i Abimelek.”

²¹Nopaḷut mako kon tua ki Yotam noḷagui bo nogutun kon Beer, sin moondok in sia kon i Abimelek, ki utatnea tatua.

²²Toḷu notaong in ki Abimelek nomarenta kon Israel.

²³Bo pinopomukádon i TUHAN in sosaturuan kon sigad i Abimelek bo kon intau mita in Sikhem nodapot in mosia noḷawang kon inia.

²⁴Tua in nobaḻí sinbá kotuḻíandon in raat i Abimelek bo intau mita in Sikhem inta ain nomakisa kon inia sinbá moḻimod kon i adí i Gideon inta pitu nopuḷú tua.

²⁵Intau mita in Sikhem nonampatdon kon intau mita monia kon tudu mita in buḷud sin modomok kon i Abimelek. Pomuḷoi in intau inta moitaḻib kon tua pogagowan in intau mita tatua. Dá onu inta nobaḻí tatua pinotaaudon kon i Abimelek.

²⁶Kon tungkuḷ intua ki Gaal ki adí i Ebed aindon namangoi noyotakin i utatnea mita sin mogutun kon Sikhem; bo intau mita in Sikhem nopirisaya kon inia.

²⁷Mosia in minayá nosipú kon bungai mita in anggur kon gobá mita in anggur, bo nomia kon oinumon nongkon anggur, bo poḷat nomia kon rame. Mosia nongaan bo nonginum kon tampat pososumbaan kon dewa monia poḷat nogodi-godimai kon i Abimelek.

²⁸“Ki ine in kita naa nodapot in kita naa mustibí mohoromat kon i Abimelek?” guman i Gaal. “Ki inebí in sia tua? Sia tua in ki adí i Gideon kon i Zebul bobantungnea tua inta ain nobaḻí ata i Hemor, ki amá i Sikhem, mogoguyang naton!”

²⁹“Aka kuma akuoi in nobaḻí itoi in intau mita in Sikhem naa, yo notantú bidon kon nopaḷut bidon in kinobiagan i Abimelek tua! Bain pogumanku[8] kon inia, ‘Igai mayá! Oinídon mita in tontaramu bo koḻigai kita mayá moparang!’ ”

³⁰Ki Zebul, pongawasa in kotá in Sikhem, sinumorú naonda in nokodongog kon tosingogon i Gaal natua.

³¹Sia nopotabá in totabá minayá kon i Abimelek kon Aruma sin mopotaau in koyow tanaa, “Ki Gaal adí i Ebed noyotakin i utatnea mita ain namangoi in Sikhem bo nomakisadon kon intau mita kon tua sinbá moḷawang kon inimu.

³²Tuamai, iko takin intaumu mita in bayádon pogadop kon gobá kon dodai in doḷom.

³³Ikoḷom doḷo-doḷom aka mata in singgai momukádon, yo daḻídon tubu in kotá tatua. Bo aka ki Gaal takin intaunea mita ḷumuai sin moḷawang kon inimu, yo tuadon in kasampatanmu mogaidmai kon inia!”

³⁴Dá nobuatdon in ki Abimelek takin intaunea mita kon wakutu in doḷom. Mosia in irumangkap nobaḻí opat nokolompok bo minayá nogadop kon ḻibumai in kotá in Sikhem.

³⁵Bo naonda in ki Abimelek takin intaunea mita nokoontong kon i Gaal iḻumuai bo sinimindog kon ngara in kotá, mosia iḻumuai komintan nongkon pinogadopan.

³⁶Inontong i Gaal in mosia, bo noguman in sia kon i Zebul, “Indoiai! Oyúon in intau mita mosiḻig nongkon buḷud mopoangoi in naa!” “Ah, deemanbí intau intua,” tubag i Zebul, “tua in tongábí oḻinow mita kon buḷud.”

³⁷Bo ki Gaal bui noguman, “Totuu! Oyúonbí in intau nosiḻig nongin oyuk in buḷud, bo topaanan doman inta tayo-tayow mangoi nongkon pangkoi in terpentin karamat!”

³⁸Ki Zebul nogumandon kon i Gaal, “Yo, onda in singogmu inta moḷambanua tua? Koḻipod in iko noguman onubí in mangaḻenea kita musti tumonsiup kon i Abimelek tua? Naadon in intau mita inta siningkuḻemu tua. Yo bayádon tanaa tayowai in mosia!”

³⁹Bo ki Gaal nodia kon intau mita in Sikhem iḻumuai bo noḷawang kon i Abimelek.

⁴⁰Táe sinubú i Abimelek in sia nodapot in sia noḷagui. Nobarong in intau minatoi nodapot kon ngara in kotá.

⁴¹Nopaḷut mako kon tua ki Abimelek nobuidon kon Aruma, bo nogutundon kon tua. Bo ki Gaal takin ki utatnea mita in pinoguntundon i Zebul nongkon Sikhem, dá mosia in diádon motaau in mogutun kon tua bui.

⁴²Nopoikoḷomai kon singgai intau mita in Sikhem nomangkoidon nonaḷámai kon kotá, minayádon in gobá bo soaḷ tatua pinotaaudon kon i Abimelek.

⁴³Bo ki Abimelek nosipundon kon intaunea mita, bo sinilainea toḷu, bodongka minayá in mosia nogadop kon gobá mita. Naonda in sia mokoontong kon intau mita inta nogutun kon kotá namangoi in gobá, sia ḷumuai nongkon pinogadopannea bo moḻimod kon i monia.

⁴⁴Bo dodai intua ki Abimelek takin tontaranea mita iḻimikatdon minayá nonubu kon ngara in kotá, tontaranea inta doyowa nopaanan ibanea in nondudur bo poḷat noḻimod kon intau mita inta noḷagui minayá in gobá mita.

⁴⁵Kinoouputbí in singgai ki Abimelek noparang bo nogagow kon kotá tatua; intau mita inta nogutun kon tua in iḻimod, bo kotánea in irimumudnea onda intua sinabudan in simuton.

⁴⁶Naonda in intau mita inta kon bonu in Benteng Sikhem nokodongog kon tua, mosia sinumuot kon bonu in bubú inta kon ḻimonag in kuil El-Berit sin mogadop.

⁴⁷Bo pinotaau in intau kon i Abimelek kon intau mita kon benteng in Sikhem tatua ain noyosipun kon tua.

⁴⁸Tuamai in ki Abimelek takin intaunea mita minayádon in Buḷud in Zalmon. Kon tua in sia nomongkódon kon tanga mita in kayu takin nomaké in boḻiung, bodongka nomotaan kon tanga mita tatua, onda intua pinoki aidannea domandon kon ná onu inta inaidannea tatua.

⁴⁹Dá mosia tumpaḷadon nomongkó kon tanga mita in kayu, bo minayá dinumudui kon i Abimelek. Bayongan tanga in kayu tatua sinipun monia kon bibig in bubú in kuil tatua, bodongka sinurub, bo kon dodai intua intau mita in Sikhem kon bonupa in bubú tatua. Tuamai in minatoidon in bayongan intau mita in Sikhem tatua, degá toribumai in intau ḷoḷaki bo bobay.

⁵⁰Nopaḷut mako kon tua ki Abimelek minayá in Tebes. Sia in nongopung kon kotá tatua poḷat iḻitúan.

⁵¹Kon yua-yuak in kotá tatua oyúon in ḷangkeang tobatú inta moropot. Dá bayongan in intau kon kotá tatua noḷagui minayá intua. Mosia sinumuot kon bonu in ḷangkeang tatua bo nongunsí kon ḷoḻingkopnea, bo dongka noponik.

⁵²Onda intua namangoidon in ki Abimelek kon tua sin monubu kon ḷangkeang tatua. Naonda in sia nodapot kon ngara in ḷangkeang tatua bo monurubdon,

⁵³bobay tobatú nopoḷabúdon in tobatú batu poḷoḻintogan kon uḷunea dá nobotak in uḷu i Abimelek.

⁵⁴Ḷagidon in ki Abimelek nogoiní kon tayow mobiag inta nomotaan kon sinapangnea bo noguman, “Rabutdon in pitowmu bo ḻimodon in akuoi; doíbí in akuoi tangoion in intau akuoi iḻimod in bobay.” Dá tayow mobiag tatua nonumbukdon kon inia nodapot in minatoi.

⁵⁵Naonda in inontong intau in Israel kon ki Abimelek in minatoidon, mosia nobuidon komintan.

⁵⁶Natuata in pinototuḻí i Allah kon i Abimelek kon bayongan in aidnea moraat inta ain pinomianea kon i amánea, kon dodai in sia noḻimod kon i utatnea mita inta pitu nopuḷú tua.

⁵⁷Bo ki TUHAN nohukum doman kon intau mita in Sikhem popisí in aid monia inta moraat. Tua mita in noitombutung kon ná onu inta ain siningog i Yotam ki adí i Gideon soaḷ mosia tua kon wakutu in nogodi-godimai kon i monia.