Read Mongondow YOHANES 2 1 Bible Online

YOHANES 2 1 - Mongondow bible

YOHANES 2 1

¹Kon i Iná inta ain piniḻí i Allah bo kon i adínea mita inta kinotabiku.[1] Surat tanaa in nongkon inakó, tobatú itoi in jamaat inta totu-totuu motabi kon i monimu. Deemanbí tongá akuoi in motabi kon i monimu, táe bayonganbí doman intau inta totu-totuudon nonotaau kon i Allah.

²Sin ki Allah in umurandon nogutun kon bonu in gina naton, bo Sia in umuranbí doman kotaki-takin naton.

³Poigumon mako, totabi, barakat bo kobiagan motompia nongkon i Allah, ki Amá naton bo nongkon i Yesus Kristus ki Adí-Nea in umuran doman kotaki-takin naton. Igumon mako tua, komintan mouḻí naton intua takin gina motuḻid bo takin tabi.

⁴Nosanangdon totok in ginaku nokotaaumai kon oyúon in ki adí mita i Iná in nobiag podudui in totundú mita i Allah, ná inta pinoki aid i Allah Amá kon i naton.

⁵Tuamai, Iná poigumonkudon totok sinbá kita komintan in umurandon mositabian. Onu in pinogumanku tanaa in deemanbí parenta mobagu; parenta tanaa ain bidon inogoi kon i naton wakutu in kita bagupa nopirisaya.

⁶Aka kita motabi kon i Allah yo mustibí dumudui kon bayongan parenta-Nea. Naa in parenta tatua: Moiko in musti umuran mobiag mositabian tobatú bo tobatú.

⁷Tanaa mako in nobayongdon kon dunia naa in intau inta motundú kon diá totuu. Mosia tua in intau inta diá mopirisaya kon ki Yesus Kristus namangoidon in dunia naa saḷaku intau. Intau natua i mongouboḷ, bo saturu i Kristus.

⁸Sin tuamai, mokopoingat sinbá moiko in diá kobuḻian in onu inta ain iramuji nami sin kopontingan monimu.[2] Poramujidon totok sinbá moiko in motarima kon tontuḻí in bayongan inta ain inaidanmu.

⁹Intau inta diá kinumadai kon onu inta ain sinundú i Kristus, nodapotbí in sinumabat kon onu inta ain sinundú i Kristus, yo ki Allah in diábí kon bonu in gina intau tatua. Táe intau inta umuran kinumadai kon onu inta sinundú i Kristus, yo sia tua in umuran doman nopirisaya kon i Amá andeka kon i Adí-Nea.

¹⁰Sin tuamai aka oyúon in intau mamangoi kon i monimu bo mopotaau in totundú inta diá sinundú i Kristus, yo dika ogoi in sia tumuot kon bonu in baḷoimu bo donaai doman mobogoi in salam kon inia.

¹¹Sin intau inta mobogoi in salam kon intau ná tua, yo noyopopogdon noyotakin intau tatua nogaid kon inta moraat.

¹²Mobayongpa in pogumanku kon i Iná, táe mopia-piabí kon deeman tongá pongin surat. Haraponku mako tua, akuoi in motaaupa mayá mokipodungkuḷ kon i monimu bo mongonguman moyogintayowan mako monimu, sinbá gina naton totu-totuudon moḷunganga.

¹³Ki adí mita i utat bobay i Iná inta piniḻí doman i Allah,[3] nokidia doman in salam kon i Iná.