Read Mongondow WAHYU 1 Bible Online

WAHYU 1 - Mongondow bible

WAHYU 1

¹Buk tanaa in nongonguman kon onu inta pinoontong i Yesus Kristus soaḷ mita inta mobaḻí. Pinotaau i Allah kon i Kristus, sinbá potaau i Kristus kon intau mita inta nogaid kon oaidan i Allah in onu inta diádon moonggot bo mobaḻí. Ki Kristus nopotabádon in malaekat-Nea namangoi kon i Yohanes, intau inta mogogaid kon oaidan-Nea, sin mopotaau kon inia in bayongan soaḷ inta mobaḻí tua.

²Dá ki Yohanes nopotaau doman in bayongan inta ain inontongnea tatua; bo naadon in pinogumannea in soaḷ koyow nongkon i Allah, bo inta inirigonan i Kristus Yesus pinongin kosakusiannea.

³Totokdon mosanang in intau inta mobaca bo inta mokidongog kon habar inta pinotaau i Allah muna bo inta ain pinais kon bonu in buk tanaa bo mosatia kon onu inta pinais kon bonunea. Sin diádon moonggot bo tua komintan in mobaḻí.

⁴Utat mita inta kon pitu nojamaat kon daerah in Asia! Akuoi, ki Yohanes, mopoigum mako sinbá moiko in ogoian i Allah in barakat bo kobiagan motompia--tuata in ki Inta oyúon, bo inta koyongandon oyúon, bo inta umuran oyúon, bo nongkon roho pitu inta kon tayowonmai in tampat pomomarentaan i Allah,

⁵bo nongkon i Yesus Kristus, sakusi inta mosatia. Sia tua inta muna-munamai totok biniag bui nongkon kinopatoian bo Sia doman in nongawasa kon bayongan datu kon dunia naa. Ki Yesus in motabi kon i naton, tuamai Sia in noibog minatoi sin momilat kon i naton nongkon kawasa in dosa mita naton,

⁶bo baḻíon-Nea tobatú bangusa in imang mita in kita, inta mogaid kon oaidan i Allah, ki Amá-Nea. Ki Yesus Kristus tuata inta momulia bo inta mongawasa modapot in kopaḷutannea. Amin!

⁷Indoiai, Sia in mamangoi inoḻiungan in goḷom! Bayongan intau mokoontongbí kon i-Nia, noitakin doman in mosia inta nonakuḷ kon i-Nia. Bayongan in intau kon dunia naa komintanbí mogamui lantaran Sia. Nopasti bidon intua! Amin!

⁸“Akuoibí naa inta muna-munamai totok bo inta totok in pangabisan,” tua in singog i Tuhan Allah, ki Inta oyúon bo inta koyongandon oyúon, inta umuran oyúon bo Inta totok Mokawasa.

⁹Akuoi ki Yohanes, ki utatmu inta kinoantugan doman in roriga inta ná noiantug kon intau mita inta mopirisaya kon i Kristus. Mustibí mokoposabar in monahang kon roriga in kita saḷaku kapunyaan-Nea. Akuoi in iḷumbú kon Pulau Patmos popisí in nopotaau in koyow inta nongkon i Allah, inta inirigonan i Yesus pinongin onu inta inouman-Nea.

¹⁰Kon Singgai i Tuhan, akuoi in kinawasaan in Roho i Allah, bodongka nokodongog in akuoi kon singog moropot — naonda bo singog in torompet — nosingog kon tumikumai.

¹¹Singog tatua in noguman, “Paisdon onu inontongmu, bo atodon in buk tatua kon pitu nojamaat: Jamaat mita kon Epesus, kon Smirna, kon Pergamus, kon Tiatira, kon Sardis, kon Piladelpia bo kon Laodikia.”

¹²Akuoi in nobobui ná tumi sin moindoi mongo ki ine inta noguman kon inakó tua. Bo inontongku pitu in sioḷ pototuduan kon togá inta pinomia nongkon buḷawan.

¹³Kon yua-yuak in sioḷ mita pototuduan kon togá tatua, inontongku in naonda bo intau. Sia in nogi jubah moḷanggó noidapot in sioḷ. Kon dodob-Nea oyúon in oḻingoi in dodob inta pinomia nongkon buḷawan.

¹⁴Buok-Nea in nobudó naonda bo bubuḷ in domba, ná kobudó doman in kapot. Mata-Nea in moyongki-yongkit naonda bo tuḷu;

¹⁵sioḷ-Nea in moriang naonda bo tambaga inta sinubá. Singog-Nea in naonda bo gonugur in tubig moḷoben inta moḷabú nongkon buḷud.

¹⁶Ḻima-Nea koḷanan in nokadai kon tundi pitu, bo kon bibig-Nea iḷumuai in tobatú pitow moḷanit inta doyowa in matanea. Pogot-Nea in monindar naonda bo mata in singgai inta noutudon.

¹⁷Naonda in akuoi nokoontong kon i-Nia, akuoi noitungkud kon tayowon-Nea naonda bo intau minatoi. Táe ḻima-Nea koḷanan in noyapu kon inakó bo poḷat noguman kon inakó, “Dika moondok! Akuoi naa in ki Inta Totok Muna-munamai bo ki Inta Pangabisan.

¹⁸Akuoi naa in Sia inta nobiag tua! Akuoi ain minatoi, táe indoiaika, Akuoi in nobiagbí bo diá bidon mato-matoi. Popatoi bo dunia in intau minatoi[1] kon bonu bidon in kawasa-Ku.

¹⁹Sin tuamai, paisdon in soaḷ mita inta inontongmu, tuata in soaḷ mita inta oyúon tanaa mako, bo soaḷ mita inta mobaḻí kon singgai moiduduimai.

²⁰Naabí in rahasia in tundi pitu inta inontongmu kon ḻima-Ku koḷanan, bo pitu in sioḷ pototuduan kon togá inta pinomia nongkon buḷawan tua: Tundi pitu tatua in malaekat mita in jamaat pitu doman tatua, bo pitu in sioḷ pototuduan kon togá tua in jamaat pitu tatua doman.”