Read Mongondow WAHYU 10 Bible Online

WAHYU 10 - Mongondow bible

WAHYU 10

¹Bo akuoi in nokoontong kon tobatú malaekat ibanea inta moroton noponag nongkon soroga. Sia inoḻiungan in goḷom bo kinobandowan in aḻibobag. Pogotnea in naonda bo mata in singgai, sioḷnea in naonda bo oigi tuḷu.

²Sia kokada-kadai in ḻitodan buk mointok inta noibuká mako. Sioḷnea koḷanan in nomuntuk kon dagat bo sioḷnea koḷoigi in nomumtuk kon toba.

³Bo sia in nomaḷú noropot naonda bo ganggor in singa. Nopaḷut mako in sia nomaḷú, sinubagan in gotup pitu inta moyodudu-duduimai.

⁴Naonda in diádon singog in gotup pitu tatua, moibog in akuoi momais kon tua, táe kinodongoganku in singog nongkon soroga in noguman, “Bunidon onu in pinoguman in gotup pitu tatua, donaaidon paison intua!”

⁵Bo malaekat inta inontongku in sioḷnea nomuntuk kon dagat bo kon toba nopotonggó in ḻimanea koḷanan kon ḷangit.

⁶Sia in nongibot pinodoyon kon tangoi i Allah inta diá mato-matoi bo inta ain nomia kon ḷangit bo butá, dagat bo bayongan in tombonunea. Malaekat tatua in noguman, “Wakutunea in diá bidon sorongon bui!

⁷Táe aka malaekat impitunea in mogirupdon kon torompetnea, yo aidandon i Allah in tomayá inta binuni-Nea, ná inta ain pinotaau muna kon intau mita inta nogaid kon oaidan-Nea bo kon nabi mita.”

⁸Noiduduimai kon tua singog inta ain dinongogku nongkon soroga tua in nosingog bui kon inakó. Kainia: “bayádon gamá in ḻitodan buk inta ain noibuká mako tatua kon ḻima in malaekat inta nomuntuk kon dagat bo kon toba tua.”

⁹Dá akuoi in minayá domandon kon malaekat tatua bo nopoigum sinbá ogoineadon in ḻitodan buk mointok tatua kon inakó. Sia in noguman kon inakó, “Gamádon bo kaandon in naa. Aka kon sianmudon yo mobaḻí bidon sia mopait, táe aka kon bibigpa yo moromimitbí in sia naonda bo biluk.”

¹⁰Ginamáku domandon in ḻitodan buk tatua nongkon ḻimanea bo kinaan. Kon bibig naonda bo biluk in nanamnea, táe naonda in kon siandon mopait bidon in korasaan.

¹¹Onda intua akuoi in pinarentaan, “Sinbá buipa mopoyaput magí-mako in habar i Allah soaḷ bangusa mita, negara mita, bahasa mita bo datu mita.”