Read Mongondow WAHYU 11 Bible Online

WAHYU 11 - Mongondow bible

WAHYU 11

¹Nopaḷut mako kon tua akuoi inogoian in kayu topongkó naonda bo tungkud pogogukur, takin koyow, “bayádon ukur in Baḷoi Tuhan bo meja pogogukatan kon sosumba, bo iapdon in mosia inta noibada kon bonunea.

²Táe donaaidon ukuron in palas kon dotá in ḷuai Baḷoi i Allah tatua, sin tua in inogoi bidon kon intau mita inta diá nonotaau kon i Tuhan. Mosia in mamangoi morita-ritak mako kon kotá motusi tatua kon bonu in opat nopuḷú bodoyowá nobuḷan.

³Akuoi in mopotabá in sakusi-Ku doyowa inta mogiḷambung in ḷambung intau kinopatoian, bo mosia mopoumum in habar i Allah solama toribu bodoyowa nogatut bo onom nopuḷú nosinggai in koonggotnea.”

⁴Sakusi doyowa tatua in zaitun doyowa nopangkoi bo sioḷ in pototuduan kon togá doyowa inta kon tayowonmai i Tuhan inta nomia kon dunia naa.

⁵Aka oyúon in intau monungkuḷ mogaid kon inta diá mopia kon i monia, dá ḷumuaidon in tuḷu nongkon bibig monia bo tua in momokak kon saturu mita tatua. Dá natua in daḷan kopopatoi in intau mita inta mogaid kon inta diá mopia kon i monia.

⁶Oyúon in kawasa monia mogoḻingoi kon ḷangit sinbá diápa monguyan kon dodai in mosia mopotaau in Habar nongkon i Allah. Mosia inogoian doman in kawasa mongawasa kon bayongan bokaká sinbá mosia in motaau momaḷui kon tubig mobaḻí dugú; bo oyúon doman in kawasa monia mosambok kon butá naa takin mopoḷabú in bayongan inta mokororiga, toonukabí in koibog monia.

⁷Naonda in mosia mopaḷutdon mopotaau in habar monia, dá mahaḷuk inta iḷumuai nongkon irang in popatoi moḷawang kon i monia, poḷat monaḷow bodongka moḻimod kon i monia.

⁸Bo mayat monia moitongkob mako kon daḷan moḷoben kon kotá moḷoben, kon kotá inta pinopopakúan kon i Tuhan monia. Tangoi in kotá tatua aka secara rohani yo Sodom andeka Mesir.

⁹Intau mita nongkon bayongan negara, suku, bahasa bo bangusa in mokoontong kon mayat monia kon bonu in toḷu nosinggai kapin, bo diábí ogoi in intau mita tatua ḷobongon in mayat monia tua.

¹⁰Moḷungangabí totok gina in bayongan intau kon dunia naa in mokoontong kon mayat in sakusi doyowa tatua. Porameanbí monia in kinopatoian nayadua tua. Bo mosia mosiogoianbí in tombuinag, lantaran nabi doyowa tatua ain nopoangoi in roriga moantó kon bayongan intau kon dunia naa.

¹¹Naonda in toḷudon nosinggai kapin, noiangoidon bui in tompot kobiagan nongkon i Allah bo sinumuot bui kon nabi doyowa tatua. Dá mosia in nobangon bo sinimindog, sahingga in bayongan intau inta nokoontong kon i monia inagíandon totok in ondok.

¹²Onda intua nabi doyowa tatua in nokodongogdon kon singog moropot inta nogoiní nongkon soroga, “Koḻigai onikdon in naa!” Bo koonto-ontongdon doman in saturu monia, mosia namonikdon in soroga kooḻi-oḻiung in goḷom.

¹³Dá dodai intua nobaḻídon in ḻinug inta totok in moropot. Bo sepersepulú nongkon kotá tatua norimumud. Pitu noribu intau minatoi wakutu in ḻinug tatua. Intau mita ibanea in totokdon in noondok, dá nodayowdon in mosia kon koḷoḷoben in kawasa i Allah inta kon soroga.

¹⁴Bodito induanea in noitaḻibdon, táe indoiai! Bodito intoḷunea in diádon moonggot moidudui mangoi.

¹⁵Bo malaekat impitunea in nogirup kon torompetnea, dá kinodongogandon in singog mita inta mongoḷangon totok nongkon soroga noguman, “Kawasa momarenta kon dunia naa, masai naa kinadaiandon i Tuhan naton, bo i Datu mopoposaḷamat inta pinodandi-Nea. Sia bidon in momarenta modapot in mononoi!”

¹⁶Dá itoi inta doyowa nopuḷú bo opat inta iḻimitú kon tampat pomomarentaan monia kon tayowon i Allah in sinumungkudon mita bo nosumba kon i Allah.

¹⁷Mosia in noguman, “Ki Tuhan, Allah Inta Totok Mokawasa, inta oyúon, bo koyongandon oyúon! Kami mopoyaput in sukur moantó kon i Tuhan sin ki Tuhan ain nopomaké in kawasa i Tuhan inta moḷoben, bo nomangkoidon nomarenta!

¹⁸Intau mita inta diá nonotaau kon i Tuhan, sinumorúdon sin aindon wakutunea Iko mopoḷuai in torú-Mu, bo aindon doman wakutunea Iko monantú kon intau mita minatoi. Naadon doman i wakutunea mobogoi kon boḻi in pinogaidan in intau mita inta nogaid kon oaidan i Allah, bo in nabi mita, bo kon bayongan in umat, tuata in mosia inta noibada kon ini-Mu, adí ande itoi. Naadon i wakutunea morimumud kon intau mita inta nomoguyaat kon dunia naa!”

¹⁹Dá nobukatdon in Baḷoi Allah kon soroga, bo kinoontongandon in Poti Dodandian kon bonunea. Bo nongilatdon moyo-moyodudui bo gonugur in gotup inta modowawá mako, takin doman ḻinug bo uyan eis inta totok morogot.