Read Mongondow WAHYU 13 Bible Online

WAHYU 13 - Mongondow bible

WAHYU 13

¹Onda intua akuoi in nokoontong kon tobatú mahaḷuk inta iḷumuai nongkon bonu in dagat, mopuḷú in tungoinea bo pitu in uḷunea. Pomuḷoi in tungoi oyúon in mahkota, bo pomuḷoi in uḷu pinaisan tangoi mita inta pohojat kon i Allah.

²Mahaḷuk inta inontongku tua, batangannea in naonda bo macan tutul, sioḷnea naonda bo sioḷ in boruang, bibignea naonda bo bibig in singa. Mahaḷuk tatua inogoian i naga in ropot, inogoian in tampat pomomarentaannea bo kawasa inta moḷoben.

³Tobatú kon sigad in uḷu pitu in mahaḷuk tatua koontongan naonda bo kekeb inta mobogatdon totok, táe kekeb tatua in nopiadon. Bayongan tombonu in dunia naa, nodait dinumudui kon mahaḷuk tatua takin nohera-herangan.

⁴Mosia in nosumba kon naga tatua, sin sia in nobogoi in kawasa kon mahaḷuk tatua. Mosia in nosumba doman kon mahaḷuk tatua takin noguman, “Diábí in notongkai mahaḷuk tanaa! Diábí in monahang in tumayow moparang takinnea naa!”

⁵Mahaḷuk tatua inogoianbí in kasampatan ḷumoḷatú in mosingog bo moningkuḻe kon i Allah. Sia inogoianbí doman in kasampatan momarenta kon bonu in opat nopuḷú bodoyowá nobuḷan koonggotnea.

⁶Bo sia in mulaidon nohojat kon i Allah, bo kon tangoi i Allah, bo kon tampat doman pinogutunan i Allah, takin bayongan inta nogutun kon soroga.

⁷Sia inogoianpa doman in wakutu moḷawang kon umat i Allah takin monaḷow kon i monia. Bo inogoian doman in kasampatan mongawasa kon bayongan suku, umat, bahasa bo bangusa.

⁸Mahaḷuk tatua sumbáanbí in bayongan intau inta nobiag kon dunia naa. Intau mita inta diápa kinopaisan in tangoi monia kon bonu in buk kobiagan inta kapunyaan i Adí in Domba inta ain iratá, pinangkoipamai kon dunia naa diápa pinomia.

⁹Tuamai, aka moiko mokosanggup in mokidongog, yo indongogaidon in habar tanaa:

¹⁰“Intau inta sinantúdon domokon, mustibí in sia domokon. Bo intau inta ain sinantú matoi sibaton, yo pasti matoibí doman sibaton. Manangka intua umat i Allah musti monahang bo mosatia.”

¹¹Bo akuoi in buidon nokoontong kon tobatú mahaḷuk ibanea inta noitukat nongkon bonu in butá. Doyowa in tungoinea, naonda bo tungoi in ki adí in domba. Singognea naonda bo singog in naga.

¹²Kon tayowon in mahaḷuk inta muna tatua, sia nopomaké in kawasa nea inta moḷoben inta nouḻínea doman nongkon mahaḷuk tatua. Bayongan in butá naa bo bayongan inta nogutun kon tudunea, pinakisanea mosumba kon mahaḷuk inta muna tatua, inta kekebnea mobogat ain nopia.

¹³Mahaḷuk inta induanea tatua in nogaid kon tanda inta totok in mokoherang kon intau. Kon tayowon in bayongan intau binaḻínea in tuḷu noḷabú nongkon ḷangit.

¹⁴Bo bayongan in intau inta nobiag kon dunia naa akaḷannea in aidnea inta pinomianea kon tayowon in mahaḷuk inta muna tatua. Mosia in pinoki aidannea in patong mahaḷuk inta ain kinekeban in pitow, táe umuranpa nobiag.

¹⁵Mahaḷuk tatua inogoian doman in kawasa mobogoi in nyawa kon patong tatua, sahingga in motaaudon mosingog in patong tatua bo moḻimod kon bayongan in intau inta doí mosumba kon inia.

¹⁶Bayongan intau, moḷoben bo mointok, mobiag nooyúon bo nobiag nobogá, ata bo intau nobebas pinakisa in mahaḷuk tatua motarima kon tanda kon ḻima monia koḷanan andeka kon pogot monia.

¹⁷Diábí tobatúmai intau motaḷui andeka mopotaḷui in onukadon, aka diá in tanda tatua. Tangoi in mahaḷuk tatua in pinonontanda, andeka angka inta nobaḻí tanda in tangoi tatua.

¹⁸Kon soaḷ nanaa paraḷubí totok in hikmat. Intau inta mobijaksana motaaubí mogiap kon mangaḻe angka in mahaḷuk tatua, sin angka tatua in tangoibí in intau. Naa in angka tatua 666.