Read Mongondow WAHYU 15 Bible Online

WAHYU 15 - Mongondow bible

WAHYU 15

¹Noiduduimai kon tua, inontongku kon ḷangit in tobatú soaḷ inta mokoherang totok bo diá in poḻiuan kon tua. Pitu in malaekat, bo pitu doman in roriga pangabisan. Naadon in pangabisan totok ki Allah mopoḷuai in torú-Nea.

²Nopaḷut mako kon tua akuoi in nokoontong kon inta koontongan naonda bo dagat kaca inta noyobauk in tuḷu. Akuoi in nokoontong doman kon intau mita inta ain nountung nongkon mahaḷuk bo patongnea tatua, bo nokountung domandon kon intau inta tangoinea ain sinontandaan in angka. Intau mita inta ain nountung tatua in sinimindog kon bingkí in dagat kaca bo kokada-kadai in kecapi inta inogoi i Allah kon i monia.

³Bo mosia in nopodondong in dondong i Musa, mogogundoi i Allah, bo dondong i Adí in Domba. Nanaa in dondong tatua, “Tuhan, Allah Inta Totok in Mokawasa, totuu moḷoben bo mokoherang in bayongan inta inaidan-Mu! Datu in bayongan bangusa,[7] totuu moadil bo mobanar in bayongan oaid-Mu!

⁴Ki inebí in diá moondok kon ini-Mu, Tuhan? Ki inebí in doí mopotaau in kamuliaan-Mu? Tongábí Iko i motusi. Bayongan in bangusa mamangoibí mosumba kon ini-Mu sin aid-Mu mita inta moadil ain inontong in bayongan intau.”

⁵Onda intua inontongku in Baḷoi Tuhan kon soroga nobukat, bo ḷoḷaigan i Tuhan in kon bonunea.

⁶Bo malaekat taya pitu takin roriga pitu tatua iḷumuai nongkon Baḷoi i Allah. Mosia in nogiḷambung in ḷambung nobudó inta moaḷus totok bo mopouḻi-uḻinag. Bo dodob monia pinakéan in sabuk inta pinomia nongkon buḷawan.

⁷Onda intua, tobatú mahaḷuk inta nongkon sigad in mahaḷuk opat tatua in nobogoi kon malaekat pitu tatua in palo pitu inta nongkon buḷawan bo inta nopuḻing in torú i Allah, Ki Allah inta nobiag mononoi.

⁸Dá Baḷoi i Allah tatua in nopuḻingdon in poyok kamuliaan bo kawasa i Allah. Bo kon dodai in roriga pitu inta dinia in malaekat tatua diápa mopaḷut, yo diábí in tobatúmai intau in motaau tumuot kon Baḷoi Allah tatua.