Read Mongondow WAHYU 17 Bible Online

WAHYU 17 - Mongondow bible

WAHYU 17

¹Onda intua tobatú malaekat nongkon malaekat pitu inta nokadai kon palo pitu tatua in namangoi kon inakó bo noguman, “Igai, bá popoontongku kon inimu in hukuman kon sundaḷ moḷoben, tuata in kotá moḷoben inta pinosindog kon bingkí in ongkag mita.

²Datu mita kon dunia naa ain nogaid kon inta mokotor takinnea, bo bayongan in intau kon dunia naa ain noḷoḷangu sin nonginum kon anggur inta ain kinotorannea.”

³Bo akuoi in kinawasaan in Roho i Allah bo dinia in malaekat tatua kon padang gurun. Kon tua akuoi in nokoontong kon tobatú bobay inta iḻimitú kon tudu in tobatú mahaḷuk inta nopars in batangannea. Mahaḷuk tatua nopuḻing in pais inta pohojat kon i Allah. Pitu in uḷu in mahaḷuk tatua bo mopuḷú in tungoinea.

⁴Bobay tatua nogi ḷambung in ḷambung nopars bo nopura noguyang, bo iḷambáan in buḷawan mita, permata bo mutiara. Sia in kokada-kadai in tobatú palo buḷawan inta nopuḻing in soaḷ mita inta moraat bo mokotor, bungai mita in aid monia inta mongokotor.

⁵Kon pogotnea in pinaisan in tangoi inta mangaḻenea “noibuni”. Tangoi tatua in “Babel inta moḷoben ki iná in bayongan bobay inta sundaḷ bo intau mita moromú kon dunia.”

⁶Bo inontongku in bobay tatua noḷoḷangu in dugú in umat mita i Allah bo dugú in intau mita inta nobaḻí sakusi mita i Yesus. Naonda inontongku in bobay mita tatua, noherangdon totok in akuoi.

⁷Dá malaekat tatua in noḻibó kon inakó nanaa, “Nongonu sin iko in moherangbí? Yo pogumankudon kon inimu onu inta noibuni kon bobay tatua bo onu inta noibuni kon mahaḷuk inta sinakoiannea tatua, mahaḷuk inta pitu in uḷu bo mopuḷú in tungoi.

⁸Mahaḷuk tatua nokoimontan bidon in nobiag in koḻipod, táe masai naa in diádon, tongá topípabí bo ḷumuai in sia nongkon tampat pohohukuman kon irang bo sia in mopobayádon in tampat koyoyangan. Intau mita kon dunia naa inta diá pinais in tangoi monia kon bonu in buk intau nobiag mulaipa kon dunia naa diápa pinomia, yo moherangbí aka mokoontong kon mahaḷuk tatua. Sin mahaḷuk tatua koḻipod in pernabí nobiag, táe tanaa in diá bidon, tongá buidon moitukat.

⁹Kon soaḷ mita nanaa paraḷu oyúon in hikmat bo pongortian. Uḷu pitu tatua, mangaḻenea in buḷud pitu; buḷud mita inta iḻitúan in bobay tatua. Bo uḷu pitu tatua mangaḻenea in datu pitu:

¹⁰ḻima nongkon sigad monia tua ain noḷabú, tobatú in nomarentapa, bo tobatú doman in diápa namangoi. Aka sia in mamangoi, yo momarentapa motoyong in sia.

¹¹Bo mahaḷuk inta perna nobiag koḻipod, táe diádon in tanaa mako, tua in datu inta iwaḷunea. Sia tua in tobatúbí doman datu kon sigad nayapitu tua, inta masa naa koyogot mayá in tampat koyoyangan monia.

¹²Tungoi mopuḷú inta inontongmu tua in datu mopuḷú inta diápa nomangkoi nomarenta. Táe mosia ogoianbí in kawasa momarenta saḷaku datu moyotakin in mahaḷuk tatua kon bonu in tojam koonggotnea.

¹³Mosia naa in notobatúbí kon singog bo makusud kon moposarakan in ropot bo kawasa monia kon mahaḷuk tatua.

¹⁴Mosia in noyopakat kon moparang kon i Adí in Domba tatua. Táe ki Adí in domba tatua takin dumodudui-Nea mita inta mosatia bo inta ain inoiní bo piniḻí-Nea tatua in monaḷow kon datu mita tatua, sin Siata in Tuang in bayongan tuang, bo Datu in bayongan datu.”

¹⁵Malaekat tatua in noguman doman, “Tubig inta inontongmu tatua, tampat inta iḻitúan in sundaḷ tatua, tuata in bangusa mita, rayat mita, negara mita bo bahasa mita.

¹⁶Tungoi mopuḷú bo mahaḷuk inta inontongmu tua, moyaatbí in ginanea kon sundaḷ tatua. Daitonbí agowon monia in bayongan kapunyaannea, bo pilangan monia. Kaanonbí monia in tapúnea bo payongon monia in tuḷu.

¹⁷Sin gina monia sinimbayagandon i Allah sinbá mogaid kon inta kinoibog-Nea. Sinobatúdon i Allah in mosia sinbá moyopakatdon moposarakan in kawasa monia kon mahaḷuk tatua, sinbá mahaḷuk tatua in momarenta modapot in mobaḻí onu inta pinoguman i Allah.

¹⁸Bobay inta inontongmu tatua in kotábí moḷoben, inta nomarenta kon datu mita kon dunia naa.”