Read Mongondow WAHYU 20 Bible Online

WAHYU 20 - Mongondow bible

WAHYU 20

¹Nopaḷut mako intua, akuoi in nokoontong kon tobatú malaekat noponag nongkon soroga. Malaekat tatua kokada-kadai in kokunsi in irang popatoi bo rante moḷoben.

²Bo dinomoknea in naga tatua inta uḷag guranga, inta Ibilis ande dimukud moraat tatua bo sinokignea in rante tatua toribu notaong in koonggotnea.

³Onda intua pinogonagnea bui in naga tatua kon irang popatoi bodongka sinaḷobannea poḷat kinunsían, sinbá naga tatua in diádon monguboḷ kon bangusa mita kon tungkuḷ in diápa modait in wakutu toribu notaong. Mopaḷut mako in wakutu tatua sia in buḻianpa motoyong.

⁴Bo akuoi in nokoontong kon ḷoḻitúan mita pomomarentaan tatua inogoian in kawasa monantú kon hukuman. Inontongku doman in dimukud in intau mita inta sinokoratá popisí in nopotaau in habar soaḷ ki Yesus, bo lantaran nopoyaput in koyow i Allah. Mosia tua in diábí nosumba kon mahaḷuk tatua andeka patongnea bo doí doman sinandaan kon pogot bo kon ḻima monia; dá mosia in nobiag bui bo nomarenta saḷaku datu moyotakin i Kristus toribu notaong in koonggotnea.

⁵Naadon inta dungkuḷ totok in intau mita minatoi biniag bui. (Táe intau mita minatoi ibanea in diápabí biniag bui kon bonu in toribu notaong tatua.)

⁶Kosanangdon totok in intau mita inta noitakin biniag bui dungkuḷ tua. Mosia tua in patusbí mobaḻí kapunyaan i Allah. Sin popatoi induanea in diá bidon mongawasa kon i monia. Mosia tua in mobaḻí imang mita i Allah bo i Kristus, bo mosia in momarenta moyotakin i Kristus toribu notaong in koonggotnea.

⁷Naonda in toribu notaong tatua mopaḷutdon, Ibilis in buḻiandon bui nongkon tampat pinohukuman kon inia,

⁸bo sia in maya-mayá mako monguboḷ kon bayongan in bangusa inta noibaya-bayá mako kon dunia naa, tuata inta kon Gog bo Magog. Sipunon in Ibilis in mosia sin moparang, mobayong totok in mosia naonda bo bungaion kon dagat.

⁹Dá mosia irumangkap kon bayongan in dunia bodongka nongopung kon ḷoḷaigan in umat i Allah bo kon kotá inta kinotabi i Allah. Táe tuḷu in noponag nongkon ḷangit bo nomokak kon i monia.

¹⁰Onda intua Ibilis inta nonguboḷ kon i monia tua, pinogambat kon yua-yuak in tuḷu bo balerang. Tua in tampat pinoḷumbúan kon mahaḷuk bo intau mita inta deeman totuu nabi, bo roriga monia tua in diábí mogoga-gogai doḷom bo singgai.

¹¹Nopaḷut mako kon tua, akuoi in nokoontong kon tobatú tampat pomomarentaan inta nobudó bo inta noḷoben bo Sia in iḻimitú kon tua. Ḷangit bo butá noinggamá nongkon tayowon-Nea, sahingga in diádon bui koontongan.

¹²Bo akuoi in nokoontong kon intau mita minatoi, guyanga-mongoadí sinimindog kon tayowon tampat pomomarentaan tatua. Bo tobatú buk ibanea in binukádon, tuata in Buk Intau Nobiag. Onda intua hukuman pinoḷabúdon kon intau mita minatoi, podudui in oaid monia podudui kon inta ain pinais kon bonu in buk mita tatua.

¹³Bo dagat noposarakan domandon in intau mita inta kon bonunea. Popatoi bo dunianea in noposarakan doman in intau mita minatoi inta kon i monia. Bo intau minatoi mita tatua in komintan pinopoḷabúan in hukuman pinodudui kon oaid monia.

¹⁴Onda intua popatoi bo dunianea in pinogambat kon bonu in dagat in tuḷu. (Dagat in tuḷu tanaa in kopatoian inta induanea.)

¹⁵Intau mita inta tangoi monia diá pinais kon bonu in Buk Intau Nobiag, pogambat kon bonu in dagat tuḷu.