Read Mongondow WAHYU 21 Bible Online

WAHYU 21 - Mongondow bible

WAHYU 21

¹Bo akuoi in nokoontong kon ḷangit mobagu bo butá mobagu. Ḷangit bo butá inta muna in diádon, takin dagat in noinggamá domandon.

²Dá akuoi in nokoontong kon kotá motusi tatua, tuata in Yerusalem inta mobagu, noponag nongkon soroga i Allah. Kotá tatua in pinosadia naonda bo nonikaan bobay inta pinakeangan sin mokipodungkuḷdon kon nonikaan ḷoḷaki.

³Bo akuoi in nokodongog kon baḷú moropot nongkon tampat pomomarentaan tatua, noguman: “Indoiai! Tanaa mako tampat pogogutunan i Allah kon yua-yuakdon in intau! Sia in mobiagdon takin i monia, bo mosia in mobaḻídon umat-Nea. Bo ki Allah in mogutundon kon sigad monia bo mobaḻídon ki Allah monia.

⁴Paḻitandon i Allah in bayongan ḷuá kon mata monia. Diá bidon in popatoi. Diá bidon in mokoajar kon gina. Amui ande ombaḷ onu inta mokonakitpa kon gina in diá bidon. Soaḷ mita inta nokoyongandon ain noinggamá.”

⁵Bo Sia inta iḻimitú kon tampat pomomarentaan tatua in noguman, “Tanaa komintandon binaḻí-Ku mobagu!” Sia in noguman doman kon inakó, “Paisdon in naa, sin singog mita tanaa in totuubí bo motaaubí pirisayaan.”

⁶Bo Sia in noguman, “Komintandon nobaḻí! Akuoi naa in ki Alpa bo ki Omega, ki Inta muna-munamai bo ki Inta tumi-tumimai, Akuoibí naa in ki Tuhan nongkon pinomangkoian nodapot in pangabisan. Intau inta moyogang in poinumon-Ku, bo tongábí ogoi pomorosen nongkon bokaká inta mobogoi in kobiagan.

⁷Intau mita inta mountung, mokouḻí kon soaḷ mita natua nongkon i-Nakó, bo Akuoi in mobaḻí ki Allahnea, bo sia in mobaḻí ki adí-Ku.

⁸Táe intau mita inta ondokon, mosia inta diá mosatia, intau moromú, moḷoḻimod, intau mokotor, intau mongonggaing, mososumba kon berhala bo komintan intau mouboḷ, toko pogambat kon bonu in dagat tuḷú bo balerang inta kodoko-dokot, tuata in popatoi inta induanea.”

⁹Noiduduimai kon tua noiangoidon in tobatú malaekat inta nongkon sigad in malaekat taya pitu inta nokadai kon palo mita inta nopuḻing in roriga pangabisan tatua. Sia in noguman kon inakó, “Igai! Poontong-Ku kon inimu in Nonikaan, tuata in ki buḷoi i Adí in Domba.”

¹⁰Dá Roho i Allah in nongawasa kon inakó, bo malaekat tatua in nodia kon inakó minayá kon tudu in buḷud inta moḷantud totok. Bo sinundúnea kon inakó in Yerusalem, kotá inta mokudus tatua, kotá inta noponag nongkon soroga inta nongkon i Allah,

¹¹kotá tatua nopuḻing in kamuliaan i Allah bo sindarnea in naonda bo permata inta totok mogaga, naonda bo batu permata inta mobaḷu-baḷui in batangannea permata baiduri notarang naonda bo kristal.

¹²Dindingnea in moḷoben bo moḷantud, ngaranea in mopuḷú bodoyowá, bo iḷukadan in malaekat mopuḷú doman bodoyowá. Kon ngara mita tatua pinaisan in tangoi mita in mopuḷú bodoyowá suku in Israel.

¹³Toto-toḷu in ngara tumayow kon tobatú noarah; toḷu kon dotá in pomukaan, toḷu kon dotá in toḷatan, toḷu kon dotá in utuan, bo toḷu doman kon dotá in toyopan.

¹⁴Dinding in kotá tatua in pinosindog kon tudu in batu mopuḷú bodoyowá. Bo batu mita tatua in sinoko paisan tangoi in rasul mopuḷú bodoyowá. Mosia tua in rasul mita i Adí in Domba tatua.

¹⁵Kon Malaekat inta noyosingogku tatua oyúon in tungkud pogogukur inta pinomia nongkon buḷawan sin pogogukur kon kotá, kon ngaranea mita bo kon dindingnea.

¹⁶Kotá tatua notonggopat, ḷanggó bo ḷobennea in notongkai. Malaekat tatua nogukur kon kotá tatua takin tungkud pogogukurnea tatua. Inukur monik dá doyowa noribu bo opat nogatut nokilometer;[9] Koḷoben bo koḷantudnea in notongkai in koḷanggónea.

¹⁷Naonda in malaekat tatua nogukur kon dindingnea, dá onom nopuḷú nometer[10] in koḷantudnea[11]. Ukuran inta pinaké in malaekat tatua in ukuran inta pinaké in intau.

¹⁸Dinding in kotá tatua pinomia nongkon batu permata inta norupa-rupamai in batangannea, aka kotánea yo pinomia nongkon buḷawan taakan, nosilang naonda bo kaca.

¹⁹Pondasi in kotá tatua iḷambáan in noyagi-yagimai in batu permata. Batu in pondasi inta muna in inaidan nongkon batu permata baiduri pandan, inta induanea in nongkon batu nilam, intoḷunea nongkon batu yakut, inggopatnea nongkon batu zamrud,

²⁰Iḻimanea nongkon batu baiduri sepah, inggonomnea in nongkon batu delima, impitunea in nongkon batu ratna cempaka, iwaḷunea nongkon batu pirus, insiownea nongkon batu topas, impuḷúnea nongkon batu krisopras, impuḷú bomitánea in nongkon batu lazuardi, bo impuḷú bodoyowánea in nongkon batu kecubung.

²¹Ngara mopuḷú bodoyowá tatua in mutiarabí inta mopuḷú bodoyowá doman. Pomuḷoi in ngara pinomia nongkon mutiara tobatú doman. Daḷan kon kotá tatua in pinomia nongkon buḷawan taakan, nosilang naonda bo kaca inta mopouḻi-uḻinag.

²²Diábí inontongku in Baḷoi Allah kon bonu in kotá tatua, sin Baḷoi Allah in ki Tuhanbí tontaní, ki Allah inta totok mokawasa, bo Adí in Domba tatua.

²³Kotá tatua diá bidon paraḷu simbayagan mata in singgai ande buḷan, sin kamuliaan i Allah aindon nokosimbayag kon tua, bo ki Adí in Domba in nobaḻí togánea.

²⁴Bangusa mita kon dunia naa in mayábí mongin bayagnea tatua, bo datupa mita in modiabí kon kapunyaan mita monia pobayá in kotá tatua.

²⁵Tumongo singgai ngara mita tatua diábí ḻingko-ḻingkopan, sin diá bidon doḷom kon tua.

²⁶Kaoyúonan bo kahoromatan in bangusa mita in diaanbí kon bonu in kotá tatua.

²⁷Táe intau mita inta nogaid kon soaḷ mita inta mokorongó, ande intau mita inta mongouboḷ, yo singogon mako mopoḷok, mosia inta nogaid kon mokotor, diábí moituot kon tua. Inta motaau tumuot in tongábí intau inta tangoinea in pinais kon bonu in Buk Intau Nobiag, buk i Adí in Domba tatua.