Read Mongondow WAHYU 22 Bible Online

WAHYU 22 - Mongondow bible

WAHYU 22

¹Bo malaekat tatua in nopoontong doman kon inakó in ongkag inta mobogoi in kobiagan. Ongkag tatua in nosilang totok naonda bo kristal inta moiḻig nongkon tampat pomomarentaan i Allah bo i Adí in Domba tatua,

²inta kon yua-yuak in kotá tatua. Kon bingkí posiḷosi in ongkag tatua oyúon in pangkoi mita in kobiagan inta nomungai kopuḷú bodoyowá in totaong, tobuḷan komintan. Daunnea pinaké nongundam kon bangusa mita.

³Kon bonu in kotá tatua diá bidon in kotugatan kutuk i Allah. Tampat pomomarentaan i Allah bo i Adí in Domba tatua in kon bonudon in kotá tatua. Bobantung-Nea mita moibada kon i-Nia.

⁴Mosia in mokoontong kon pogot-Nea, bo tangoi-Nea in paisondon kon pogot monia.

⁵Mosia in diá bidon moparaḷu kon togá andeka bayag mata in singgai, sin diá bidon modoḷo-doḷom in kon tua, bo ki Tuhan Allahbí tontaní in monimbayag kon i monia. Bo mosia in momarentabí saḷaku datu modapot in kopaḷutannea.

⁶Nopaḷut mako malaekat tatua in noguman kon inakó nanaa, “Singog mita tanaa in totuubí bo motaaubí pirisayaan. Ki Tuhan Allah inta nobogoi in Roho-Nea kon nabi mita, aindon nopotabá in malaekat sin mopoontong kon bobantung-Nea mita in onu inta ḷagidon mobaḻí.”

⁷“Tarukiradon in naa!” Guman i Yesus, “Akuoi in ḷagi bidon mamangoi. Koḷungangadon totok in intau inta umuran dinumudui kon singog mita inta pinotaau kon bonu in buk tanaa!”

⁸Bo akuoi, ki Yohanes, ain nokodongog bo nokoontong kon bayongan in tanaa. Naonda in akuoi nokodongog bo nokoontong kon tua, akuoi in sinumungkud kon tayowon malaekat inta ain nopoontong in bayongan tua kon inakó, makusudku in mosumba kon inia,

⁹táe sia in noguman kon inakó “Donaai momia naníon, táe sumbadon in ki Allah! Sin akuoi naa in atabí doman naonda bo iko, bo ná doman tai utatmu mita inta nabi bo bayongan intau inta dinumudui kon koyow mita inta kon bonu in buk tanaa!”

¹⁰Bo malaekat tatua in noguman bui kon inakó, “Dika mobuni kon tosingogon mita inta kon bonu in buk tanaa, sin diádon moonggot kobaḻían intua komintan.

¹¹Intau inta moraat, pomayádon mako in umuran mogaid kon moraat; intau inta monajis, pomayádon mako in mokoponajis kon awaknea tontaní; intau inta dinumudui kon ibog i Allah, bo intau inta kobiagannea in tongádon mogaid kon kopontingan i Allah, yo pomayádon mako in sia tongá mogaid kon natua kon i Allah.”

¹²“Tarukira in naa!” guman i Yesus, “Diádon moonggot bo Akuoi in mamangoi modia kon boḻi in pinogaidan in intau podudui kon onu inta ain inaidannea.

¹³Akuoibí naa inta muna bo inta pangabisan, Akuoibí in ki Tuhan nongkon pinomangkoian nodapot kon pangabisan.”

¹⁴Mosanangdon totok in intau inta nomatá kon jubahnea kinodarit totok. Mosia in motaau mokaan kon bungai in pangkoi in kayu kobiagan bo tumuot kon bonu in kotá mongin ngaranea.

¹⁵Táe intau mita inta nogaid kon soaḷ mita inta moromú, inta moibog monggaing, bo intau mita inta mogaid kon soaḷ mita inta mokotor, inta moḻimod, mosumba kon berhala, bo intau mita inta mouboḷ, pinomayá tosingogon ande oaid, komintan intau natua, kon ḷuai in kotá in tampatnea.

¹⁶“Akuoi, ki Yesus, ain nopotabá mangoi in malaekat-Ku kon i monimu, sinbá sia mopotaau in soaḷ mita inta pakéon kon kopontingan in jamaat mita. Akuoi naa in buí i Daud; Akuoibí naa in tundi dotá in pomukaan inta motarang totok tua.”

¹⁷Roho i Allah bo Nonikaan Bobay in noguman, “Koḻigai!” Ki ine in nokodongog kon naa musti moguman doman, “Koḻigaidon!” Ki ine in moyogang, pogamádon in sia kon tubig inta mobogoi in kobiagan tatua, bo diábí uboḻian.

¹⁸Kon i monia inta nokodongog kon onu inta pinoguman kon bonu in buk tanaa, akuoi, ki Yohanes, mobogoi in tompoingat tanaa; aka intau modugang kon tosingogon inta pinotaau tanaa, dá dugangan doman i Allah in roriga mita kon inia ná inta ain pinais kon bonu in buk tanaa.

¹⁹Bo aka oyúon in intau in monggaat kon tobatúmai in tosingogon inta pinoyaput tanaa, dá gaatan doman i Allah in tonsilainea inta ná ain pinais kon bonu in buk tanaa, silainea inta nongkon pangkoi in kayu inta mobogoi in kobiagan bo nongkon kotá motusi tatua.

²⁰Sia inta nopoyaput in koyow mita tanaa in noguman, “Totuu, Akuoi in ḷagi bidon mamangoi!” Amin! Angoidon oo Tuhan Yesus!

²¹Poigumon mako barakat bo totabi Tuhan Yesus in umuran kotaki-takin monimu komintan![12] Amin.