Read Mongondow WAHYU 5 Bible Online

WAHYU 5 - Mongondow bible

WAHYU 5

¹Noiduduimai kon tua akuoi in nokoontong kon ḻitodan buk kon ḻima koḷanan i Intau inta iḻimitú kon tampat pomomarentaan tatua. Buk tatua nopuḻing in pais kon posi-ḷosi bo kinompitan in meterai pitu.

²Bo akuoi in nokoontong kon tobatú malaekat inta motorindog totok nomaḷú noropot totok nanaa: “Ki ine in motaau mobuká kon ḻitodan in buk tanaa bo mobuka kon meterainea mita?”

³Táe pinomayá kon soroga, ande kon dunia naa, ande kon ḻimonag in butá[3] Diábí tobatúmai intau in nokosanggup nobuká kon buk tatua, bo noindoi kon bonunea.

⁴Dá nongombaḷ in akuoi takin kuyang in gina sin diá tobatúmai intau in patus mobuka kon buk tatua bo moindoi kon bonunea.

⁵Bo tobatú in intau nongkon sigad in itoi mita tatua in noguman kon inakó, “Donaai mongombaḷ! Indoiai! Singa nongkon suku in Yohuda, buí i Daud inta moḷoben, ain nountung. Sia in mokosanggup moḷosi kon meterai pitu tatua bo mobuká kon buk tatua.”

⁶Noiduduimai bui kon tua akuoi in nokoontong kon tobatú ki Adí in Domba sinimindog kon yua-yuak in tampat pomomarentaan tatua bo iḻibu in mahaḷuk opat bo bayongan itoi tatua. Ki Adí in Domba tatua in nádon onda bo ain iratá. Pitu in tungoi-Nea bo pitu doman i mata-Nea. Tuata in Roho i Allah inta ain pinotabá-Nea kon bayongan dunia naa.

⁷Onda intua ki Adí in Domba tatua inumuna bo nogamá kon ḻitodan in buk tatua nongkon ḻima koḷanan in intau inta iḻimitú mako kon tampat pomomarentaan tatua.

⁸Koyogot in ki Adí in Domba tatua nogabat kon ḻitodan in buk tatua, sinumungkudon in mahaḷuk opat tatua takin itoi mita doyowa nopuḷú bo opat kon tayowon-Nea. Mosia notukid in kecapi bo palo buḷawan inta binonuan in kamania, tuata in sambayang mita in umat i Allah.

⁹Mosia nopodondong in tobatú dondong mobagu, nanaa: “Iko in patus mogamá kon buk tatua bo moḷosi kon meterainea mita. Sin Iko ain iḻimod, bo dugú-Mu tatua, in pinoguboḻi-Mu kon intau nongkon bayongan suku, bahasa, negara bo bangusa sin ogoi kon i Allah.

¹⁰Binaḻí-Mudon in mosia tobatú dodatuan inta nobaḻí imang mita, sinbá mosia in mogaid kon oaidan i Allah naton, bo momarenta kon dunia naa.”

¹¹Noiduduimai oyúon in inontongku bui. Akuoi in nokodongog kon singog in malaekat inta ribuan sedang bo jutaanbí in kobayongnea. Mosia in sinimindog iḻimibu kon tampat pomomarentaan bo kon mahaḷuk opat tatua takin itoi mita tatua.

¹²Bo mosia in nodondong noropot nanaa, “Ki Adí in Domba inta ain iratá tatua, patusbí motarima kon kawasa, kaoyúonan, kabijaksanaan bo ropot; Sia in patusbí horomaton, poḷantudon bo dayo-dayowon!”

¹³Bo akuoi in nokodongog kon bayongan in mahaḷuk kon ḷangit, kon butá, kon ḻimonag in butá; kon bonu in dagat--singog mopoḷok mako bayongandon mahaḷuk kon dunia naa, nodondong nanaa, “Sia inta iḻimitú kon tampat pomomarentaan tatua bo ki Adí in Domba tatua, mosia tuata inta popoyaputan in bayongan dodayow, horomat, poḷantudon bo mokawasa modapot in mononoi!”

¹⁴Dá mahaḷuk opat tatua in notubag: “Amin!” Bo itoi mita tatua in sinumungkud bo nosumba.