Read Mongondow WAHYU 6 Bible Online

WAHYU 6 - Mongondow bible

WAHYU 6

¹Onda intua inontongku ki Adí in Domba tatua noḷosi kon meterai muna inta kon sigad in meterai pitu tatua. Bo dinongogku in tobatú mahaḷuk inta kon sigad in mahaḷuk opat tatua in noguman, “Igai!” Singog-Nea naonda bo singog in gotup.

²Dá akuoi in nokoontong kon tobatú kabaḷo nobudó. Intau inta sinumakoi kon kabaḷo tatua in nokadai kon piot, bo sia inogoian doman in tobatú mahkota. Sia minayá in muna saḷaku inta nountung inta minayá notayak kon bá mountung.

³Onda intua ki Adí in Domba tatua in noḷosi kon meterai induanea, bo dinongogku in mahaḷuk induanea in noguman, “Igai!”

⁴Bo namangoidon in tobatú kabaḷo ibanea, nopura in batangannea naonda bo dokot in tuḷu. Ki Inta sinumakoi kon kabaḷo tatua inogoian in kawasa monginggamá kon dodamean kon dunia naa, sinbá intau mita in mosiḻimodandon. Dá sia inogoian in tobatú pitow moḷoben.

⁵Naonda in ki Adí in Domba nomukat kon meterai intoḷunea, dinongogkudon in mahaḷuk inta intoḷunea in noguman, “Igai!” Akuoi inimindoi, dá inontongkudon in tobatú kabaḷo morondí. Ki inta sinumakoi kon kabaḷo tatua in nokadai kon pononimbangan.

⁶Bo akuoi in nokodongog kon naonda bo singog inta nomaḷú nongkon yua-yuak in mahaḷuk opat tatua, noguman, “Gandum mopia toliter, pogaidan tosinggai in boḻinea, bo gandum ibanea toḷu noliter, boḻinea in pogaidan doman tosinggai. Táe dika momoguyaat kon pangkoi mita in zaitun bo gobá in anggur!”

⁷Noiduduimai kon tua ki Adí in Domba tatua in nomukatdon kon meterai inggopatnea. Bo dinongogku in mahaḷuk inta inggopatnea tatua noguman, “Igai!”

⁸Bo inontongku in tobatú kabaḷo inta nobilai. Ki inta sinumakoi tua tangoinea in ki Maut. Bo dumuduianmai kon inia in dodatuan popatoi.[4] Tokoar in kawasa kon dunia naa in pinosarakan kon i monia, sinbá mosia in motaau moḻimod popototoi kon parang, malarat bo popototoi kon takit mita bo popototoi kon mahaḷuk mita inta mokokaan kon intau.

⁹Noiduduimai kon tua ki Adí in Domba tatua in nomukatdon kon meterai iḻimanea. Bo inontongku kon ḻimonag in meja pototuduan kon sosumba oyúon in dimukud mita in intau inta minatoi iḻimod sin popisí nopotaau in koyow i Allah inta ain pinirisaya monia.

¹⁰Mosia in nomaḷú noropot in noguman, “O Tuhan inta totok in Mokawasa, inta mokudus bo inta mobanar! Naondapa degá in koonggotnea bo adilon-Mu in intau mita kon dunia naa, bo hukumon-Mu in mosia inta noḻimod kon inami?”

¹¹Mosia in sinukidan in jubah nobudó. Bo mosia in pinoki pogogaianpa bui motoyong sin pogoḷa-goḷatan kon kotompodan in kobayong yobayat mita inta topogaidan monia bo ki utat mita monia inta ḻimodon ná mosia.

¹²Bo akuoi in nokoontongdon bui kon i Adí in Domba tatua nomukat kon meterai inggonomnea. Bo nobaḻídon in ḻinug inta totok mokoondok kon dunia naa. Mata in singgai irumondí naonda bo didit morondí inta nokasar bo buḷan sinimimpuya naonda bo dugú.

¹³Tundi mita kon ḷangit nongoḷabú kon butá naonda bo bungai in ara inta diápa noguyang táe noḷabú sin inirup in tompot inta moropot.

¹⁴Ḷangit in kinimiot naonda bo karatas inta iḻitod. Bayongan in buḷud bo pulau nodait pinamping nongkon tampatnea mita.

¹⁵Bayongan datu kon dunia naa bo intau mita moḷoben, panglima mita in tontara, intau mita nooyúon, intau mita inta kokawasa, bo intau mita ibanea, pinomayá ata andeka intau inta nobebas, komintan norogadop kon bubú mita in butá bo kon sigad mita in batu in buḷud.

¹⁶Bo mosia in nomaḷú in noguman kon batu mita, “Bumbunaidon in kami! Bo bunidon kon i-Nia inta iḻimitú kon tampat pomomarentaan tatua bo nongkon torú Adí in Domba tatua!

¹⁷Singgai inta totok mokoondok moiangoidon, bo mosia in mulaidon tumorú, bo diábí doman tobatúmai intau mokosanggup tumayow mako kon i monia!”