Read Mongondow WAHYU 7 Bible Online

WAHYU 7 - Mongondow bible

WAHYU 7

¹Nopaḷut mako kon tua, akuoi in nokoontong kon malaekat opat inta sinimindog kon siku in dunia opat. Mosia in nomompon kon tompot inta nongkon siku opat in dunia naa sinbá diádon in tompot mogirup kon toba, kon dagat bo kon kayu mita.

²Bo akuoi in nokoontong kon tobatú malaekat ibanea inta noitukat nongkon dotá in pomukaan singgai. Sia in nodia kon meterai nongkon i Allah inta nobiag. Noropot in pinogogoinínea kon malaekat opat inta ain nokouḻí kon kawasa nongkon i Allah sin pomoguyaat kon butá bo dagat.

³Malaekat tatua in noguman: “Donaaipa momoguyaat kon butá andeka kon dagat, ande pangkoi mita in kayu aka diápa kinompitan nami in meterai in pogot mita in intau inta ain nogaid kon oaidan mita i Allah naton.”

⁴Bo pinotaaudon kon inakó kon mogatut bo opat nopuḷú bo opat noribu in kobayong in intau inta kinompitandon in meterai nongkon i Allah kon pogot monia. Intau mita tatua in ginamá nongkon mopuḷú bodoyowá nosuku in bangusa Israel;

⁵pomuḷoi in suku pinogamáan kon tumopopuḷú bodoyowa noribu in intau. Naa in tangoi in suku mita Israel tatua: Yohuda, Ruben, Gad,

⁶Asyer, Naptali, Manasye,

⁷Simeon, Lewi, Isakhar,

⁸Zebulon, Yusup bo Benyamin.

⁹Nopaḷut mako kon tua akuoi in nokoontongpa bui kon intau inta modamaḷ totok, diádon tobatúmai in intau in mokoiyap kon kobayongnea tua. Mosia tua in intau mita inta nongkon bayongan bangusa, suku, negara bo bahasa. Mosia in sinimindog kon tayowon in tampat pomomarentaan tatua bo kon tayowon i Adí in Domba. Mosia komintan nogiḷambung in jubah nobudó bo kokada-kadai doman tanga in kayu palem.

¹⁰Mosia in nomaḷú noropot nanaa: “Kasaḷamatan naa in tongábí nongkon i Allah naton inta iḻimitú kon tudu in tampat pomomarentaan bo nongkon i Adí in Domba tatua!”

¹¹Bayongan in malaekat sinimindog iḻimibu kon tampat pomomarentaan tatua bo kon itoi mita takin mahaḷuk opat tatua. Malaekat mita tatua in sinumungkud kon tampat pomomarentaan tatua bo nosumba kon i Allah.

¹²Mosia in nosingog nanaa: “Amin! Dinayo-dayowdon in ki Allah naton inta momulia bo mobijaksana. Sia patus motarima kon sukur mita bo horomat. Sia in mokawasa bo moropot modapot in kopaḷutannea! Amin.”

¹³Bo tobatú in intau nongkon sigad in itoi mita tatua in noḻibó kon inakó: “Ki inebí in intau mita inta nogi jubah mita nobudó tanion? Bo namangoi nongkon onda in mosia nion?”

¹⁴Dá tubagku kon inia: “Diábí kinotaauanku, ki Tuangbí in nonotaau kon tua.” Dá sia in noguman bui kon inakó: “Mosia naa in intau mita inta nosaḷamatdon nongkon roriga inta moḷoben, bo ain binatáan monia kinobudó in jubah monia kon bonu in dugú i Adí in Domba tatua.

¹⁵Manangka intua mosia in sinimindog kon tayowon pomomarentaan i Allah, bo moibada kon i-Nia doḷom bo singgai kon bonu in Baḷoi Allah. Bo Sia inta iḻimitú kon tudu in tampat pomomarentaan tatua in mamangoi kon yua-yuak monia bo mogoḻiung kon i monia.

¹⁶Mosia in diá bidon mokorasa kon gogoyon ande moyogang. Mata in singgai ande patúnea in diá bidon mokopokak kon i monia.

¹⁷Sin ki Adí in Domba inta iḻimitú kon tampat pomomarentaan tatua in mobaḻí gombala monia, bo diaan-Nea in mosia mayá kon bokaká in tubig inta mokobiag. Bo inggamáandon i Allah in bayongan ḷuá kon mata monia.”