Read Mongondow WAHYU 9 Bible Online

WAHYU 9 - Mongondow bible

WAHYU 9

¹Bo malaekat iḻimanea in nogirup kon torompetnea, bo akuoi in nokoontong kon tobatú tundi noḷabú nongkon ḷangit. Tundi tatua inogoian kokunsi in irang popatoi.[5]

²Dá tundi tatua in nomukatdon kon ḷoḻingkop in bubú in irang popatoi tatua, dá iḷumuaidon in poyok nongkon bonunea naonda bo poyok kon tungku moḷoben. Mata in singgai bo baḷangon sinimindip lantaran poyok inta nongkon bubú tatua.

³Bo nongkon poyok tatua iḷumuaidon in pangkoḷá mita bo namangoi in butá. Pangkoḷá mita tatua inogoian in kawasa inta ná inta inogoi kon bambau.

⁴Mosia tua in diábí inogoi momoguyaat kon bonok, ande kayu mita, ande pinomuḷa ibanea mako. Táe ogoibí in mosia mogaḷow kon intau mita inta diá kinompitan in meterai i Allah kon pogotnea.

⁵Táe diábí inogoi in mosia moḻimod kon intau mita tatua, tongábí mopororiga kon i monia kon bonu in ḻima nobuḷan. Roriga inta nouḻí monia nongkon pangkoḷá mita tatua in naonda doman bo roriga bangiton in bambau.

⁶Kon bonu in ḻima nobuḷan tua mosia moramuji bá matoidon, táe diápabí matoi in mosia; mosia in moibogdon matoi, táe noyayúpabí in popatoi kon i monia.

⁷Batangan in pangkoḷá mita tatua in naonda bo kabaḷo inta nobasadiadon moparang. Kon uḷu monia tua oyúon in naonda bo mahkota buḷawan, pogot monia in naonda bo pogot in intau.

⁸Buok monia in naonda bo buok in bobay. Ingipon monia in naonda bo ingipon in singa.

⁹Dodob monia inoḻingoian in naonda bo ḷambung uatoi. Singog in koḻikip monia in naonda bo singog in kereta mita inta inugut in kabaḷo mayá moparang.

¹⁰Mosia oiputan bo totogodan naonda bo bambau. Kon iput monia tua in kawasa inta mopororiga kon intau kon bonu in ḻima nobuḷan.

¹¹Oyúon datu nomarenta kon i monia, datu tatua in ki malaekat inta noḷukad kon irang in popatoi tangoinea aka kon bahasa Ibrani Ki Abadon; bo aka kon bahasa Yunani Ki Apolion (mangaḻenea “Momoguyaat”).

¹²Bodito inta muna, noitaḻibdon. Moiduduimai kon tua doyowapa in bodito moiangoi.

¹³Onda intua, malaekat inta inggonomnea in nogirup kon torompetnea. Dá dinongogkudon in singog iḷumuai nongkon siku mita in meja pogogukatan kon sosumba inta pinomia nongkon buḷawan, inta inukat kon tayowon i Allah.

¹⁴Singog tatua in noguman kon malaekat inggonomnea tua, kain singog tatua: “Buḻiaidon in malaekat taya opat inta noitogot kon diug in Ongkag Eprata tatua!”

¹⁵Dá binuḻiandon in malaekat opat tatua. Mosia tua in sinila-silaiandon in tugas, oyúon kon jam, kon singgai, kon buḷan bo kon taong sin moḻimod kon sepertiga nongkon bayongan in intau inta kon dunia naa.

¹⁶Pinotaaudon kon inakó kon doyowa nogatut nojuta in kobayong in tontara inta sinumakoi kon kabaḷo.

¹⁷Bo inontongku doman kon bonu in oontongon tatua in kabaḷo mita takin intau mita inta sinumakoi. Intau mita inta sinumakoi kon kabaḷo tatua in nogiḷambung in ḷambung uatoi inta ná kopura in tuḷu in batangannea, nobidu ná batu nilam bo nodarag ná balerang. Uḷu in kabaḷo mita tatua in naonda bo uḷu in singa, bo nongkon bibignea ḷumuai in tuḷu, poyok bo balerang.

¹⁸Sepertiga intau kon dunia naa kinoḻimodan in roriga toḷu inta noiantug tatua. Toḷu in roriga tua in; tuḷu, poyok, bo balerang inta iḷumuai kon bibig in kabaḷo mita tatua.

¹⁹Sin ropot in kabaḷo mita tatua in tuabí kon bibig bo kon iputnea. Sin iputnea naonda bo uḷag inta kouḷu. Bo iputnea tatua inta pomogutúnea kon intau.

²⁰Táe intau mita ki agatnea inta diá minatoi in roriga tatua in doípabí doman in mogogai mogaid kon inta diá nopia inta biasamai aidan monia. Mosia in umuran mosumba kon dimukud mita moraat bo berhala mita inta pinomia nongkon buḷawan, saḷaka, tambaga, batu bo kayu inta diá mokoontong, diá mokodongog bo diá doman mokobayá.

²¹Mosia in diápa doman mogogai in moḻimod, monggaing, mogaid kon inta diá patus aidan bo monakow.