Read Mongondow RUT 2 Bible Online

RUT 2 - Mongondow bible

RUT 2

¹Ki Naomi koginaḷum kon tobatú ḷoḷaki nongkon i baḷunea, ki Elimelekh. Intau tatua nobiag nooyúon bo kinobangkaḷ in intau, ki Boas in tangoinea.

²Kon singgai tobatú ki Rut noguman kon i Naomi, “Iná, ogoipa in akuoi mayá in gobá mopuyut kon gandum inta degá nopipik ande kinotaḷáan in mokokoyut mita. Rasaanku in oyúonbí in intau motabi bo mopomayá mako kon inakó mopuyut kon tua.” “Mopia, uḻe!” tubag i Naomi, “bayádon!”

³Dá minayádon in ki Rut kon gobá bo nopuyut kon gandum dumuduianmai kon intau mita inta noratab. Noitongkanábí in sia kon gobá i Boas.

⁴Diá noonggot kon tua ki Boas namangoi nongkon Betlehem bo nopoyaput in tosingogon tanaa kon intau mita inta mororatab tatua, “Poigumon mako ki TUHAN kotaki-takin monimu,” Intau mita mororatab tatua in notubag, “Poigumon mako ki TUHAN momarakat kon i Amá.”

⁵Bo ki Boas noḻibó kon intau moḷoḷukadnea, “Ki ine in bobay tatua?”

⁶Intaunea tatua notubag, “Sia tua in bobay in bangusa in Moab inta bagu namangoi noyotakin i Naomi nongkon Moab.

⁷Sia in nopoigum kon inakó sinbá ogoipa in sia dumuduianmai kon intau mita inta mororatab sin mopuyut kon gandum mita inta kino taḷaan. Nongkon doḷo-doḷompa in sia umuran nopuyut, bo bain tanaa in sia bo nogogai sin mopoguḻí in ḷopí motoyong kon ḷuḷung.” [5]

⁸Bo ki Boas noguman kon i Rut, “Indongogaipa muna uḻe. Dikadon in iko mayá mopuyut kon gandum kon gobá in intau ibanea. Popuyutdon kon naa moyotakin in intau mogogaidku mita inta bobay. Indoiai kon onda in bayáan monia porataban. Umurandon dudui kon i monia bo dika yumayú kon i monia. Aka moyogang in iko, yo pogamádon kon tubig nongkon tampat mita in tubig inta ain binonuan in mogogaid mita ḷoḷaki. Ain pinogumanku kon i monia kon dika monuyayow kon inimu.”

¹⁰Nokodongogmai kon natua, sinumungkud in ki Rut kon tayowon i Boas bo noguman, “Amá, akuoi naa in diábí patus in motarima kon aid inta námai tua in kopopia nongkon i Amá. Akuoi naa in intau mokokiangoi bo diábí patus motarima kon aid mopia nongkon i Amá!”

¹¹Ki Boas notubag, “Dinongogkudon in bayongan yagi-yagi inta ain pinopoaidmu kon i guyámu pinangkoipa kon ki buḷoimu minatoi. Kinotaauankubí kon iko ain nonaḷámai kon guyangamu bo kon butámu sin mamangoi mogutun kon naa moyotakin in intau mita inta diápa nogogintaauanmu.

¹²Poigumon mako ki TUHAN in mobogoi in tontuḻí kon bayongan in aidmu inta mopia. Poigumon mako iko in motarima kon onu inta patus ogoi i TUHAN, Allah in Israel kon inimu, sin iko ain namangoi mokiḷukad kon i-Nia!”

¹³Ki Rut in notubag, “Ki Amá totuudon mopia kon inakó, umpakabí akuoi naa diá notongkai in mogogaid mita i Amá. Kopopia in gina i Amá ain noposanang in ginaku.”

¹⁴Naonda in orasdon mongaan, ki Boas noguman kon i Rut, “Koḻigai mongaandon. Naa in roti bo poponoyaanea.” Dá ki Rut nongaan domandon noyotakin in mororatab mita. Ki Boas nobogoi doman in gandum inangag kon inia, bo ki Rut nongaan nobotug bo oyúonpa doman in ki agatnea.

¹⁵Onda intua ki Rut buidon minayá nopuyut kon gandum. Naonda in sia minayá, ki Boas noguman kon mororatabnea mita, “Aka sia mopuyut kon gandum kon sigad in gandum inta ain sinokotogot, yo pomayádon mako. Dikabí pokooyáanmai monimu in sia ande torúan monimu. Táe tontuondon pogugutai kon tumongo piḻik mako nongkon inta ain sinokotogot tua, bo ḷabúdon ogoi kon inia sinbá puyutonnea.”

¹⁷Ki Rut tantúdon nopuyut kon gandum kon gobá nodapot in ḷoḷabungnea. Naonda in pinorotneadon in pangkoi mita in gandum sinbá motontak in bungainea mita, indoianmai yo nokouḻí in sia kon mopuḷúmai nokilo.

¹⁸Onda intua sia nobuidon kon kotá kodia-dia in gandum inta pinouyutnea tatua bo pinoontongnea kon i guyánea in kobayong inta ain pinuyutnea tatua. Bo inogoiannea doman in ki guyánea tatua in kaanon inta diá nodaitnea kinaan kon tungkuḷ in nongaan.

¹⁹Dá nogumandon in ki Naomi kon inia, “Kon onda in kinouḻíanmu kon bayongan in tanaa? Kon gobá i ine in pinogaidanmu singgai in naa? Poigumon mako ki Allah momarakat kon intau inta nopoaid in mopia kon inimu tua!” Dá inoumandon i Rut kon i Naomi kon sia in minayá nopuyut kon gandum kon gobá in intau inta ki Boas in tangoinea.

²⁰“Adíku, intau tatua in ginaḷumbí naton modiug,” guman i Naomi. “Siabí tua in musti moindoi kon i naton. Poigumon mako ki TUHAN momarakat kon inia. Ki TUHAN in tantúbí mogintompod kon dandi-Nea, pinomayá kon intau inta nobiagpa ande kon intau inta ain minatoi.”

²¹Onda intua ki Rut noguman bui, “Iná, intau tatua in noguman doman kon akuoi in motaaubí tantú mopuyut kon gandum moyotakin in intaunea mita modapot in motoḻisí komintan in bungai in boyó kon gobánea.”

²²“Oo, adíku,” tubag i Naomi kon i Rut, “mopia-piabí kon mogaid in iko moyotakin in mogogaid mita bobay kon gobá i Boas. Sin aka iko mayá kon gobá in intau ibanea, yo dika bo poyambáanmai in intau kon tua!”

²³Manangka intua, ki Rut in tantúdon dinumudui kon mogogaid mita bobay kon gobá i Boas. Sia in nopuyut kon gandum kon tua nodapot in notoḻisídon komintan iratab — pinomayá bungainea dungkuḷ nodapot in bungainea imbuitnea. Bo kon dodai intua ki Rut in umuranbí nogutun takin i guyánea.