Read Mongondow RUT 4 Bible Online

RUT 4 - Mongondow bible

RUT 4

¹Ki Boas minayá in tampat pinoyodungkuḷan kon ngara moḷoben in kotá. Naonda in sia iḻimitú kon tua noitaḻibdon in ḷoḷaki tobatú inta kon raian i Boas sia tua in ginaḷum i Elimelekh inta totokpa in modagin. Bo inoiní i Boas in sia, “Utatku, koḻigai ḻimitúpa kon naa!” Intau tatua in namangoi, bo iḻimitú.

²Onda intua ki Boas nonongganut kon mopuḷú in intau inta dinuí itoi kon kotá tatua sin ḻimitúpa moyotakin kon tua. Naonda in mosia iḻimitú

³nogumandon in ki Boas kon intau inta ginaḷumnea tatua, “Ki Naomi aindon nobui mangoi nongkon Moab. Tanaa in sia moibog mopotaḷui in butá kapunyaan i baḷunea ki Elimelekh, ginaḷum motoḷuadí naton.

⁴Bo rasaanku in mustibí kotaauanmu in tua. Aka moibog in iko motaḷui kon tua, yo pogumandon kon tayowon in intau mita inta iḻimitú kon naa. Aka diá, yo pogumandon moyogintayowan doman mako naa, sin tongábí kitada in oyúon hak kon tua; iko in muna-munamai, akuoi in nogindua.” Tubag in intau tatua, “Oo, taḷuionku intua.”

⁵Bo ki Boas in noguman, “Mopia aka natua. Táe, aka taḷuionmu in butá tatua nongkon i Naomi, dá musti doman gamáanmu in ki Rut,[8] bobay in Moab, ki baḷú adí i Naomi. Sin, butá tatua in mustibí umuran mobaḻí kapunyaan in buí in intau inta ain minatoi tatua.”

⁶Tubag in intau tatua, “Aka natua, dá diá in akuoi mokosanggup. Dá tanaa in mopia-piabí kon ḷuatankudon in hakku saḷaku intau inta muna totok inta musti motaḷui kon butá tatua. Diá in mangaḻenea potaḷuianku kon tua sin butá tatua in notantúdon kon diábí mobaḻí kapunyaan in buíku. Maníka ikodon in motaḷui kon tua.”

⁷Kon dodai intua aka intau mopotaḷui ande moponoḻiu in onuka in kapunyaannea, dá aka morigon kon totaḷuian tatua in biasamai intau inta mopotaḷui moḷongkut kon silopnea, bo poabatnea kon intau inta notaḷui. Natuata in intau in Israel moporigon kon totaḷuian in butá.

⁸Tuamai, naonda in intau tatua noguman kon i Boas, “Ikodon in motaḷui kon tua,” noḷongkutdon in sia kon silopnea bo pinoabat kon i Boas.[9]

⁹Dá ki Boas in noguman kon intau mita inta dinuí itoi kon tua takin bayongan in intau inta kon tua, “Singgai naa moiko komintan in mobaḻí sakusi kon akuoi ain notaḷui nongkon i Naomi in bayongan inta kapunyaan i baḷunea ki Elimelekh bo i adínea mita, inta ki Kilyon bo ki Mahlon.

¹⁰Koḻikud intua gamáanku domandon in ki Rut, bobay in Moab, ki baḷú i Mahlon tua mobaḻí ki buḷoiku. Sinbá butá tatua in umuran mobaḻí kapunyaan in motoḷuadí in intau inta ain minatoi tua. Bo buínea in umuran doman kon yua-yuak in ginaḷumnea bo kon kotánea. Toropdon Utat mita, singgai in naa moiko komintan in nobaḻí sakusinea.”

¹¹Intau mita inta dinuí itoi kon tua bo intau ibanea inta kon tua noguman, “Oo, kamidon in sakusinea. Poigumon mako ki TUHAN in mopobaḻí kon i buḷoimu tua naonda bo ki Rakhel bo ki Lea inta nopononggadí in adí mobayong kon i Yakub. Poigumon mako iko in mobiagdon mooyúon totok kon sigad in intau mita nongkon inanakan in Eprata bo poigumon doman mako iko in mobaḻídon intau inta tango-tangoiondon totok kon Betlehem.

¹²Poigumon mako adí mita inta ogoi i TUHAN kon inimu pinongin bobay inta noguodpa tanaa in mobaḻídon motoḷuadímu ná ki Peres, ki adí i Yohuda bo i Tamar.”

¹³Dá ki Boas in nogamádon kon i Rut nobaḻí ki buḷoinea. Ki TUHAN in nomarakat kon i Rut dá nonogusiandon in sia bo nopononggadí in adí ḷoḷaki tobatú.

¹⁴Bobay mita in noguman kon i Naomi, “Dinayo-dayowdon in ki TUHAN! Sia in nobogoidon in ompu ḷoḷaki tobatú kon inimu kon singgai in naa sin moḷukad kon inimu. Poigumon mako adí tatua in mobaḻí intau moḷoben kon Israel!

¹⁵Ki mototakamu tua in totokbí in motabi kon inimu. Sia in nobogoidon kon inimu in noiḻiu kon onu inta motaau ogoi in intau ḷoḷaki pitu. Tanaa sia in nobogoidon doman in ompu ḷoḷaki tobatú kon inimu, inta moporoton bui kon ginamu, bo inta moḷukad kon inimu kon kogoguyangannea.”

¹⁶Ginamá i Naomi in adí tatua bo biniagnea takin ḻimbatú in tabi.

¹⁷Bobay mita inta kon topodiugmai monia nonontangoi kon adí tatua ki Obed. Kon bayongan in intau mosia noguman, “Ki Naomi aindon kogadí kon adí ḷoḷaki tobatú!” Ki Obed naa inta kon singgai noiduduimai nobaḻí ki amá i Isai, bo ki Isai naa inta ki amá i Daud.

¹⁸Bo naadon in pipidan inanakan i Daud, pinangkoi kon i Peres: Ki Peres, ki Hezron, ki Ram, ki Aminadab, ki nahason, ki Salmon,[10] Ki Boas, ki Obed, ki Isai, ki Daud.