Read Mongondow SAMUEL 1 10 Bible Online

SAMUEL 1 10 - Mongondow bible

SAMUEL 1 10

¹Onda intua ki Samuel nogamá kon kendi inta kon bonu in ḷana zaitun, bo ḷana zaitun tatua pinopobutak kon uḷu i Saul, bo inayokannea in ki Saul poḷat noguman, “Ki TUHAN ain nopobaḻí kon inimu datu kon Israel umat-Nea. Iko in momarentabí kon umat-Nea bo moḷukad kon i monia nongkon musung mita monia. Naa in mobaḻí tomponuot kon inimu kon ki TUHAN in nomiḻídon kon inimu[23] mobaḻí datu kon Israel umat-Nea:

²Naonda in iko monaḷámai kon inakó singgai in naa, iko in moyodungkuḷ in intau ḷoḷaki doyowa kon diug in pinoḷobongan kon i Rahel kon Zelzah kon butá in Benyamin. Mosia in mogumanbí kon inimu, nanaa: Keledai mita inta sinayakmu in nouḻídon. Tanaa in diá bidon moḻia-ḻiaw in gina i amámu soaḷ in mahaḷuk mita tatua, tongá umuran moḻibó mongo naonda in pototayaknea kon inimu.”

³Ki Samuel in noguman bui, “Nongkon tua iko in mongingguput kon bobayáanmu modapot kon pangkoi in kayu tampat pooibadaan kon Tabor. Kon tua iko in moyodungkuḷ in intau ḷoḷaki taya toḷu inta mopobayá in Betel sin moposumba in kuruban kon i Allah. Intau tobatú in nodia kon ki adí in bembé toḷu, inta tobatú doman in nodia kon roti toḷu, bo inta tobatú doman in nodia kon botutu kuḻit inta kon bonu in anggur.

⁴Mosia in mopoyaputdon in salam kon inimu bo iko in ogoian monia in roti doyowa inta musti tarimaanmu.

⁵Mopaḷut mako kon tua iko in musti mayá in buḷud i Allah kon Gibea, tampat pinononḷoḷaigan in intau in Pilistin. Kon ngara tumuot in kotá, iko in moyodungkuḷdon in nabi mita inta mosiḻig nongkon buḷud pobobogoian kon kuruban. Mosia in motayok bo morogiow, mopogogitog in gambus, rebana, bansí bo kecapi.

⁶Kon dodai doman in tuata iko in kawasaandon in Roho i TUHAN bo iko in dumuduidon kon tayok mita bo giow monia tua, bo iko in ogoiandon in dodia mobagu dá mobaḻídon intau ibanea.

⁷Aka bayongan tua mobaḻí, yo aidaidon in onu inta inanggapmu mopia, sin ki Allah in kotaki-takinmu.

⁸Mopaḷut mako kon tua iko in musti mayá in Gilgal bo mogoḷat kon tua pitu nosinggai. Bain mamangoi in akuoi sin moposumba in kuruban payongon bo kuruban dodamean, bo mopotaau kon inimu onu in musti pomiaanmu.”

⁹Naonda in ki Saul nonaḷámaidon kon i Samuel, ki TUHAN nobogoidon in dodia mobagu kon i Saul. Bo bayongan inta pinotaau i Samuel kon inia in nobaḻí domandon singgai tua.

¹⁰Naonda in ki Saul bo bobantungnea noyaput kon Gibea, noyodungkuḷ in mosia in nabi mita. Kon dodai doman intua ki Saul kinawasa in Roho i Allah, bo sinumakindon in sia notayok bo norogiow takin nabi mita tatua.

¹¹Intau mita inta noonggotdon in nonotaau kon inia, nokoontongdon kon dodianea tatua, bo nosiḻibóandon in mosia, “Onudon in nobaḻí kon i adí Kish tatua? Degá ki Saul in nobaḻí domandon nabi?”

¹²Bo intau tobatú inta nogutun kon tua in noḻibó, “Yo naonda in nabi mita ibanea tatua — aka podudui in raian monimu yo ki ine in ki amá monia?” Tuata in pinomangkoian in tosingogon tanaa, “Degá ki Saul in nobaḻí domandon nabi?”

¹³Naonda in nopaḷutdon in ki Saul notayok bo noyogiow, minayádon in sia kon mezbah kon tudu in buḷud.

¹⁴Pokuamáan i Saul in nokoontong kon inia bo bobantungnea, bo noḻibó kon i monia, “Nongkon onda in moiko?” Tubag i Saul, “Notayak kon keledai inta nobuḻi tua, bo diá nouḻí nami, kami in minayá kon i Samuel.”

¹⁵“Bo onu in pinogumannea kon inimu?” pokuamáannea in noḻibó.

¹⁶Ki Saul in notubag, “Sia in nopotaau kon bobiagon mita tatua in nouḻídon.” Táe diábí inouman i Saul kon pokuamáannea tatua kon sia in binaḻídon i Samuel datu.

¹⁷Dá ki Samuel in nogoiní kon bayongan intau in Israel sinbá moyosipun kon Mizpa,

¹⁸bo noguman in sia kon i monia, “Naadon inta pinoguman i TUHAN, Allah in Israel, ‘Akuoi in nodiadon kon i monimu iḻumuai nongkon Mesir bo nopoḷuatdon kon i monimu nongkon kawasa in intau in Mesir bo bayongan in bangusa ibanea inta nopororiga kon i monimu.

¹⁹Akuoi ain nopoḷuat kon i monimu nongkon bayongan roriga bo sikisa, táe tanaa in moiko mondoídon kon i-Nakó, ki Allahmu, sin moiko in mopoigum sinbá Akuoi motayak kon datu tobatú kon inimu. Dá, poyosipundon kon tayowon-Ku, ki TUHANmu, podudui in suku bo inanakanmu.’ ”

²⁰Bo ki Samuel in nopotabá in bayongan suku inumuna bo suku Benyamin in kinopiḻían.

²¹Naonda in motoḷuadí mita kon bonu in suku Benyamin tatua pinoki unaan, dá motoḷuadí i Matri in kinopiḻían. Pangabisannea namangoidon i muna in ḷoḷaki mita kon bonu in motoḷuadí i Matri; [24] bo ki Saul ki adí i Kish in kinopiḻían. Bo sinayak monia in ki Saul, táe diá in sia.

²²Tuamai noḻibó in intau mita kon i TUHAN, “Oo TUHAN, degá intau tatua kon naadon?” Tubag i TUHAN, “Ki Saul nogadop kon tumimai in barang mita touḷut.”

²³Bo ḷagidon in mosia minayá nonontomu kon i Saul nongkon tua, bo dinia monia kon yua-yuak in rayat. Dá sinimindogdon in ki Saul kon sigad monia bo siadon in moḷantu-ḷantud nongkon i monia komintan; intau ibanea in tongá kon mangoi mita in obaganea.

²⁴Onda intua ki Samuel noguman kon rayat, “Naadon in intau inta piniḻí i TUHAN, diábí in poḻiu kon sigad naton komintan.” Bayongan in bangusa tatua norogiow, “Mobiag datu!”

²⁵Noiduduimai kon tua ki Samuel noginsilang kon bangusa tatua soaḷ hak bo kowajiban in datu, bo pinaisnea kon bonu in buk inta sinagúnea kon tampat inta motusi. Nopaḷut mako kon tua ki Samuel nopotabá kon bayongan in bangusa tatua nobui kon baḷoinea-baḷoinea.

²⁶Ki Saul nobui domandon kon baḷoinea kon Gibea, sinakinan in tongonumai in intau inta motorindog bo mobarani[25] inta ain pinopogonú i TUHAN in ginanea.

²⁷Táe tongonumai in intau moraat noguman, “Umpaka yo intau tanaa oyúon in mangaḻenea kon inaton?” Mosia mopoonagmai kon i Saul bo diá nobogoi in tombuinag kon inia. Táe tongábí in sia ki ubo uboḷmai diá nonotaau kon tua.