Read Mongondow SAMUEL 1 15 Bible Online

SAMUEL 1 15 - Mongondow bible

SAMUEL 1 15

¹Kon singgai tobatú ki Samuel noguman kon i Saul, “Ki TUHANbí in nopotabá kon i nakó noduí kon i Tuang nobaḻí datu kon Israel umat-Nea. Tuamai, pokidongogbí in ki Tuang kon parenta i TUHAN Inta Totok in Mokawasa.

²Sia in mohukumbí kon intau in Amalek, sin mogoguyang monia in noḷawang kon intau in Israel kon dodai in intau in Israel namangoi nongkon Mesir.

³Dá bayá bo tubudon in intau in Amalek bo rimumudon in bayongan kapunyaan monia. Dikabí taḷaanmai in onuka; ḻimodon in bayongan intau ḷoḷaki, bobay, mongoadí mita bo adí mointok; takin doman sapi, domba, unta bo keledai.”

⁴Dá ki Saul in noposadia in tontaranea bo iniapnea kon Telaim; 200.000 in tontara nongkon Israel bo 10.000 in intau nongkon Yohuda.

⁵Onda intua minayádon in ki Saul takin intaunea mita kon kotá in Amalek bo noḷabot kon musung kon yuak in ongkag inta noingkag.

⁶Sia in nokidia doman in koyow tompoingat kon intau in Keni kainia, “Bayádon bo taḷaaidon in intau in Amalek, sinbá moiko in diá poyotakinonku yompaton takin monia, sin dungkuḷmai in mogoguyang monimu noibogdon noyobayat in intau in Israel kon dodai in intau in Israel namangoi nongkon Mesir.” Dá minayádon in intau in Keni nongkon tua.

⁷Nopaḷut mako kon tua ki Saul noparang takin intau in Amalek, bo nonaḷow kon i monia kinoouputbí in daḷan nongkon Hawila nodapot kon Syur kon dotá in pomukaan kon Mesir.

⁸Bayongan in rayat bo tontara in intau in Amalek iḻimod i Saul. Táe ki Agag datu in intau in Amalek in dinomok bo pinomayá mako i Saul takin tontaranea nobiag, natua doman in bayongan domba bo sapi inta totok in mongopia, ki adí in sapi bo ki adí in domba inta totok in noḷongó,[46] bo bayongan in onu inta koboḻi; tongábí bobiagon inta diá in mangaḻenea bo inta diá koboḻi[47] tua in iḻimod.

¹⁰Bo nogumandon i ki TUHAN kon i Samuel,

¹¹“Nomanasaḷdon in akuoi sin noduídon kon i Saul nobaḻí datu, sin sia in nonoḻikudon kon i-Nakó, bo doídon dinumudui kon parenta-Ku.” Noajar totok in gina i Samuel, bo kinoouputbí in doḷom sia nopoigum in totabi kon i TUHAN.

¹²Nobangon monik doḷo-doḷom, ki Samuel nobuat sin mayá mokipodungkuḷ kon i Saul. Pinotaaudon kon inia kon ki Saul ain minayá kon kotá in Karmel sin moposindog in batu mobaḻí tompoingat kon inia kon tua, bodongka mayá in Gilgal.

¹³Naonda in ki Samuel noyodungkuḷ i Saul, ki Saul noguman kon inia, “Poigumon mako ki TUHAN momarakat kon i Amá! Akuoi ain nogaid kon onu inta pinarenta i TUHAN.”

¹⁴Táe ki Samuel in noḻibó, “Aka natua yo nongonu sin sapi in dinongogku in moganggorbí bo domba in kumurikbí?”

¹⁵Tubag i Saul, “Biag mita tatua in inagowbí mita nongkon intau in Amalek. Domba bo sapi inta totok in mongoḷomumu ain ginamá in rayat sin pinosumba nobaḻí kuruban kon i TUHAN Allahmu. Táe kiagatnea in aindon iyopú nami komintan.”[48]

¹⁶Nokodongogmai kon natua, ki Samuel noguman, “Oḷatpa motoyong, akuoi in mopotaau kon onu inta pinoguman i Allah kon inakó kogobíi.” “Potaaudon,” guman i Saul.

¹⁷Ki Samuel in noguman, “Tantú kinotaauanbí i Tuang Datu, kon umpakabí kon raianmu tontaní ki Tuang Datu naa in mointok táe binaḻí bidon itoi kon suku mita in Israel? Bo iko nion in binarakatandon i TUHAN nobaḻí datu kon Israel,

¹⁸apa doman ki Tuang Datu in pinotabádon i TUHAN moyopú kon intau in Amalek inta moraat tatua. Ki Tuang Datu in pinotabá moparang moḷawang kon i monia modapot in mosia moyopú komintan.

¹⁹Nongonu sin ki Tuang Datu in diábí dinumudui kon parenta i TUHAN? Nongonu sin ki Tuang Datu in noyotakinbí nogamá kon barang mita inta inagow, aid i Tuang Datu tatua in nokopomuká kon yaat in gina i TUHAN?”

²⁰Ki Saul in notubag, “Akuoi ain dinumudui kon parenta i TUHAN, bo minayá noparang pinodudui ná inta pinarenta-Nea kon inakó; ki Agag datu intau in Amalek in dinomokku bo bayongan intau in Amalek ain iḻimodku.

²¹Táe intauku mita in diábí noḻimod kon bayongan in bobiagon; mosia ain nomiḻí kon domba bo sapi inta totok in mongopia nongkon onu inta inagow tatua sin pinosumba monia kon Gilgal nobaḻí kuruban kon i TUHAN Allahmu.”

²²Táe ki Samuel in noguman, “Onda degá in koibog i TUHAN, kotoindudui andeka kuruban sosumba? Kotoinduduibí kon i TUHAN in mopia-pia nongkon moposumba in kuruban. Dumuduibí kon parenta-Nea in mopia-pia nongkon ḷongó in domba.

²³Sin moḷawang kon parenta i TUHAN notongkaibí in mosihir in koraatnea, bo gina inta mododia notongkaibí in koraatnea ná nosumba kon ilah ibanea, Popisí in ki Tuang Datu ain noḷawang kon parenta i TUHAN, dá diádon akúon i TUHAN kon ki Tuang in datu.”

²⁴Nokodongogmai kon natua, ki Saul nongaku kon i Samuel, kainia, “Totuubí uḻe kon akuoi ain binaradosa. Akuoi ain iḻimimpat kon parenta i TUHAN bo diádon dinumudui kon totundú i Amá. Akuoi in moondok kon intauku dá dinuduiankudon onu in pinoigum monia.

²⁵Táe tanaa, akuoi in mopoigum kon i Amá ampungaidon in dosaku bo buidon angoi moyotakinku kon Gilgal, sinbá akuoi motaaudon moibada kon i TUHAN.”

²⁶Táe ki Samuel in notubag, “Akuoi in doí bidon mobui mangoi moyotakin i Tuang Datu. Ki Tuang ain noḷawang kon parenta i TUHAN, bo tanaa mako in diá bidon akúon-Nea in ki Tuang saḷaku datu in Israel.”

²⁷Bo nomurowdon in ki Samuel sin mayádon, táe sinahang i Saul in sia takin kinumadai kon jubahnea, dá noberak in jubah tatua.

²⁸Bo noguman in ki Samuel kon inia, “Kon singgai in naa ki TUHAN ain nomerak kon dodatuan in Israel nongkon i Tuang, bo nobogoi kon intau ibanea inta mopia-pia nongkon i Tuang.

²⁹Inta Momulia ki Allah in Israel in diábí monguboḷ bo diábí doman momanasaḷ, sin Sia in deemanbí intau.”

³⁰Ki Saul notubag, “Akuoi ain binaradosa. Tongá tuḷungaipa Amá, pobuidon mangoi moyotakinku sinbá akuoi in motaau moibada kon i TUHAN Allah i Amá. Aka natua dá ki Amá in mohoromat kon inakó kon tayowon in itoi in bangusaku bo kon tayowon in bayongan umat in Israel.”

³¹Dá nobuidon mangoi in ki Samuel noyotakinnea kon Gilgal, bo ki Saul noibada kon i TUHAN.

³²Onda intua ki Samuel nomarenta, “Diadon mangoi in ki Datu Agag kon naa,” Ki Agag namangoi kon inia takin pia in ginanea sin iraineamai, “Bodito in popatoi noitaḻibdon.”[49]

³³Táe ki Samuel noguman, “Ná doman onda bo pitowmu inta nokopopisí kon nobayong in guyanga bobay kinobuḻian in adí monia, yo natua doman in ki inámu kobuḻian i adínea.” Bo ki Samuel nonibat kon i Agag nodapot in minatoi kon tayowon in mezbah kon Gilgal.

³⁴Nopaḷut mako kon tua ki Samuel minayá in Rama, bo ki Datu Saul in nobuidon kon baḷoinea kon Gibea.

³⁵Nodapot in pangabisan kinobiagannea, ki Samuel diádon bui noyodungkuḷ i Saul. Táe noajar totok in gina i Samuel sin ki TUHAN in nomanasaḷ ain noduí kon i Saul nobaḻí datu in Israel.