Read Mongondow SAMUEL 1 16 Bible Online

SAMUEL 1 16 - Mongondow bible

SAMUEL 1 16

¹Diá noonggot kon tua ki TUHAN noguman kon i Samuel, “Dapotpa in toonu iko umuran mokuyang in gina tongá popisí in ki Saul? Sia tua in diá bidon ináku-Ku datu in Israel! Tanaa in pogamádon kon ḷana in zaitun bo bayádon kon Betlehem, kon intau inta ki Isai in tangoinea, sin ki adínea tobatú ain piniḻí-Ku nobaḻí datu.”

²Táe ki Samuel in notubag, “Naonda in pogogaidku? Aka kodongogan i Saul intua, yo notantú bidon kon ḻimodonnea in akuoi!” Ki TUHAN in notubag, “Podiadon kon sapi batánea tobatú, bo potaaudon kon rayat kon iko in mayá intua sin moposumba in kuruban kon i TUHAN.

³Bo oinídon in ki Isai kon upacara pobogoian kon kuruban tatua. Bain poguman-Ku onu in musti aidanmu. Intau inta tundúon-Ku kon inimu, musti duíonmu mobaḻí datu.”

⁴Ki Samuel nomia kon ná inta pinoguman i TUHAN. Naonda in sia nodapot kon Betlehem, itoi mita in kotá kon tua nonontomu kon inia takin noitaḻikokog bo noḻibó, “Degá kinoangoian i Amá naa in mokopoangoi kon saḷamat?”

⁵Tubag i Samuel, “Oo, totuu. Akuoi in mamangoi sin moposumba in kuruban kon i TUHAN. Dá potusidon in awakmu sinbá motaau dumudui kon upacara pobogoian kon kuruban tatua.” Ki Isai bo ki adínea mita in pinoki tusiannea doman in awak monia kon batúannea, bo inoinínea kon upacara tatua.

⁶Naonda in mosia noyosipun bo ki Samuel nokoontong kon i Eliab adí i Isai, kon raiannea, “Notantú bidon kon sia naa inta piḻíon i TUHAN.”

⁷Táe ki TUHAN noguman kon i Samuel, “Dikabí in iko koakaḷan in pogotnea inta moḷunat bo awaknea inta moḷantud; deemanbí sia in kinoibog-Ku. Deemanbí ná poyoyindoi in intau in poyoyindoi-Ku. Intau in moindoi kon batangannea, táe akuoi in moindoibí kon ginanea.”

⁸Onda intua ki Isai nogoiní kon i Abinadab, ki adínea, bo pinotabánea minayá kon tayowon i Samuel. Táe ki Samuel in noguman, “Sia in diá doman piniḻí i TUHAN.”

⁹Bo Ki Syama in pinoki bayáan i Isai kon i Samuel, táe ki Samuel in noguman, “Sia in diá doman piniḻí i TUHAN.”

¹⁰Noiduduimai kon tua ki Isai nopotabá kon i adínea taya pitu tua noyo-noyodudui in minayá kon i Samuel, táe ki Samuel in noguman kon inia, “Mosia naa in diábí piniḻí i TUHAN.”

¹¹Bo ki Samuel in noḻibó kon inia, “Tongá naa degá in ki adímu mita ḷoḷaki?” Ki Isai in notubag, “Tobatúpa doman, inta ai-ai, táe sia in tua noḷukad kon domba.” Ki Samuel in noguman, “Pokioinídon in sia, sin kita in diápabí mongaan aka diápa in sia moiangoi.”

¹²Dá pinoki oinídon i Isai in ki adínea tatua. Noniata magí yo sia tua in tayowmobiagbí inta moḷunat bo mosehat, bo matanea in totuu mogaga. Bo ki TUHAN in noguman kon i Samuel, “Naadon in sia; duídon in sia!”

¹³Baḷúdon in ki Samuel nogamá kon ḷana zaitun tatua bo noduí kon i Daud takin upacara pinopoinggúan in ḷana kon tayowon i guya-guyangnea mita. Kon dodai doman intua ki Daud kinawasaan in Roho i TUHAN. Nongkon singgai tua nodapot in singgai noiduduimai mita Roho i TUHAN koyota-yotakinnea. Onda intua nobuidon in ki Samuel kon Rama.

¹⁴Kon dodai intua ki Saul sinaḷáandon in Roho i TUHAN, bo tanaa in sia tuyayowondon in dimukud moraat inta pinotabá i TUHAN.

¹⁵Tuamai in bobantung mita i Saul in noguman kon inia, “Kinotaauandon nami kon dimukud moraat inta pinotabá i TUHAN monuyayow kon i Tuang Datu.

¹⁶Aka moibog in ki Tuang, dá potayakandon nami kon intau tobatú inta mopia mopogogitog in kecapi. Aka dimukud moraat tatua monuyayowdon kon i Tuang Datu, dá intau tatua in mopogogitogdon in kecapinea, bo motompiadon bui in raian i Tuang Datu.”

¹⁷Bo nomarenta in ki Saul kon i monia, “Potayakaidon kon intau inta mopia mopogogitog in musik, bo diádon mangoi kon naa in sia.”

¹⁸Nokodongogmai kon natua bobantungnea tobatú noguman, “Ki Isai intau inta nogutun kon kotá in Betlehem kogadí kon ḷoḷaki tobatú inta mopia mopogogitog in musik. Sia tua in intau inta mobarani bo tontara inta mopia. Apa doman sia tua intau inta motorindog bo motoḻindat mosingog, bo ki TUHAN in umuran motuḷung kon inia.”

¹⁹Dá nopotabá in ki Saul kon totabánea minayá kon i Isai nodia kon koyow tanaa, “Potabápa in ki adímu ki Daud, inta noḷukad kon dombamu mita tatua mamangoi kon inakó.”

²⁰Onda intua ki Isai noposadiadon in keledai tobatú, bo nopodatog in ki adí in bembé tobatú, roti bo botutu kuḻit inta binonuan in anggur kinopuḻing. Tua komintan in inogoinea kon i Daud sin ogoi mobaḻí sosumba kon i Saul.

²¹Natuata in angoi i Daud kon i Saul bo nobaḻí bobantungnea. Sia totok in kinotabi i Saul bo binaḻí mododia kon touḷut in parangnea.

²²Onda intua ki Saul nokidia in koyow kon i Isai, “Moibog in akuoi kon i Daud. Ogoipa mako in sia mogutunpa kon naa bo mobantung kon inakó.”

²³Pinangkoidon kon dodai intua, pomuḷoi in ki Saul angoion tuyayowon in dimukud moraat tatua, ki Daud mogamá kon kecapinea bo pogogitognea. Bo korasaan i Saul kon mopiadon bui, sin taḷaandon in dimukud moraat tatua.