Read Mongondow SAMUEL 1 17 Bible Online

SAMUEL 1 17 - Mongondow bible

SAMUEL 1 17

¹Kon singgai tobatú intau in Pilistin nosipun kon tontaranea sin mayá moparang. Mosia in noyosipun kon kotá in Sokho, kon butá in Yohuda bo noposindog in ḷoḷaigan monia kon sigad in Sokho bo Azeka, kon diug in Epes-Damim.

²Ki Saul bo intau mita in Israel noyosipun doman bo noposindog in ḷoḷaigan kon Ḷopá in Ela; mosia in nobasadia sin monayow kon intau in Pilistin.

³Pipidan in intau in Pilistin sinimindog kon buḷud tobatú bo pipidan in intau in Israel sinimindog doman kon buḷud ibanea, bo kon sigad monia tua oyúon in ḷopá tobatú.

⁴Dá intau tobatú inta motoyang moropatoi inta ki Goliat in tangoinea, nongkon kotá in Gat iḻumuai nongkon pinononḷoḷaigan in Pilistin sin monontot kon intau in Israel. Koḷantudnea tua in degá toḷumai nometer,[50]

⁵bo nogi sapoyo in bitú in sia bo ḷambung parangnea bitú inta degá kobogatnea in ḻima nopuḷú bo pitu nokilo.

⁶Sioḷnea inaipan doman in bitú, bo nomotaan doman in sia kon pandong bitú.

⁷Puḷu in pandongnea ná koḷoben in kayu in gogaboḷan, bo mata in pandongnea kobogatnea in degá pitumai nokilo. Tontara tobatú in minayá inumuna kon inia kodia-dia in kaḻeaw.

⁸Ki Goliat in sinumogon bo nomaḷú kon tontara in Israel, “Onu in aidan monimu kon nion? Moibog moparang degá in moiko? Akuoi naa in intau in Pilistin ei ata mita i Saul! Piḻídon in intau tobatú kon sigad monimu inta mokobaḻí mamangoi moparang takinku.

⁹Aka kon poropatoian tatua, bo akuoi in koḻimodan, yo diábí mobogat in gina nami in mobaḻí atamu, táe aka akuoi in mokountung bo moḻimod kon inia, yo moikodon in mobaḻí ata nami.

¹⁰Tanaa domandon mako, tontotanku in tontara in Israel; piḻídon in intau tobatú monayow kon inakó!”

¹¹Naonda in ki Saul bo intaunea mita nokodongog kon tontot tatua, noitaḻikokogdon in mosia bo inagían totok in ondok.

¹²Ki Daud tua in ki adí i Isai intau in Eprata, nongkon Betlehem kon Yohuda. Ki Isai naa in kogadí kon ḷoḷaki taya waḷu, kon tungkuḷ in ki Saul nomarenta, ki Isai in nogoguyangdon totok.[51]

¹³Ki adí i Isai ḷoḷaki toḷu inta guya-guyang dinumuduidon kon i Saul mayá moparang. Inta guya-guyang totok tangoinea in ki Eliab, inta nogindua in ki Abinadab, bo inta nogintoḷu in ki Syama.

¹⁴Ki Daud naa in adí muit. Kon dodai in ki guya-guyangnea toḷu tatua minayá dinumudui kon i Saul sin moparang,

¹⁵Ki Daud in mokakit in monaḷámai kon i Saul bo mobui mayá in Betlehem sin moḷukad kon domba i amánea.

¹⁶Kon bonu in opat nopuḷú nosinggai, pomuḷoi in doḷo-doḷom bo ḷoḷabungnea, ki Goliat dimiug kon pipidan intau in Israel bo monontot kon i monia.

¹⁷Kon singgai tobatú ki Isai in noguman kon i Daud, “Pogamádon kon gandum inangag mopuḷú nokilo bo roti inta mopuḷú nobatú tanaa, bo diá kon i guya-guyangmu mita inta kon pinononḷoḷaigan in tontara.

¹⁸Podiaai domandon kon mopuḷú nobatú in keju tanaa kon itoi in tontara. Ḻibódon mongo naonda in kaadaan i guya-guyangmu mita, bo podiaaidon mangoi in akuoi kon tomponuot kon iko in noyodungkuḷdon monia bo mosia tua in nopia-piapabí.

¹⁹Mosia tua in kon Ḷopá in Ela noyotakin i Datu Saul, bo bayongan intau in Israel koyogot in moparang monayow kon intau in Pilistin.”

²⁰Nobangon monik, doḷo-doḷom, ki Daud nobangon bo nonouḷut. Dombanea in pinoki ḷukadnea kon moḷoḷukad tobatú, onda intua nogamá in sia kon tongkaaḷnea bo minayá, podudui in parenta i amánea. Sia in nodapot kon pinononḷoḷaigan kon dodai in intau in Israel mobuat mayá in tampat popoparangan sindaḷan momaḷú in parenta moparang.

²¹Tontara in Pilistin bo tontara in Israel noyogintayowdon bo tumpaḷadon nosadia moparang.

²²Bo pinoki tagúpa i Daud in onu inta dinianea tatua kon intau inta moḷoḷukad kon touḷut in tontara, bo minayá in tampat popoparangan sin mayá mokipodungkuḷ kon i guya-guyangnea mita.

²³Táe naonda in sia mongongumanmai monia, ki Goliat inumuna bo nonontot kon intau in Israel, ná biasamai pomiaannea. Inindongogan i Daud in tosingogonnea tatua.

²⁴Naonda in intau in Israel nokoontong kon i Goliat, mosia noḷagui takin ondok.

²⁵“Indoiaika in sia!” mosia nosigumanan kon tobatú bo tobatú. “Indongogaika in tosingogon mita ponontotnea tatua! Ki Saul datu naton ain nodandi kon ki inekabí in mokoḻimod kon i Goliat, yo ogoiannea in tombuinag moḷoben. Popobuḷoi doman i datu in intau tatua kon i adínea bobay tobatú. Bo motoḷuadí in intau tatua in diádon moguboḻi kon pajak.”[52]

²⁶Bo ki Daud in noguman, “Mobaranibí totok in intau in Pilistin kaper tatua monontot kon tontara i Allah inta nobiag!” Onda intua noḻibó in sia kon tontara tobatú, “Onu in ogoi kon intau inta mokoḻimod kon intau in Pilistin tatua bo momopat kon tosingogon mopoonagmai kon Israel?”

²⁷Rayat nopotaau kon inia in onu inta ain pinodandi i datu.

²⁸Ki Eliab ki utat i Daud inta guya-guyang totok nokodongog kon i Daud nongonguman takin in tontara mita. Sinumorú in sia kon i Daud poḷat noguman, “Nongonu sin iko in namangoibí in naa? Ki ine in pinoki ḷukadanmu in dombamu mita inta doyowa toḷu tua kon padang gurun? Kinotaauankubí, kon iko nion in tumekeng mobarani; iko nion in mamangoi tongábí moindoi kon poparangan?”

²⁹Tubag i Daud, “Onu in taḷáku? Akuoi naa in tongábí noḻibó!”

³⁰Bo minayá in sia poḷat noḻibó kon soaḷ tatua kon tontara mita ibanea; bo natua doman in tubag monia kon inia.

³¹Táe tongonumai in intau inta nokodongog kon tosingogon i Daud, nopotaau intua kon i Saul, dá inoiníneadon in ki Daud namangoi in tayowonnea.

³²Guman i Daud kon i Saul, “Tuang Datu, diábí motaau in kita in moondok kon intau in Pilistin tatua! Ki atamu naa in mokobaḻíbí in mayá monayow kon inia.”

³³“Dika,” tubag i Saul. “Diábí kumaan kon akaḷ aka iko in monayow kon intau in Pilistin tatua, sin iko nion in nobagupa totok, bo sia tua in nongkon nobagupamai koyongandon mobiasa moparang.”

³⁴Táe ki Daud in noguman, “Tuang Datu, bobantungmu naa in nobiasabí moḷukad kon domba i amáku. Aka oyúon in singa andeka beruang inta mamangoi modomok kon domba,

³⁵yo mahaḷuk moraat tatua in aḷowan in bobantungmu naa bo ḷuntaan, bo domba tatua in posaḷamatonku. Bo aka singa andeka beruang tatua monayow kon inakó, dá taganganku, bo ḷuntaan dapot in matoi.

³⁶Bobantungmu naa in ain noḻimod kon singa andeka beruang, bo intau in Pilistin kaper tatua in potongkaionku domandon ná mahaḷuk mita tatua, sin sia in mokobaḻídon mopoonagmai kon tontara mita inta nongkon i Allah inta nobiag.

³⁷Ki TUHAN ain noposaḷamat kon bobantung naa nongkon singa bo beruang, yo Siabí doman in moposaḷamat kon bobantung naa nongkon intau in Pilistin tatua.” Bo noguman in ki Saul kon inia, “Mopia, poigumon mako ki TUHAN motuḷung kon inimu.”

³⁸Ki Saul nobogoi in pakeang parangnea, inta pakeang uatoi tobatú kon i Daud bo iḷutud domandon i Daud. Bo pinopopakéan doman i Saul kon i Daud in sapoyo bitú.

³⁹Bo pinogigabit domandon i Daud in kedang i Saul kon ḷambung uatoi tatua bo nonungkuḷ minayá, táe diá mokobayá, sin ki Daud diá nobiasa momaké in pakeang parang. “Bobantungmu naa in diábí mokobayá aka momaké in pakeang tanaa,” gumannea kon i Saul. “Dá dikadon momaké in ḷambung in parang tanaa.” Dá iḷongkutneadon in pakeang mita tatua.

⁴⁰Onda intua nogamá in sia kon tungkud inta pakéonneamai moḷukad kon dombanea, bo nomiḻí kon ḻima nougat in batu inta noḻimbung kon ongkag, bo binonunea kon popojinea. Takin kokada-kadai in katipol, minayá in sia nokipodungkuḷ kon i Goliat.

⁴¹Diá noonggot kon tua ki Goliat inta inunaan in intau inta mododia kon kaḻeawnea, momangkoidon mopoangoi kon i Daud.

⁴²Táe naonda in sia nokoontong kon i Daud bo nonaridimai, kinumosing totok in ki Goliat bo mopoonagmai sin noguodpa totok in ki Daud bo moḷunat.

⁴³Guman i Goliat kon i Daud, “Pongonubí in tungkud tanion? Degá kainimu kamai akuoi naa in ungkúbí?” Bo inodi-odiannea in ki Daud pinodoyon kon dewanea mita.

⁴⁴Bo buipa doman in sia nonontot kon i Daud, kainia, “Angoidon in naa! Awakmu nion in pokaanonkudon kon ḷagapan bo mahaḷuk.”

⁴⁵Táe ki Daud in notubag, “Iko nion in namangoi moḷawang kon inakó takin momaké in kedang, pandong bo ginubat, táe akuoi in namangoi moḷawang kon inimu takin tangoi i TUHAN Inta Totok in Mokawasa, ki Allah in tontara in Israel inta siningkuḻemu tua.

⁴⁶Singgai domandon naa posarakandon i TUHAN kon inakó in iko; taḷowonkubí in iko bo uḷumu in pongkóonkudon. Awakmu bo awak in tontara mita in intau Pilistin in pokaankudon kon ḷagapan bo mahaḷuk mita. Dá bayongan in intau kon dunia naa in monotaaudon kon kami bangusa Israel in oyúonbí in Allah inta sinumba nami,

⁴⁷bo bayongan in intau kon naa in mokoontongdon kon ki TUHAN in diábí moparaḷu kon kedang andeka pandong in moposaḷamat kon umat-Nea. Siabí in monantú kon daḷan poparangan tanaa bo Sia in moposarakan kon i monimu kon bonu in kawasa nami.”

⁴⁸Namangoidon dimiug in ki Goliat kon i Daud, bo noribatuk in ki Daud minaya ná pipidan in intau in Pilistin sin monayow kon inia.

⁴⁹Ki Daud nokuot kon popojinea bo nogamá kon batu bo pinopokatipolnea kon i Goliat. Batu tatua noitetek kon pogot i Goliat dá nobotak in ḷungkakánea, bo noumpag in sia noitongkob kon butá in pogotnea.

⁵⁰Ki Daud noribatuk minayá kon i Goliat, bo sinimindog kon diugneamai; ginamánea in kedang i Goliat bo irabutnea nongkon gumánea, bo pinongkóneadon in uḷu in intau in Pilistin tatua. Natuata in pinononaḷow bo pinoḷoḻimod i Daud kon i Goliat, tongá nomaké in katipol bo batu! Naonda in intau in Pilistin nokoontong kon tontara monia inta totok in mobarani bo motorindog tatua minatoidon, noḷaguidon in mosia.

⁵¹

⁵²Intau mita in Israel bo Yohuda norogiowdon bo nondudur kon intau mita in Pilistin nodapot in Gat[53] bo ngara moḷoben in Ekron. Intau mita in Pilistin inta kinekeban moyo-moyoguntuḷ in kon daḷan mopobayá in Saaraim tua.

⁵³Nopaḷut mako kon tua intau in Israel bui nondudur kon intau in Pilistin, bo nogagow kon tombonu in ḷoḷaigan monia.

⁵⁴Ki Daud in nogamá kon uḷu i Goliat, bo dinianea kon Yerusalem, táe pakakat mita in parang i Goliat sinagúnea kon bonu in ḷoḷaigannea tontaní.

⁵⁵Naonda in ki Saul nokoontong kon i Daud minayá nomarang kon i Goliat, noḻibó in sia kon i Abner itoi in tontaranea, “Abner, ki adí i ine in sia?” “Diábí kinotaauan in bobantungmu naa, Tuang datu,” tubag i Abner.

⁵⁶Bo nomarenta in ki Saul, “Bayá bo ḻibódon in soaḷ tatua.”

⁵⁷Dá naonda in ki Daud nobui kon pinononḷoḷaigan naonda in nopaḷut mako noḻimod kon i Goliat, dinia i Abner in sia minayá kon tayowon i Saul. Ki Daud kobibibitpa in uḷu i Goliat.

⁵⁸Bo ki Saul in noḻibó kon inia, “Uḻe intau inta mobagupa! Ki adí i ine in iko nion?” Ki Daud in notubag, “Bobantung naa in ki adí i Isai nongkon Betlehem.”