Read Mongondow SAMUEL 1 19 Bible Online

SAMUEL 1 19 - Mongondow bible

SAMUEL 1 19

¹Ki Saul noguman kon i Yonatan adínea ḷoḷaki, bo kon bayongan pogawainea kon moibog in sia moḻimod[54] kon i Daud. Táe ki Yonatan in motabi totok kon i Daud,

²tuamai in noguman in sia kon i Daud, “Ki amáku moḷongasi moḻimod kon inimu; dá pokoingatdon! Pogadopdon in ikoḷom doḷo-doḷom kon tampat inta noiadop, bo pogutunpa kon tua.

³Akuoi in mayábí kon diug in tampat inta pinogadopanmu tatua takin i amáku. Bo mongonguman in akuoi takinnea soaḷ makusudnea tatua kon inimu, bo onu in inouman nami tatua in oumanonkudon kon inimu.”

⁴Bo ki Yonatan nongonguman kon inta mopia soaḷ ki Daud kon i Saul, kainia, “Amá, dikadon in ki Amá mogaid kon inta mokobodito kon i Daud bobantungmu. Sin sia tua in diábí nomia kon onu inta noitaḷá kon i amá; sedang bo sia tua in nogaidon kon inta baraguna totok kon i Amá.

⁵Sia ain nopotaru in kobiagannea kon dodai in noḻimod kon i Goliat, bo ki TUHAN nobogoidon in kauntungan moḷoben kon Israel pinongin inia. Ki Amá tontaní in nokoontong kon onu inta nobaḻí tatua, bo nopia in gina i amá in nokoontong kon dodai intua. Dá, nongonu sin tanaa in ki Amá in moibogbí mopororigamai kon intau inta diá kotaḷá bo moibog moḻimod kon i Daud takin diá in kinodoyonannea?”

⁶Nokidongog in ki Saul kon tonggina i Yonatan tatua, bo nongibot in sia pinodoyon kon tangoi i TUHAN kon diábí ḻimodonnea in ki Daud.

⁷Nopaḷut mako kon tua inoiní i Yonatan in ki Daud, bo inoumannea in bayongan inta inouman monia tua. Onda intua dinianea in ki Daud kon i Saul, bo ki Daud in nobantung kon inia ná dungkuḷmai.

⁸Onda intua nobaḻídon bui in parang takin intau in Pilistin. Ki Daud nonubu bo poḷat nonaḷow totu-totuu kon i monia, nodapot in mosia noḷagui.

⁹Kon singgai tobatú ki Saul ḻimitú mako kon baḷoinea takin kokada-kadai in pandong bo daḻídon in ki Saul kinotoḷangan in dimukud moraat inta pinotabá i TUHAN. Kon dodai intua ki Daud mopogogitogmai in kecapinea.

¹⁰Bo ki Saul moḷongasidon moponakuḷ in pandongnea kon i Daud inta iḻimitú kon diugmai in dinding. Táe sinimí in ki Daud, dá pandong tatua noitakuḷdon kon dinding. Ki Daud noḷagui sinbá diá mobodito in sia.

¹¹Kon doḷom doman tuata ki Saul nopotabá in tongonumai in intau minayá kon i Daud sin motarap kon i Daud bo moḻimod kon inia naonda in doḷo-doḷomdon. Táe ki Mikhal ki buḷoinea in noguman kon inia, “Aka diá moḷagui in iko in doḷom naa, yo ikoḷom doḷo-doḷom notantú bidon kon ḻimodon monia in iko.”

¹²Bo pinopoponagdon i Mikhal in ki Daud nongkon jandela, bo ki Daud noḷagui dá nosaḷamatdon in sia.

¹³Nopaḷut mako kon tua ki Mikhal nogamá kon patong dewa in tonibuḷoinea bo inukatnea kon tosiugan i Daud. Bo kon dotá in uḷuannea inukatannea in oḷunan inta nongkon bubuḷ in bembé, bodongka dinaingannea in daing.

¹⁴Kon dodai in totabá mita i Saul namangoi sin modomok kon i Daud, ki Mikhal noguman, “Notakit in ki Daud.”

¹⁵Táe bui i Saul pinotabá in mosia minayá intua sin moindoi moyotomatamai. Sia in nomarenta, “Diadon mangoi in sia kon naa, takin tosiugannea, sinbá ḻimodonku.”

¹⁶Bo sinumuotdon in totabá tatua kon bonu in gopot bo noniata magí patongbí in inta noiukat mako kon tosiugan bo pinopouḷun kon olunan bubuḷ in bembé.

¹⁷Ki Saul noguman kon i Mikhal, “Mokobaḻíbí totok in iko monguboḷ kon inakó nanaa! Musungku ain sinuḷunganmu noḷagui!” Tubag i Mikhal, “Sia in nopogogondok moḻimod kon inakó aka doí motuḷung kon inia moḷagui.”

¹⁸Naonda in ki Daud nokoḷaguidon, minayá in sia kon baḷoi i Samuel kon Rama, bo pinotaaunea in bayongan inta pinomia i Saul kon inia. Onda intua ki Daud bo ki Samuel noyotakin minayá in Nayot bo nogutun kon tua.

¹⁹Táe pinotaaudon kon i Saul kon ki Daud in kon Nayot inta kon diug in Rama

²⁰Tuamai in ki Saul nopotabádon in tongonumai in totabá sin mayá modomok kon i Daud. Táe kino bayáanmai monia [55] nabi mita noyosipun bo koyogot notayok noyotakin, ki Samuel in nobaḻí itoi. Bo totabá mita i Saul tatua kinawasa in Roho i Allah dá mosia doman in sinumakindon notayok bo nomaḷú.

²¹Naonda in habar tatua noidapot kon i Saul, nopotabá in sia in totabá mita ibanea bo mosia doman tatua noitakin domandon notayok bo momaḷú. Bo kon nogintoḷumaidon in ki Saul nopotabá in totabánea mita bo natua domandon in nobaḻí kon i monia.

²²Tuamai nobuat in ki Saul minayá in Rama. Naonda in noyaput kon parigí moḷoben kon Sekhu, sia in noḻibó mongo kon onda in ki Samuel bo ki Daud, bo intau kon tua in noguman kon inia kon mosia in kon Nayot.

²³Dá sia in nopobayá ná tua, táe sia in kinawasa doman in Roho i Allah, dá sia in notayok doman bo momaḷú kinoouput in binayáan nopobayá in Nayot.

²⁴Naonda in noyaput intua, sia in noḷongkut kon pakeangnea bo notayok sindaḷan momaḷú kon tayowon i Samuel, bo noumpag kon butá takin diá koḷambu-ḷambung tosinggai bo tonggobii tua. (Naa in pinomangkoian in toḻibag inta noguman, “Nobaḻí domandon nabi degá in ki Saul?”)