Read Mongondow SAMUEL 1 2 Bible Online

SAMUEL 1 2 - Mongondow bible

SAMUEL 1 2

¹Bo nosambayang in ki Hana, kainia, “Ki TUHAN in nopoḷungangadon kon ginaku; oaidan-Nea in nokosanangdon kon ginaku. Takin pia in gina singkuḻeonku in musungku, sin totu-totuudon kon ki Allah in notuḷungdon kon inakó.

²Diábí inta motusi ná ki TUHAN! Tongábí Sia in pononiungan.

³Gogaiaidon in ambungangaḷmu inta diá in mangaḻenea tua! Dikadon mosingog kon inta diá in baragunanea! Sin ki TUHAN tua in ki Allah inta totok in nonotaau; inta mohakim kon bayongan oaid in intau.

⁴Ropot in pahlawan in noputoḷdon, táe modugangdon moropot in intau inta moyangkó.

⁵Intau inta koḻipod nobotug sin nobarong in kaanon, tanaa in nobaḻídon intau totondanan mogaid tongá bá mokouḻí kon kaanon. Intau inta koḻipod ginogoi, tanaa in noguḻídon, tugatdon in kaanon. Buḷoi inta bantó, mopiadon in ginanea in tanaa, pitu in adí pinononggadíneadon! Táe ki iná inta mobayong in ki adínea, sinaḷáandon, biniódon mako natua.

⁶Ki TUHAN in mokopatoi bo mokobiag in Sia. Pinopoponag-Nea in intau kon dunia in intau minatoi. Bo Sia doman in nopoḷuai nongkon tua.

⁷Oyúon in intau in binaḻí-Nea nobiag nobogá, oyúon doman in binaḻí-Nea nobiag nooyúon. Oyúon in intau inta pinopoompá-Nea, oyúon doman in intau inta pinoḷantud-Nea.

⁸Nongkon roriga binuat-Nea in intau inta diá koonu bo onu, nongkon roriga pinoḷuat-Neadon in intau inta mokooyá. Mosia in binaḻí-Nea yobayat in intau mita moḷoben, bo inogoian in tangoi moḷantud. Aip in butá naa ki TUHANbí in kitogi, kon ḻimonikannea pinosindog-Nea in dunia.

⁹Intau inta mosatia in umuran moaman kon bonu in kawasa i TUHAN. Táe intau inta moraat in morimumud matoi kon bonu in sindip bo kintui totok. Ropot tontaní diá motaau in pongata, ropot in intau diá mokoogoi kon kauntungan.

¹⁰Musung mita i TUHAN in morimumud motontopong, mosia in moondok; nongkon ḷangit in Sia monggotup. Ki TUHAN in mohakim kon bayongan in dunia naa, bo mobogoi in kawasa inta momulia kon i datu inta piniḻí-Nea.”

¹¹Bo nobuidon in ki Elkana bo motoḷuadínea kon Rama, táe ki Samuel, adí tatua, in nogutundon kon Silo bo nogundoi kon i TUHAN kon bonu in totundú i Imang Eli.

¹²Ki adí mita i Eli in mongoraat totok. Mosia in doí dumudui kon parenta i TUHAN

¹³bo saḷaku imang mosia in mopomia ibo-ibog kon bangusa in Israel. Aka umpamanea oyúon in intau inta moposumba in kuruban, mototuḷung i imang mamangoi kodia-dia in porok inta toḷu in matanea. Kon dodai in ponoyá tatua kotuo-tuonpa,

¹⁴porok tatua popoturak monia kon bonu in kuyon inta pinodungúan kon ponoyá tatua, bo onukabí in kinoturakan in porok tatua nobaḻídon kapunyaan in imang. Bayongan intau in Israel inta namangoi nongkon Silo sin moposumba in kuruban, komintan pomiaan monia natua.

¹⁵Modapot in mokakit doman in mototuḷung i imang tatua mamangoi kon dodai in ḷongónea diápa pinotondí sin tubáan, bo moguman in sia kon intau inta moposumba kon kuruban tatua, “Ogoidon in tapúnea inta diápa dinungú tatua kon i imang sin angagonnea; doíbí in sia motarima kon tapúnea inta ain sinuon.”

¹⁶Aka intau tatua motubag, “Mopia-piabí kon kita in dumudui kon atorang, bo motubápa muna kon ḷongónea tatua; baintua bo motaaudon in iko mogamá kinooibogmubí,” dá mototuḷung tatua moguman, “Diábí motaau, mustibí tanaa doman mako in ogoimu, aka diá, yo pakisaanku gamáan.”

¹⁷Natuata in kobobaradosa i adí i Eli doyowa tatua kon tayowon i TUHAN, popisí in mosia mopoonagmai kon sosumba kuruban kon i TUHAN.

¹⁸Kon dodai intua, ki Samuel inta mongoadípa tantú mogundoi kon i TUHAN. Nomaké in sia in ḷambung inta ain sinantú nongkon kaeng linen, ná ḷambung inta pakéonmai in imang mita kon ibada.

¹⁹Pomuḷoi in taong ki inánea momia kon jubah mointok bo ogoinea kon i Samuel aka bobay tatua moyotakin i buḷoinea mamangoi moposumba in kuruban taongan.

²⁰Dá barakatan i Eli in Elkana bo ki buḷoinea, bo noguman in sia kon i Elkana, “Igumon mako buipa i TUHAN ogoian in adí mita in iko nongkon i buḷoimu tanaa, sin ponoḻiu kon adí inta ain inogoi monimu kon i TUHAN.” Nopaḷut mako kon tua nobuidon mosia kon Rama.

²¹Ki Hana in binarakatan i Allah, dá buipa nopononggadípa in sia in adí ḷoḷaki toḷu bo adí bobay doyowa. Ki Samuel in koitoi-koitoidon kon wakutu in sia mogundoimai kon i Allah.

²²Ki Eli in nogoguyangdon totok. Umuran in sia mokodongog kon guman in intau soaḷ oaid i adínea mita kon intau in Israel. Kinotaauan domandon i Eli kon ki adínea mita tatua in nosiug domandon takin bobay mita inta nogaid kon tayowon ngara in Ḷoḷaigan Koangoian i TUHAN.

²³Tuamai in noguman in sia kon i adínea mita, kainia, “Akuoi nokouḻídon kon guman in bayongan umat soaḷ dodia monimu inta moraat. Nongonu sin inaidanbí monimu intua?

²⁴Dikadon bui mogaid kon ná tatua adíku mita. Totuu kon totokbí in diá mopia in onu inta inouman in umat i TUHAN soaḷ aid monimu!

²⁵Aka intau mogaid kon taḷá kon tumpaḷa intau, yo motaaupabí tuḷungan i Allah; táe aka intau momia kon dosa kon i TUHAN, yo ki ine in motaau motuḷung kon inia?” Táe doíbí in mosia mokidongogmai kon tonggina i Eli, amá monia, sin sinantúdon i TUHAN kon ḻimodon in monia.

²⁶Tongá ki Samuel, adí tatua, in koḷantud-koḷantudon bo kinoibogdon totok i TUHAN bo in bayongan intau.

²⁷Kon singgai tobatú namangoidon in nabi tobatú kon i Eli bo nopotaau in koyow nongkon i TUHAN kon inia, kai-Nia, “Kon tungkuḷ in mogoguyangmu ki Harun bo motoḷuadínea nobaḻí ata i datu in Mesir, nokipogontongdon in Akuoi kon i Harun.

²⁸Nongkon bayongan suku in Israel ain piniḻí-Ku in motoḷuadínea nobaḻí imang-Ku, sin mopobayá in oaidan kon mezbah, motubá kon dupa, bo mogiḷambung in ḷambung epod[7] aka moyosingog takin-Ku. Bo kon i monia takin buí monia aindon inogoian-Ku in hak mogamá kon tongosilai nongkon kuruban sosumba inta sinubá kon mezbah.

²⁹Dá, nongonu sin iko in tumurápabí in mokoontong [8] kon kuruban mita inta pinodudui kon parenta-Ku, pinosumba in bangusa-Ku kon i-Nakó? Nongonu Eli, sin ki adímubí mita in poḻiuonmu horomaton nongkon i-Nakó, bo pomayámudon mako in mosia mopoḷongó in awak monia takin tonsilai inta totok in mopia nongkon bayongan in sosumba in bangusa-Ku kon i-Nakó?

³⁰Akuoi, ki TUHAN Allah in Israel, koḻipod ain nodandi, kon motoḷuadímu bo bui inanakanmu in mogundoi kon i-Nakó mobaḻí imang mononoi. Táe tanaa in kinodoí-Kudon intua! Sin ki inta mohoromat kon i-Nakó in horomaton-Kubí táe inta mopoonagmai kon i-Nakó, in pokoonag-Kubí doman.

³¹Indongogaidon, moiangoibí in wakutunea Akuoi in moḻimod kon bayongan tayowmobiag kon motoḷuadí bo bui inanakanmu, modapot in diádon in tobatúmai in ḷoḷaki kon bonu in motoḷuadímu in mononoi.

³²Monakit in ginamu bo mointoi in mokoontong[9] kon bayongan barakat inta ogoi kon intau mita ibanea kon Israel, táe kon bonu in motoḷuadímu in modait matoi kon wakutu in mongobagupa.

³³Táe, tobatú nongkon buímu, pomayá-Kudon mako in sia mobiag bo mogundoi kon i-Nakó mobaḻí imang. Tongá sia[10] in mobaḻí mobilog bo mobiag takin gina umuran diá in kamang. Bayongan in buímu ibanea in koḻimodan.

³⁴Mobaḻí tomponuot kon bayongan inta ain pinoguman-Ku tua in totuubí, dá ki adímu doyowa tatua, ki Hopni bo ki Pinehas in matoibí kon tongosinggai monag.

³⁵Onda intua Akuoi in momiḻídon kon imang inta mosatia kon i-Nakó bo mogaid kon onu inta pinoki aid-Ku kon inia. Kon inia tua in ogoian-Ku in buí inta umuran mopobayá in oaidan imang kon tayowon in datu mita inta piniḻí-Ku.

³⁶Pomuḷoi in bui inta nobiagpa, in mayábí kon i imang tatua sin moigum kon doit bo kaanon. Sia in mopoigum: Ogoiaipa in akuoi in wakutu motuḷung kon imang mita, sinbá akuoi mokouḻí kon kaanon umpaka tongá komintan kaanon.”