Read Mongondow SAMUEL 1 22 Bible Online

SAMUEL 1 22 - Mongondow bible

SAMUEL 1 22

¹Onda intua ki Daud nonaḷámaidon kon kotá in Gat bo nogadop kon angob kon diug in kotá in Adulam. Naonda in kinodongogan i guya-guyangnea mita bo in bayongan in ginaḷumnea kon ki Daud in kon tua, namangoidon in mosia kon inia.

²Ná doman tua in intau mita inta nobiag iroriga, inta koboḻi, bo intau mita inta monakit in gina, komintan dinumugang kon i Daud, bo ki Daud in nobaḻí itoi monia. Kobayong in dumodudui i Daud in degá opatmai nogatut in intau.

³Nongkon angob tatua ki Daud minayá in Mizpa kon Moab bo noguman kon i datu in butá in Moab, “Ogoipa in ki amá bo ki iná in bobantung naa in mogutun kon i Tuangku, modapot in kotaauan in bobantung naa onu in makusud i Allah kon bobantung naa.”

⁴Onda intua guyanganea in dinianea kon i datu in butá in Moab, bo mosia in umuranpabí nogutun kon tua kon dodai in ki Daud nogadop kon angob.

⁵Kon singgai tobatú nabi tobatú inta ki Gad in tangoinea namangoi kon i Daud bo noguman, “Dika mogutun mako kon angob tanaa, ḷagidon bayá kon butá in Yohuda.” Bo minayá domandon in ki Daud bo sinumuot kon kayuon in Keret.

⁶Kon singgai tobatú ki Saul ḻimitú mako kon siungonmai in kayu tamariska kon tudu in buḷud kon Gibea; sia in nokadai mako kon pandongnea bo bayongan in porwiranea sinimindog kon ḻibunea mita. Naonda in kinotaauannea kon tampat i Daud bo intaunea in kinotaauandon,

⁷noguman in sia kon porwiranea mita tatua, “Indongogaidon, ei intau mita in Benyamin! Eta degá ki Daud tua in mobogoi in gobá in tudunea bo gobá in anggur kon inimu? Eta degá moiko komintan in baḻíonnea doman porwira mita in tontaranea?

⁸Tua degá in nokopopisí kon i monimu in noyopakatdon kon moḷawang kon inakó bo diá tobatúmai in nopotaau kon inakó kon ki adíku in nomihakdon kon i Daud tua? Diábí in tobatúmai in kon sigad monimu in morai kon kobiaganku andeka mopotaau kon inakó kon ki Daud, intauku tua, in kon tanaa mako in mogoḷatdon mako kon kasampatan moḻimod kon inakó, bo ná doman tua in ki Yonatan ki adíku in ain noginrigon kon raiannea!”

⁹Ki Doëg tongguḷu in gombala in bobiagon i Saul, kon tua doman noyotakin in porwira mita i Saul, bo ki Doëg in noguman, “Bobantung naa ain nokoontong kon i Daud namangoi kon i Ahimelek adí i Ahitub kon Nob.

¹⁰Ki Ahimelek in nopoigum in totundú kon i TUHAN kon soaḷ onu in pomiaan i Daud. Koḻikud intua ki Daud sinongkaaḷandon in kaanon poḷat inogoian domandon in kedang i Goliat, intau in Pilistin tua.”

¹¹Bo ki datu in nokioiní kon i Imang Ahimelek bo bayongan in ginaḷumnea inta nobaḻí imang kon Nob; dá namangoidon in mosia kon tayowonnea.

¹²Guman i Saul kon i Ahimelek, “Indongogaidon, ei adí i Ahitub!” Tubagnea, “Oo, Tuang datu.”

¹³Ki Saul in noḻibó kon inia, “Nongonu sin iko in noyopakatbí i Daud moḷawang kon inakó? Nongonu sin sinongkaaḷanmubí in sia in roti bo inogoianmu in kedang bo pinoigumanmu doman in totundú nongkon i Allah in sia? Dá tanaa in sia noḷawangdon kon inakó bo mogoḷatdon mako kon kasampatannea sin moḻimod kon inakó.”

¹⁴Bo ki Ahimelek in notubag, “Táe kinotaauanku in ki Daud tua in porwirabí i Tuang datu inta totok in mosatia! Sia in nobuḷoi domandon kon i adí i Tuang tontaní, tongguḷu[65] pongawal tontaní i Tuang datu, bo totok in i horomat in bayongan intau kon bonu in komaḻig i Tuang datu.

¹⁵Totuubí, kon bobantung naa ain nopoigum in totundú nongkon i Allah kon kopontingannea, táe deemanbí naa in dungkuḷ totok[66] bobantung naa in nomia kon tua. Aka soaḷ yopakat moḷawang kon i Tuang datu, dikabí in ki Tuang datu moponapud in natua kon bobantung naa andeka kon tobatúmai in intau kon motoḷuadí in bobantung naa. Bobantung naa in totokbí in diá nonotaau in onu bo onu soaḷ pelekara tatua!”

¹⁶Táe ki datu in noguman, “Ahimelek! Iko bo bayongan in ginaḷummu in mustibí matoi.”

¹⁷Bo sia in nomarenta kon bayongan in moḷoḷukadnea inta sinimindog kon diugneamai, “Ḷagidon ḻimod in imang mita i TUHAN tatua! Mosia tua in noyopakatdon takin i Daud. Kinotaauandon monia kon ki Daud in noḷaguidon, táe mosia in doíbí nopotaau kon inakó.” Táe moḷoḷukadnea mita tatua in doíbí moḻimod kon imang mita i TUHAN tatua.

¹⁸Tuamai in ki Saul noguman kon i Doëg, “Koḻikat! Ikodon in moḻimod kon i monia!” Dá inumunadon in ki Doëg bo noḻimod kon imang mita tatua. Kon singgai tatua sia nomatoidon kon waḷu nopuḷú in imang inta motaau mogiḷambung in ḷambung epod.

¹⁹Ki Saul in nomarenta doman kon moḻimod kon bayongan intau in Nob, kotá in imang tatua; ḷoḷaki bo bobay, mongoadí mita bo adí mita mointok, sapi doman, keledai bo domba, komintan iḻimod.

²⁰Tongá ki Abyatar, intau tobatú nongkon i adí mita i Ahimelek in nokoḷagui. Sia in noḷagui minayá kon i Daud,

²¹bo nopotaau kon ki Saul ain noḻimod kon imang mita i TUHAN.

²²Dá ki Daud in nogumandon kon inia, “Naonda in inontongku in ki Doëg kon tua in singgai tua, kinotaauanku bidon kon sia in notantú bidon kon mopotaaubí intua kon i Saul. Dá akuoidon in kitogi totaau[67] kon kinopatoian in bayongan in utatku.

²³Pogutundon moyotakinku bo dika moondok. Ki Saul in moniat moḻimod kon inimu, bo akuoi doman in niatonnea mako ḻimodon. Dá, iko in moamanbí in kon tampatku naa.”