Read Mongondow SAMUEL 1 23 Bible Online

SAMUEL 1 23 - Mongondow bible

SAMUEL 1 23

¹Kon singgai tobatú pinotaaudon kon i Daud kon intau in Pilistin nonubu kon kotá in Kehila bo nogagow kon gandum inta bagu iratab.

²Bo noḻibódon in ki Daud kon i TUHAN, “Degá musti in akuoi mayá monubu kon intau in Pilistin?” “Oo,” tubag i TUHAN, “tubudon in mosia bo posaḷamatdon in intau mita in Kehila.”

³Táe intau i Daud in noguman kon inia, “Umpaka tongá kon naa, kon Yohuda, kami in totokdon in agían ondok, apa doman aka kita in musti mayá doman monubu kon tontara in Pilistin kon Kehila.”

⁴Manangka intua komintanpa doman in ki Daud minayá nopoigum in totundú nongkon i TUHAN, bo ki TUHAN in notubag, “Dika moḻia-ḻiaw in gina. Tubudon in kotá tatua ogoi-Kubí kon inimu.”

⁵Dá minayádon in ki Daud takin intaunea kon Kehila bo sinubunea poḷat iḻimodnea in nobayong intau in Pilistin, bo inagownea in bobiagon monia. Natuata in pinoḷoḷuat in Daud kon intau kon kotá tatua.

⁶Naonda in ki Abyatar ki adí i Ahimelek noḷagui minayá kon i Daud, bo dinumudui kon i Daud minayá in Kehila, sia in nodia doman kon epod.

⁷Naonda in pinotaau kon i Saul kon ki Daud in kon Kehila, ki Saul in norai nanaa, “Ki Daud in inogoidon i Allah kon inakó. Noituotdon in sia kon poyogaḷap sin sinumuotdon kon bonu in kotá inta dininding bo sinon ngara moḷoben.”

⁸Bo ki Saul in nopotabádon in bayongan tontaranea bo nobuat minayá in Kehila sin mongopung kon i Daud takin bayongan intaunea.

⁹Táe ain kinotaauan i Daud kon ki Saul in koniatdon moraat kon inia. Tuamai in noguman in sia kon i Imang Abyatar, “Diadon mangoi in epod tatua.”

¹⁰Bo nosambayangdon in ki Daud, “TUHAN, Allah in Israel, kinodongoganku kon Saul in moniat mamangoi in Kehila bo morimumud kon kotá tatua popisí in akuoi, mogogundoi-Mu.

¹¹Totuu degá in habar inta dinongogku tua? TUHAN, Allah in Israel, potaaupa kon inakó.” Ki TUHAN in notubag, “Oo, mamangoi in ki Saul.” Bo ki Daud in noḻibó bui, “Yo degá ogoidon in intau mita kon kotá in Kehila in akuoi takin intauku mita kon i Saul?” Dá ki TUHAN in notubag, “Oo.”

¹³Dá ki Daud takin intaunea mita inta degá 600 tua, ḷagidon nonaḷámai kon Kehila bo nomampi-mamping mako kon tampat. Naonda in kinotaauan i Saul kon ki Daud ain iḻumuai nongkon Kehila, diádon in sia minayá nonubu.

¹⁴Nopaḷut mako kon tua ki Daud in nogutun kon angob mita kon buḷud kon padang gurun Zip. Sia in umuran aḷo-aḷowan mako i Saul, táe diábí i TUHAN inogoi in sia kon i datu tatua.

¹⁵Umpakabí natua táe ki Daud in moondokbí doman, sin ki Saul in moniat moḻimod kon inia. Kon wakutu tobatú ki Daud in kon Hores, kon padang gurun Zip.

¹⁶Ki Yonatan in minayá nokipodungkuḷ kon inia kon tua sin mogin rigon kon pirisayanea kon sia in ḷukadanbí i Allah.

¹⁷Guman i Yonatan kon inia, “Dika moondok, iko in diábí kokawasaan i amáku. Kinotaauanneabí totok kon ikobí in mobaḻí datu in Israel bo akuoi in mokouḻíbí kon oaidan kon ḻimonaganmu.”

¹⁸Onda intua ki Daud bo ki Yonatan in nomia kon dodandian yoyobayatan kon tayowon i TUHAN. Nopaḷut mako kon tua ki Yonatan in nobui kon baḷoinea, bo ki Daud in umuranpabí nogutun kon Hores.

¹⁹Onda intua tongonumai in intau nongkon Zip in namangoi kon i Saul kon Gibea bo noguman, “Ki Daud in nogadop kon butá nami kon bonu in angob mita kon diug in Hores, kon tudu in Buḷud in Hakhila kon dotá in toḷatan kon padang gurun Yohuda.

²⁰Kinotaauanbí nami, kon ki Tuang datu in moibogdon totok modomok kon inia; tuamai, in angoidon kon butá nami. Kami in mokobaḻíbí monantú kon kodomokanbí i Tuang in sia.”

²¹Ki Saul in notubag, “Poigumon mako iko barakatan i TUHAN sin ain nomia kon mopia kon inakó!

²²Bayádon bo bui indoiai kopia; taridiai kopiraan mongo kon onda in ki Daud bo ki ine inta ain nokoontong kon inia kon tua. Dinongogku kon sia tua in mokaḻet totok.

²³Dá taridiaidon kopira in angob mita inta ain nobaḻí tampat pinogadopannea, bo buidon angoi in naa bo potaau kon inakó. Bain akuoi in mayá moyotakin monimu, bo aka sia oyúonpa kon butá tatua, yo notantúbí kon bayáanku tayakon, umpakabí modapot in poguraatonku in bayongan in Yohuda!”

²⁴Dá nobuatdon bui in intau mita tatua kon Zip inumuna kon i Saul. Kon dodai intua ki Daud bo intaunea mita in kon padang gurun Maon, kon ḷopá inta noingongow kon butá kon dotá in toḷatan kon padang gurun Yohuda.

²⁵Ki Saul takin tontaranea in namangoi sin motayak kon i Daud, táe oyúon in intau in nopotaau kon i Daud in soaḷ tatua, dá minayá in sia ná buḷud batu kon padang gurun Maon bo nogutun kon tua. Naonda in kinotaauan i Saul intua, ḷagineadon binatuk in ki Daud.

²⁶Ki Saul bo tontaranea in minayá nongin bingkí in buḷud toḷosi bokaka tai Daud takin intaunea mita in kon bingkí kon dotá intua. Ki Daud iḻimikat in noḷagui kon i Saul inta nomangkoidon nongopung sin modomok kon i monia.

²⁷Táe daḻídon noiangoi in totabá tobatú kon i Saul bo noguman, “Ki Tuang datu in musti ḷagi mobui! Intau mita in Pilistin ain nonubu kon butá naton!”

²⁸Dá nogogaidon in ki Saul in nogaḷow kon i Daud, bo minayá noparang takin intau in Pilistin. Tuamai in tampat tatua sinangoian Buḷud Pinoguatan.