Read Mongondow SAMUEL 1 24 Bible Online

SAMUEL 1 24 - Mongondow bible

SAMUEL 1 24

¹Nongkon tua in ki Daud minayá in butá En-Gedi, bo nogadop kon angob mita.

²Naonda in ki Saul bagu nobui nongkon pinoparangan nonayow kon intau in Pilistin, nokouḻí in sia kon habar kon ki Daud in kon padang gurun kon diug in En-Gedi.

³Dá ḷagidon in ki Saul nomiḻí kon 3.000 in tontaranea inta totok in mongopia nongkon bayongan in Israel, bo nobuat notayak kon i Daud bo intaunea mita kon dotá in pomukaan kon Buḷud Batu Bembé in Kayuon.

⁴Dá noyaputdon in ki Saul kon diug in tongonumai in ḷantung in domba kon bingkí in daḷan. Kon tua oyúon doman in angob tobatú, bo sinumuot in ki Saul sin tumapang. Noitongkanádon totok kon ki Daud bo intaunea mita in nogadop kon tua doman, noḻin akopa topí.

⁵Bo intau i Daud in nogumandon kon inia, “Naadon in kasampatan i Amá! Sin ki TUHAN aindon noguman kon i Amá nanaa, ‘Musungmu in posarakan-Kubí kon inimu, poaidon kon inia kinooibogmubí!’ ” Onda intua ki Daud inumadop bo minayá in tampat i Saul bo poḷat nomongkó kon topiḻikmai in bingkí in jubah i Saul.

⁶Táe nopaḷut mako, ki Daud nokorasa noitaḷádon sin ain nomia kon tua.

⁷Noguman in sia kon intaunea, “Poigumon mako ki TUHAN in moḷukad sinbá diá in akuoi modapot in momia kon moraat kon i datuku inta ain piniḻí i TUHAN. Topiḻikmai diábí motaau in akuoi mopororiga kon inia, sin sia in datu inta piniḻí i TUHAN!”

⁸Natuata in pinononggina i Daud kon intaunea mita, bo diá inogoinea in mosia nonubu kon i Saul. Ki Saul in nonaḷámaidon kon angob tatua, bo nongingguputdon kon bobayáannea.

⁹Iḻumuai domandon in ki Daud nongkon angob tatua bo nomaḷú kon tumimai i Saul, “Tuang Datu!”

¹⁰Nobobui in ki Saul ná tumi bo sinumungkud in ki Daud takin horomat bodongka noguman, “Nongonu sin ki Tuang Datu in mokidongogbí kon singog in intau inta noguman kon akuoi in moibog mopobodito kon i Tuang Datu?

¹¹Tanaa in kinorasaandon tontaní i Tuang Datu kon koina kon bonu in angob, pinosarakandon i TUHAN in ki Tuang kon inakó. Akuoi naa in dinondouḷugandon in intau tobatú kon moḻimod kon i Tuang Datu, táe doí in akuoi. Akuoi in notubag kon akuoi in doíbí mopororigamai kon datu inta ain piniḻí i TUHAN.

¹²Indoiaika, Amáku! Indoiaika in pongkóan in jubah i Tuang Datu inta kokada-kadaiku naa! Sabanarnea in koḻimodankubí in ki Tuang, táe akuoi in tongábí nomongkó kon topiḻik in bingkí in jubah i Tuang Datu. Dá, noniatadon kon akuoi in diábí komakusud moraat andeka inta diá mopia. Ki Tuang in mogaḷo-gaḷow mako kon inakó sin moḻimod, umpakabí akuoi naa diá kotaḷá topiḻikmai kon i Tuang Datu.

¹³Poigumon mako ki TUHANdon in monantú mongo ki ine in kotaḷá in kitada! Igumon mako ki TUHANdon in motuḻí kon aid i Tuang kon inakó, tongá topiḻikmai akuoi in doíbí mopororiga kon i Tuang Datu.

¹⁴Kinotaauanbí i Tuang Datu in tangkí dungkuḷmai tanaa, ‘Aid moraat in tongábí aidan in intau moraat.’ Tuamai in akuoi in doíbí mopororiga kon i Tuang Datu.

¹⁵Taridiaidon in akuoi naa inta ḻimodon i datu in Israel! Indoiaidon in akuoi naa inta aḷo-aḷowannea mako! Akuoi inta tongábí ná ungkú tobatú inta minatoi, tongábí ná kutu tobatú.

¹⁶Ki TUHAN in mobaḻí hakim kon sigad natonda. Igumon mako taridion-Neadon in pelekara tanaa, bo mopotutui kon inakó bo moposaḷamat kon inakó nongkon i Tuang Datu.”

¹⁷Naonda in nopaḷut mako in ki Daud nosingog kon tosingogon mita tatua, ki Saul nogumandon, “Ikobí degá in nion, ei Daud, adíku?” Bo nongombaḷdon in sia.

¹⁸Bo noguman in sia kon i Daud, “Iko in noitutui, bo akuoi in noitaḷá.

¹⁹Aidku kon inimu inta moraat ain sinuḻíanmu in aid mopia. Kon singgai naa in pinoniatamudon kon mopiabí in makusudmu kon inakó, sin diábí iḻimodmu in akuoi, umpaka pinosarakandon i TUHAN in akuoi kon inimu.

²⁰Moḷawábí totok in intau tobatú in moyodungkuḷ in musungnea táe tongá pobiónea mako in musungnea tatua in mobiag! Dá, igumon mako ki TUHAN in momarakat kon inimu sin aidmu inta mopia kon inakó singgai in naa!

²¹Naa in moyakin bidon in akuoi kon iko in mobaḻíbí datu kon Israel bo dodatuan in Israel in umuranbí motorindog kon bonu in pomarentaanmu.

²²Tanaa in podandidon kon inakó podoyon kon i TUHAN, kon diábí ḻimodonmu in bui ku, bo diábí doman momopat kon tangoi in motoḷuadíku!”

²³Bo nongibotdon in ki Daud kon aidanneabí in onu inta ain pinodandinea tatua. Onda intua nobuidon in ki Saul kon baḷoinea, bo ki Daud takin intaunea mita in nobui domandon kon tampat pogogadopanneamai.