Read Mongondow SAMUEL 1 25 Bible Online

SAMUEL 1 25 - Mongondow bible

SAMUEL 1 25

¹Diá noonggot kon tua minatoi in ki Samuel. Bayongan intau in Israel noyosipun sin tumakin kon upacara pinonogumatoian. Onda intua iḷobongdon in sia kon baḷoinea kon Rama. Nopaḷut mako kon tua ki Daud minayá in padang gurun Paran.

²Kon kotá in Maon oyúon in ḷoḷaki tobatú nongkon inanakan i Kaleb, tangoinea in ki Nabal. Sia tua in kobutá ponombobiagon kon diug in kotá in Karmel. Sia tua in nobiag nooyúon totok bo kodomba 3.000 bo bembé 1.000. Ki Abigail ki buḷoinea, mopandoi bo moḷunat, táe ki Nabal in mokaḷakuang bo moromú in dodianea. Kon singgai tobatú ki Nabal koyogot in monggonsingmai kon bubuḷ in dombanea kon Karmel.

⁴Naonda in ki Daud inta kon padang gurun, nokodongogmai kon tua,

⁵nopotabá in sia in tayowmobiag mopuḷú minayá in Karmel,

⁶mokipodungkuḷ kon in Nabal sin mopoyaput in horomat i Daud kon inia. Ki Daud in nopotabá kon i monia moguman nanaa kon i Nabal, “Salam kobobiag motompia kon inimu bo kon tombonu in baḷoimu bo kon bayongan in kapunyaanmu.

⁷Dinongogku kon iko in koyogot monggonsing kon bubuḷ in dombamu. Pokotaaudon kon gombalamu mita inta kon butá nami, in diábí kon dodai in onda in sinuyayow nami, bo diápabí doman kon dodai onda in mosia in kinobuḻian in onuka kon dodai in mosia kon Karmel.

⁸Tungkuḷaidon ḻibó kon i monia, notantúbí kon totuuon monia intua. Manangka intua, haraponku mako sinbá intauku mita in tarimaan mopia kon baḷoimu, sin kami in namangoi kon singgai moḷoben naa. Ogoiaipa kaasí in bobantungmu mita naa bo akuoi, ki Daud, inta yobayatmu mopia, tongáka onu in koibogmu ogoi.”

⁹Naonda in yaput monia kon Karmel, intau mita i Daud nopotaau in koyow tatua kon i Nabal pinodoyon kon tangoi i Daud, bo nogoḷat in mosia.

¹⁰Táe ki Nabal in notubag, “Ki Daud? Ki ine in sia? Ki inebí in ki adí i Isai tua? Diápabí kon dodai onda in kino dongoganku in soaḷ sia tua! Kon singgaimai tumi naa mobayong in bobantung inta moḷagui nongkon i Tuangnea in kon butá tanaa!

¹¹Umpaka yo mogamá in akuoi kon roti bo tubig inumonku, takin ponoyá inta ain sinadiaku kon intauku mita inta mongonggonsing, bodongka ogoi kon intau mita inta diá nosilangmai mongo nongkon onda mita!”

¹²Dá intau mita i Daud tatua minayádon bui kon i Daud bo nopotaau in tosingogon mita i Nabal tatua.

¹³“Pogigabitdon komintan!” parenta i Daud. Dá ḷagidon dinuduian in intaunea mita in singog i Daud tatua. Ki Daud in nogigabit domandon bo nobuat takin degá opatmai nogatut in intau, bo intau doyowa nogatut in sinaḷáan sin moḷukad kon pakakat mita.

¹⁴Bo kon dodai intua kon i Abigail ki buḷoi i Nabal, ain pinopotaauan in bobantung i Nabal tobatú, nanaa, “Degá dinongogdon i Iná? Ki Daud ain nopotabá in tongonumai in totabá nongkon padang gurun sin mokidia in horomat kon i tuang naton, táe tongábí sinibáannea in mosia tua.

¹⁵Bokaka mosia tua in totokbí in mongopia kon inami. Diábí kon dodai in onda in kami in sinuyayow, bo diápabí doman kon dodai onda in kami kinobuḻian in onuka kon dodai in kami noyobayat monia kon padang gurun.

¹⁶Doḷom singgai mosia in noḷukad kon inami kon dodai in kami moḷukad kon bembé domba kon diug monia.

¹⁷Manangka intua, raidon kopia in soaḷ tanaa, bo tantúdon onu inta motaau pomiaan i Iná. Sin notantú bidon kon moiangoibí in tontuḻí kon i tuang naton bo kon bayongan in motoḷuadínea. Ki Tuang naton in totuu motontogat in gina modapot in sia diá motaau anutan mongonguman!”

¹⁸Bo ḷagidon in ki Abigail nogamá kon roti doyowa nogatut, bo anggur doyowa nobotutu kuḻit, domba inangag ḻima, gandum inangag mopuḷú bo pitu nokilo, bungai in anggur inta ain nobaḻí kukis mogatut, bo kukis ara doyowa nogatut. Bayongan intua dinatognea kon keledainea mita.

¹⁹Bo noguman in sia kon bobantungnea mita, “Moiko in mayá umuna kon inakó; akuoi in dumuduianmai kon inimu.” Táe sia in diábí noguman kon onu bo onu kon i buḷoinea ḷoḷaki.

²⁰Ki Abigail in sinumakoi kon keledainea, bo naonda in sia nodapot kon pomurowan tobatú kon bingkí in buḷud, noyodungkuḷdon in sia i Daud takin intaunea mita inta koyogot mosiḻig mopobayá kon inia.

²¹Kon dodai intua ki Daud norai, “Diábí in mangaḻenea in akuoi noḷukad kon kapunyaan in intau tatua kon padang gurun! Diábí topiḻikmai in nobuḻi nongkon kapunyaannea; bo tanaa in sinuḻíannea in aidku mopia tatua takin aidnea moraat!

²²Igumon mako ki Allah in moḻimod kon inakó[68] aka diá ḻimodonku komintan in bayongan ḷoḷaki kon tua kon dodai in mata in singgai momukádon!”

²³Naonda in inontong i Abigail in ki Daud, ḷagidon in sia noponag kon keledainea bo sinumungkud kon tayowon in sioḷ i Daud,

²⁴bo poḷat noguman kon inia, “Tuangku, indongogaipa kaasí in akuoi naa! Biódon mako bá akuoidon tontaní in mobaba kon taḷá tatua!

²⁵Dikadon raionmai i Tuangku in ki Nabal, intau inta diá in baragunanea tatua! Sia tua in intau inta nobodok[69] — notongkai ná tangoinea. Bobantung naa in diábí nokoontong kon totabá mita inta pinotabá i Tuangku tua.

²⁶Ki Allah ain nogimaḷow kon i Tuangku motuḻí bo moḻimod kon musung mita i Tuang. Bo tanaa Tuangku, podoyon kon i TUHAN inta nobiag, bobantung naa in mongibot, igumon mako nasib in bayongan musung i Tuangku bo bayongan in intau inta moibog momia kon mokobodito kon i Tuangku in mobaḻídon ná nasib in Nabal.

²⁷Tarimadon in tombuinag inta dinia in bobantung tanaa kon i Tuangku, bo kon intau mita i Tuangku.

²⁸Ampungdon kaasí in ḷaḷoi in bobantung naa. Ki TUHAN in notantú bidon kon mopobaḻí kon i Tuangku takin buí i Tuangku datu kon Israel, sin ki Tuang in noparang kon kopontingan i TUHAN; bo ki Tuangku in diábí mogaid kon inta moraat[70] kinoouput in kinobiagan.

²⁹Aka oyúon in intau monubu kon i Tuangku bo monungkuḷ moḻimod kon i Tuangku, dá ki Tuangku in notantú bidon kon ḷukadan i TUHAN Allah naonda bo kapunyaan inta iḷukadan i toginea. Táe musung i Tuangku in pogambatdon i TUHAN koyayúon, pogambat-Nea naonda bo koyayú in kogambatan in katipol.

³⁰Ki TUHAN in mopoaidbí in bayongan in kopiaan inta pinodandi-Nea kon i Tuangku, bo diádon moonggot in ki Tuangku baḻíon-Nea datu kon Israel.

³¹Kon dodaidon intua kotoropandon i Tuangku kon ki Tuangku in diábí noḻimod takin diá in kinodoyonannea andeka mobaḻídon hakim dá ki Tuang in dika bidon mokuyang in gina andeka momanasaḷ. Bo aka ki TUHAN in momarakatdon kon i Tuangku, dikadon mokoḻiong kon bobantung i Tuangku naa.”

³²Bo ki Daud in noguman kon inia, “Dinayo-dayowdon in ki TUHAN, Allah in Israel, inta nopotabá kon inimu nokipodungkuḷ kon inakó singgai in naa!

³³Dinayo-dayowdon in kabijaksanaanmu bo dinayo-dayowdon in iko tontaní sin ain nogimaḷow kon inakó moḻimod bo mobaḻídon hakim tontaní.

³⁴Ki TUHAN ain nogimaḷow kon inakó mogaid kon inta moraat kon inimu. Podoyon kon i TUHAN, Allah in Israel inta nobiag, aka kuma bo iko diá ḷagi nokipodungkuḷ kon inakó, yo notantú bidon kon bayongan in intau i Nabal nodait bidon minatoi kon dodai in mata in singgai diápa nomuká!”

³⁵Nopaḷut mako kon tua ki Daud notarima kon bayongan inta dinia i Abigail kon inia, bo noguman kon inia, “Pobuidon kon baḷoimu bo dikadon moḻia-ḻiaw in gina. Onu inta pinoigummu in duduiankubí.”

³⁶Naonda in ki Abigail nobui kon i Nabal, noniata magí yo oyúonbí in rame moḷoben kon baḷoinea, naonda bo rame in datu. Bo popisí in ki Nabal noḷoḷangu bo noḷunganga totok in ginanea, dá diábí pinotaau i buḷoinea kon inia nodapot in nobangon monik.

³⁷Naonda in doḷo-doḷom, kon dodai in ki Nabal diádon noḷoḷangu, ki buḷoinea bobay nopotaau kon inia in bayongan inta moraat tatua. Bo daḻídon in ki Nabal pinonakitan in putú bo bayongan in awaknea notorondódon komintan.

³⁸Bo degá mopuḷúmai nosinggai nongkon tua ki Nabal bui pinopoangoian i TUHAN in nakit in putú dá minatoidon in sia.

³⁹Naonda in kinodongogan i Daud kon ki Nabal in minatoidon, noguman in sia, “Dinayo-dayowdon in ki TUHAN! Sia ain notuḻí kon singkuḻe i Nabal kon inakó, bo ain nogimaḷow kon bobantung-Nea naa mogaid kon inta moraat. Ki TUHAN ain nohukum kon i Nabal popisí in aidnea inta moraat.” Onda intua ki Daud nopotabá in intaunea minayá kon i Abigail sin mogamá kon inia mobaḻí ki buḷoinea.

⁴⁰Dá noyaputdon in totabá i Daud kon bobay tatua kon Karmel bo noguman kon inia, “Kami naa in pinotabá i Daud mamangoi mogamá kon inimu, sin baḻíonneadon ki buḷoinea in iko.”

⁴¹Sinimindog in ki Abigail bo sinumungkud poḷat noguman, “Akuoi naa in bobantung i Daud, diábí mobogat in ginaku in momatá kon sioḷ mita in bobantungnea mita.”

⁴²Onda intua ḷagidon in sia nonouḷut. Sinumakoi in sia kon keledainea bo dinuduian in bobantungnea bobay in taya ḻima, nobuatdon in sia dinumudui kon totabá mita i Daud, dá sia in nobaḻídon ki buḷoi i Daud.

⁴³Noiuna kon tua ki Daud aindon doman notonibuḷoi i Ahinoam nongkon Yizreel, bo tanaa ki Abigail in nobaḻí domandon ki buḷoinea.

⁴⁴Kon dodai intua ki Saul nopobuḷoidon kon i adínea bobay ki Mikhal, inta ki buḷoi i Daud, takin i Palti ki adí i Lais nongkon kotá in Galim.