Read Mongondow SAMUEL 1 26 Bible Online

SAMUEL 1 26 - Mongondow bible

SAMUEL 1 26

¹Kon singgai tobatú intau mita in Zip namangoi kon i Saul kon Gibea bo nopotaau kon inia kon ki Daud in nogadop kon Buḷud in Hakhila kon bingkí in padang gurun Yohuda.

²Dá ḷagidon in ki Saul nobuat takin tontara toḷu noribu inta mongopia totok kon Israel, minayá in padang gurun Zip sin motayak kon i Daud.

³Ki Saul nononḷoḷaigan kon bingkí in daḷan kon Buḷud in Hakhila tatua. Ki Daud inta kon padang gurun, nokodongog kon ki Saul in nomatuk kon inia nodapot in padang gurun.

⁴Bo nopotabá in sia in toimata, dá kinotaauanneadon totok kon ki Saul in totuubí kon oyúon in tua.

⁵Dá ḷagidon in ki Daud minayá in ḷoḷaigan i Saul bo kon tua kinobayáanneamai kon ḷoḷaigan ki Saul nosiug kon diug i Abner adí i Ner. Ḷoḷaigan i Saul tua in kon yuak totok, bo tontaranea mita in nononḷoḷaigan kon ḻibunea mita.

⁶Onda intua ki Daud noḻibó kon i Ahimelek intau in Het tatua, bo kon i Abisai utat i Yoab (ki iná monia in ki Zeruya), “Ki ine in mokobaḻí tumuot takinku kon bonu in ḷoḷaigan i Saul?” Ki Abisai notubag, “Akuoi!”

⁷Dá doḷom tua in ki Daud bo ki Abisai inumadop bo sinumuot kon bonu in ḷoḷaigan tatua bo nokoontong kon ki Saul in nosiug kon yuak in ḷoḷaigan, pandongnea in pinopopatoknea kon butá kon diug in uḷunea. Ki Abner bo tontaranea mita in nosiug kon ḻibumai i Saul.

⁸Bo noguman in ki Abisai kon i Daud, “Ki Allah in noposarakan in musungmu kon inimu in doḷom naa. Ogoidon in akuoi mopopakú in pandongnea tontaní kon awaknea poḷambaion in butá, ḻimodonku in sia takin tongá komintan tumbukon, dikadon dapot in kodua!”

⁹Táe ki Daud in noguman, “Dikabí onuonmu in sia! Sinantú bidon i TUHAN kon hukumon-Neabí in intau inta mogaid kon moraat kon datu inta ain piniḻí-Nea.

¹⁰Podoyon kon i TUHAN inta nobiag, kinotaauankubí kon bain ki TUHAN tontaní in moḻimod kon i Saul, aka modapotdon in wakutunea matoi, andeka aka sia matoi kon poparangan.

¹¹Poigumon mako ki TUHAN mongampag kon inakó in moḻimod kon datu inta ain piniḻí-Nea! Gamádon mako in pandongnea bo tampat in tubignea, bo mayádon in kita!”

¹²Dá ki Daud nogamádon kon pandong bo tampat in tubig i Saul tatua inta kon uḷuan i Saul, bodongka minayá. Diábí tobatúmai in intau in nokoontong kon tua andeka nonotaau kon onu inta nobaḻí, andeka noibangon, sin pinopoḷoḷotdon i TUHAN in mosia komintan.

¹³Bo ki Daud iḷumopot kon bingkí in ḷopá inta ibanea nodapot kon tudu totok in buḷud, bo noyayúdon in sia kon pinononḷoḷaigan i Saul.

¹⁴Onda intua nomaḷúdon in ki Daud kon i Abner bo kon tontara i Saul, kainia, “Abner! Dinongogmu degá in singogku?” Dá ki Abner in nomaḷú domandon, “Ki ine degá in iko inta momaḷú nion?”

¹⁵Tubag i Daud, “Abner, diábí kinotaauanmu degá kon iko nion in intau inta totok in motoyang kon Israel? Nongonu sin diábí iḷukadanmu in ki tuangmu, ki Tuang Datu? Bagupabí oyúon in intau sinumuot kon ḷoḷaiganmu sin moḻimod kon i tuangmu.

¹⁶Iko nion in diá mokoaid kon oaidanmu, Abner! Podoyon kon i TUHAN inta nobiag moiko komintan in patusbí matoi, sin diá noḷukad kon i tuangmu, datu inta piniḻí i TUHAN. Tungkuḷaika indoiai! Kon onda degá in pandong i datu? Kon onda degá in tampat in tubig inta inukat kon uḷuannea?”

¹⁷Kinotaauan i Saul in singog i Daud bo noguman in sia, “Daud, iko degá in nion, Adíku?” Tubag i Daud, “Oo, Tuang datu.”

¹⁸Bo ki Daud in bui noguman, “Nongonu sin ki Tuang datu in umuranpabí doman mogaḷo-gaḷow mako kon bobantung naa? Onubí in taḷá in bobantung naa?

¹⁹Tuang datu, indongogaidon in sumba in bobantung naa. Aka kuma ki TUHAN in nopotabá kon i Tuang datu sinbá moḷawang kon bobantung naa, yo sosumba kuruban tobatú in mokoonowbí kon torú-Nea kon bobantung naa. Táe aka inta nopotabá tua kon i Tuang datu bo intaubí, yo igumon mako mosia tua in kutukondon i TUHAN! Popisí in aid monia tatua, bobantung naa ain pinoguntun nongkon butá kapunyaan i TUHAN bo pakisadon mustibí mayá in butá ibanea bo pokisumbaan in dewa mita inta diá kinotaauanku.

²⁰Dikadon pomayá mako in bobantung naa matoi kon butá in intau, moyayú kon i TUHAN. Onubí in mangaḻenea datu in Israel mamangoi sin moḻimod kon kutu tobatú ná akuoi naa? Onubí in mangaḻenea mondudur kon bobantung naonda bo mondudur kon ḻengat?”

²¹Bo ki Saul in notubag, “Akuoi ain nogaid kon noitaḷá. Pobuidon Daud, Adíku! Akuoi in diá bidon bui mogaid kon inta moraat kon inimu sin inogoimudon in akuoi nobiagpa in kogobíi. Dodiaku tua in nopompuḷongdon totok. Akuoi in totu-totuudon kon ain notoboḻingo!”

²²Táe ki Daud in notubag, “Naadon in pandong i Tuang datu, potabádon mangoi in tontara tobatú mamangoi mogamá.

²³Ki TUHAN in momarakat kon bayongan in intau inta mosatia bo motuḻid in gina. Sin umpakabí singgai naa ki TUHAN ain noposarakan kon i Tuangku kon bobantung naa, táe bobantung naa in doíbí momia kon inta moraat kon i Tuang datu, datu inta piniḻí i TUHAN.

²⁴Dá, nádon onda in ki Tuang datu aindon pinomayá mako in bobantung naa nobiag in singgai naa, dá igumon mako natua doman in bobantung naa ḷukadan i TUHAN bo pilatan nongkon bayongan in bodito!”

²⁵Bo ki Saul in nogumandon kon i Daud, “Ki TUHAN in momarakat kon inimu, adíku! Kodapotanmubí in bayongan oaidanmu!” Bo ki Daud in nongingguputdon kon bobayáannea, bo ki Saul in nobuidon kon baḷoinea.