Read Mongondow SAMUEL 1 27 Bible Online

SAMUEL 1 27 - Mongondow bible

SAMUEL 1 27

¹Ki Daud norai kon bonu in ginanea, “Naondaka doman yo kon singgai tobatú in ki Saul in moḻimodbí kon inakó. Dá diábí in daḷan ibanea kon inakó, koḻikudon in moḷagui mayá in butá in Pilistin. Aka natua dá diá bidon tayakon i Saul in akuoi kon Israel, bo akuoi in moaman domandon.”

²Bo ki Daud takin intaunea inta onom nogatut in ḷagidon minayá kon i Akhis adí i Maokh, datu in kotá in Gat.

³Dá nogutundon in sia kon tua noyotakin in intaunea kon Gat, kon batúannea takin motoḷuadí monia. Ki Daud in nodia kon i buḷoinea doyowa, inta ki Ahinoam bobay nongkon Yizreel, bo ki Abigail, ki baḷú i Nabal bobay in Karmel.

⁴Naonda in kinodongogan i Saul kon ki Daud ain noḷagui minayá in Gat, diádon in sia moḷongasi modomok kon inia.

⁵Bo nopoigumdon in ki Daud kon i Akhis, “Aka mopia in gina i Tuang datu kon bobantung naa, yo ogoiaipa in bobantung naa in kotá mointok tobatú kon inta moako sin pogutunan, dá bobantung i Tuang naa in diádon tongá umaḷum kon i Tuang kon kotá tanaa.”

⁶Bo inogoidon i Akhis kon i Daud in kotá in Ziklag, manangka intua Ziklag in nobaḻí kapunyaan in datu mita in Yohuda dapot in tanaa.

⁷Ki Daud in nogutun kon butá in Pilistin kon bonu in totaong bo opat nobuḷan.

⁸Kon bonu in wakutu tatua ki Daud takin intaunea mita mokakit in monubu kon intau in Gesur, intau in Girzi, bo intau in Amalek; bangusa mita tatua in noonggotdon in nogutun kon butá tatua. Sia in nonubu kon butá tatua nodapot in Sur, bo nomoḷat kon Mesir.

⁹Sia in noḻimod kon bayongan in ḷoḷaki bo bobay bo poḷat nogagow kon domba, sapi, keledai, unta nodapot in pakeang doman. Onda intua nobui in sia minayá kon tayowon i Akhis.

¹⁰Aka ki Akhis moḻibó kon inia, “Kon onda in bayáanmu ponubuan in tanaa?” Dá ki Daud in moguman kon inia kon sia in minayádon kon dotá in toḷatan in Yohuda andeka kon butá in intau in Yerahmeel andeka butá pinogutunan in intau in Keni.

¹¹Diá tobatúmai in intau kon butá mita inta sinubúnea tua in pinomayánea mako nobiag, sinbá diádon in intau nongkon butá mita tatua in mayá in Gat sin mopotaau kon bayongan inta inaidan i Daud takin intaunea mita. Natuata in aid i Daud kon dodai in sia nogutun kon butá in Pilistin.

¹²Táe ki Akhis in nopirisayabí kon i Daud bo norai kon bonu in ginanea, “Sia tua in totokbí in kinodoí in bangusanea tontaní, dá pakisadon in sia nobaḻí bobantungku kinoouputbí in kinobiagannea.”