Read Mongondow SAMUEL 1 28 Bible Online

SAMUEL 1 28 - Mongondow bible

SAMUEL 1 28

¹Diá noonggot kon tua intau in Pilistin noposadiadon in tontaranea sin monubu kon Israel, bo ki Akhis in noguman kon i Daud, “Tantú kinomangaḻeanmu bidon kon iko takin intaumu mita in mustibí moparang moyotakinku.”

²Tubag i Daud, “Notantú bidon, bain indoiandon tontaní i Tuang Datu onu in motaau aidan in bobantung naa kon i Tuang Datu nion.” Bo ki Akhis in noguman, “Mopia! Iko in baḻíonku moḷoḷukadku inta motantú.”

³Ki Samuel ain minatoi bo inombaḷan in sia in bayongan intau in Israel bo iḷobong kon Rama, kotánea tontaní. Bo ki Saul in nopoguntundon in bayongan mododoyangow bo doduataan inta nogutun kon Israel.

⁴Dá naonda in tontara in Pilistin noyosipun bo nononḷoḷaigan kon diug in kotá in Sunem, ki Saul nosipundon kon intau in Israel, bo nononḷoḷaigan in mosia kon Buḷud in Gilboa.

⁵Naonda in ki Saul nokoontong kon tontara in Pilistin tatua, inagían totok in ondok in sia.

⁶Bo nopoigum in sia in totundú kon i TUHAN, táe ki TUHAN in diábí notubag kon inia, pinomayá pinongin togoindop, andeka pinongin Urim bo Tumim andeka pinongin nabi mita.

⁷Tuamai ki Saul in noguman kon tontaranea mita inta moḷukadmai kon inia, “Potayakaipa kon bobay tobatú inta doduataan, mayá in akuoi kon inia sin mopoigum in totundú.” Mosia in notubag, “Kon En-Dor oyúon in intau ná tatua.”

⁸Bo ki Saul nogiḷambungdon in ḷambung ibanea sinbá diá kotaauan in intau kon sia intua. Kotaki-takin in intau ḷoḷaki doyowa, nobuatdon in sia bo noyaputdon kon baḷoi in dodatuan tatua in doḷom tua in sia. Bo noguman in ki Saul kon inia, “Oinídon in dimukud in intau inta tangoionku in tangoinea, bo poigumdon sinbá potaaunea onu in mobaḻí.”

⁹Bobay tatua in notubag, “Tantú kinotaauan bidon i Tuang kon ki Datu Saul in nopoguntundon nongkon Israel in bayongan mododoyangow bo mogogoiní kon dimukud.[71] Nongonu sin ki Tuang in monungkuḷbí mopobodito kon inakó modapot ḻimodon in akuoi?”

¹⁰Bo ki Saul in nongibot, kainia, “Podoyon kon i TUHAN inta nobiag, modandi in akuoi kon iko in diábí hukumon popisí in mogaid kon soaḷ tanaa.”

¹¹Bobay tatua in noḻibó, “Dimukud i ine in koibog i Tuang oiníonku?” Tubag i Saul, “Dimukud i Samuel.”

¹²Naonda in bobay tatua nokoontong kon i Samuel, kinumarak in sia bo noguman kon i Saul, “Nongonu sin ki Tuang in nonguboḷbí kon bobantung naa? Ki Tuangbí naa in ki Datu Saul!”

¹³Tubag i datu, “Dika moondok! Potaaudon mangoi mongo onu mako in inontongmu!” Bobay tatua in notubag, “Bobantung in nokoontong kon dimukud iḻumuai nongkon butá.”

¹⁴Ki Saul in noḻibó, “Naonda in batangannea?” Tubagnea, “Ḷoḷaki tobatú inta nogoguyangdon. Sia noitukat nogi jubah.” Bo kinotaauandon i Saul kon ki Samuel intua, bo sinumungkud in sia sin mohoromat kon inia.

¹⁵Onda intua noguman in ki Samuel kon i Saul, “Nongonu sin tuyayowonmubí in akuoi? Nongonu sin oiníonmubí bui in akuoi?” Tubag i Saul, “Mogagawangdon totokdon in akuoi sin tubuon in intau in Pilistin, bo ki Allah in nonaḷámaidon kon inakó. Diádon in akuoi sinubagan-Nea, pinomayá pinongin nabi mita, andeka pinongin togoindop. Tuamai in poigumonku kon i Amá, sinbá potaauondon i Amá onu in musti aidanku.”

¹⁶Bo ki Samuel in noguman, “Onubí in mangaḻe in pinogoiníanmu kon inakó naa bokaka ki TUHAN in nonaḷábímaidon kon inimu bo nobaḻí musungmu?

¹⁷Ki TUHAN ain nopoaid kon inimu ná inta ain pinoguman-Nea kon inakó. Ki TUHAN ain nogamá kon dodatuan in Israel nongkon inimu bo inogoi kon i Daud.

¹⁸Iko ain noḷawang kon parenta i TUHAN bo doí nomutú kon intau in Amalek takin bayongan in kapunyaan monia. Manangka intua pomiaan i TUHAN nanaa in iko.

¹⁹Iko bo intau mita in Israel in ogoi-Neadon kon intau in Pilistin. Ikoḷom iko bo adímu mita ḷoḷaki in moyosipundon takinku; modapot in bayongan tontara in Israel in ogoi doman i TUHAN kon intau in Pilistin.”

²⁰Kon dodai domandon tuata, ki Saul noobat noiboḻingkayang kon butá naonda bo sinampí in gotup, sin noitaḻikokog totok in sia in nokodongog kon tosingogon mita i Samuel tatua. Bo noḻemédon totok in sia, sin diádon in sia nokaan kon onu bo onu in tosinggai bo tonggobii.

²¹Doduataan tatua in dinimiug kon i Saul bo inontongnea kon totokdon in sia notoboḻingo: tuamai in bobay tatua noguman kon inia, “Tuangku, bobantung naa in nopotarudon in nyawa sin mogaid kon onu inta ain pinoigum i Tuang.

²²Dá, ki Tuang in mustibí doman dumudui kon onu in poigumon in bobantung naa; Pongaandon topiḻik kon kaanon inta bain oḷudon in bobantung naa sinbá ki Tuang in motaaudon mongingguput kon bobayáan i Tuang.”

²³Doí in ki Saul poḷat noguman kon doíbí in sia mongaan. Táe naonda in pogawainea mita nodondouḷug doman, dá dinuduianneadon. Sinimindog in sia nongkon butá bo iḻimitú kon dangkuḷon.

²⁴Bo ḷagidon in bobay tatua noratá kon ki adí in sapinea inta noḷongó bo nogamá kon topong bo poḷat nongapog, bodongka pinomianea roti inta diá iragian.

²⁵Nopaḷut mako kon tua inoḷudneadon in kaanon tatua kon i Saul bo kon pogawainea mita, bo nongaan in mosia. Onda intua minayádon in mosia doḷom doman tua.