Read Mongondow SAMUEL 1 31 Bible Online

SAMUEL 1 31 - Mongondow bible

SAMUEL 1 31

¹Kon dodai intua intau in Pilistin in noparang takin intau in Israel kon buḷud in Gilboa. Nobayong in intau in Israel in minatoi kon tua, bo ibanea mako takin doman in ki Saul bo ki adínea mita ḷoḷaki in noḷagui.

²Táe mosia in dinuduran in intau in Pilistin bo ki adí ḷoḷaki i Saul taya toḷu inta ki Yonatan, ki Abinadab, bo ki Malkisua, in minatoi iḻimod.

³Parang tatua in mobogat totok kon dotá i Saul, bo ki Saul tontaní in kinotugatan doman in piot mita in musung nodapot in sia in kinekeban nodaḷom.

⁴Bo nogumandon in ki Saul kon tayow mobiag inta nodia kon pakakat in parangnea, “Rabutdon in kedangmu bo tumbukdon in akuoi, sinbá akuoi diá pogogitog muna bodongka ḻimodon in intau mita inta diá nonotaau kon i TUHAN tatua.” Táe tayow mobiag tatua in doíbí monumbuk kon inia, sin totok in sia mohoromat kon i Saul. Manangka intua ki Saul in norabutdon kon kedangnea tontaní bo inumumpag kon mata in kedang tatua.

⁵Naonda in tayow mobiag tatua nokoontong kon ki Saul ain minatoi, inumumpag domandon in sia kon mata in kedangnea bo minatoi kon diug i Saul.

⁶Natuata in kinopopatoi i Saul takin i adínea ḷoḷaki toḷu, bo bayongan in intaunea bo tayowmobiag tatua in minatoi tosinggai monag tua.

⁷Naonda in intau mita in Israel inta nogutun kon ḻimakomai in Ḷopá in Yizreel bo kon dotá in pomukaan kon Ongkag in Yordan nokodongog kon tontara in Israel ain noḷagui, bo ki Saul takin i adínea mita ḷoḷaki ain minatoi, noḷaguidon in mosia nonaḷámai kon kotá mita monia. Bo kinawasadon in intau in Pilistin in kotá mita tatua.

⁸Nopoikoḷomai kon singgai naonda in intau in Pilistin mamangoi sin mogamá kon barang mita kon intau mita inta ain minatoi, nouḻímai monia yo ki Saul bo ki adínea toḷu in minatoidon kon buḷud in Gilboa.

⁹Pinongkó monia in uḷu i Saul bo ginamá monia in ḷambung in parangnea, bo intau in Pilistin nopotabá in intau minayá in bayongan butá in Pilistin bo nopotaau in habar mopia tatua kon rayat bo kon dewa monia.

¹⁰Onda intua ḷambung parang i Saul tatua in sinagú kon bonu in kuil i dewi Asytoret, bo awaknea in pinopopakú kon dinding in kotá in Bet-Sean.

¹¹Táe kinodongogandon in intau mita in Yabesh kon Gilead in onu inta ain pinomia in intau in Pilistin kon i Saul,

¹²bo intau mita inta totok in mongobarani nobuat nongkon tua bo minayá in Bet-Sean kinoouput in doḷom tua. Pinopoponag monia in mayat i Saul bo mayat i adínea mita ḷoḷaki nongkon dinding in kotá tatua bodongka dinia monia kon Yabesh, bo sinubá monia.

¹³Bayongan in tuḷannea sinipun bo iḷobong kon siungonmai in pangkoi in tamariska kon kotá tatua. Onda intua nopuasadon in mosia pitu nosinggai in koonggotnea.