Read Mongondow SAMUEL 1 4 Bible Online

SAMUEL 1 4 - Mongondow bible

SAMUEL 1 4

¹Kon dodai intua intau in Pilistin nopotabádon in bayongan in tontaranea sin moḻibut kon Israel; tuamai[12] tontara in Israel minayá in tampat pinoparangan; mosia nononḷoḷaigan kon diug in Eben-Haezer, bo tontara in Pilistin nononḷoḷaigan kon Apek.

²Tontara in Pilistin nomangkoidon nonubu, bo naonda in nomangkoidon noparang totok, tontara in Israel sinaḷow bo degá opatmai noribu in minatoi kon pinoparangan tatua.

³Naonda in kiagat in tontara inta sinaḷow tatua nobui kon pinononḷoḷaigan, itoi mita in Israel noguman, “Nongonu degá sin pinomayá bidon mako i TUHAN in kita sinaḷow in intau in Pilistin kon singgai in naa? Igai gamáan naton in Poti Dodandian i TUHAN nongkon Silo, bo diaan naton mangoi, sinbá ki TUHAN[13] motuḷung kon inaton bo moposaḷamat kon inaton nongkon musung.”

⁴Bo nopotabádon in mosia kon intau minayá in Silo sin mogamá kon Poti Dodandian i TUHAN inta nobaḻí tampat pomomarentaan i TUHAN Inta Totok in Mokawasa. Ki adí i Eli doyowa, ki Hopni bo ki Pinehas, dinumudui doman kon Poti Dodandian tatua.

⁵Naonda in Poti Dodandian tatua nodapot kon pinononḷoḷaigan, norogiowdon noropot in intau in Israel, nodapot in nodandú in butá.

⁶Intau in Pilistin nokodongog doman kon giow tatua bo mosia in noguman, “Nongonu sin intau mita in Ibrani tatua in norogiowbí?” Táe naonda in kinotaauan monia kon Poti Dodandian i TUHAN aindon dinia kon pinononḷoḷaigan in intau in Ibrani,

⁷inagían in ondok in mosia, bo poḷat noguman, “Oyúon in dewa in namangoi kon pinononḷoḷaigan monia! Mobodito in kita! Diápa kon dodai in onda in kita noiyitak kon ná tanaa!

⁸Moboditodon totuu! Ki ine in mokoposaḷamat kon inaton nongkon dewa mita inta moropot tatua? Degá dewabí mita tatua inta noḻimod kon intau mita in Mesir kon padang gurun koḻipod?

⁹Korigon in ginamu, ei intau mita in Pilistin! Poparangdon ná ḷoḷaki, aka diá yo moiko in mobaḻídon ata in intau mita in Ibrani tatua, ná koḻipod mosia nobaḻí ki ata monimu. Tuamai in poparangdon takin kotorindog bo kobarani!”

¹⁰Onda intua noparangdon totok in intau in Pilistin bo poḷat nonaḷow kon intau in Israel. Intau in Israel noḷagui minayá in ḷoḷaigannea-ḷoḷaigannea. Totuu moḷoben in kinotaḷowan tatua: aindon 30.000 in tontara in Israel in minatoi.

¹¹Poti Dodandian i Allah inagow in musung in Israel, bo ki adí i Eli doyowa, ki Hopni bo ki Pinehas, minatoi.

¹²Intau tobatú nongkon suku Benyamin noḷagui nongkon tampat pinoparangan kon Silo, bo noidapot intua kon singgaipa doman tatua. Nobaḻí tomponuot kon nonogumatoi, binerakneadon in pakeangnea bo nopongipúdon in sia in butá kon uḷu.

¹³Ki Eli, inta totokdon in moḻia-ḻiaw in gina momikirmai kon kasaḷamatan in Poti Dodandian i TUHAN, ḻimitú mako kon kadera kon bingkí in daḷan, koyogot in momikirmai. Naonda in intau tatua nopotaaudon in habar kino taḷowan in Israel, bayongan in intau kon kotá tatua noguang totok.

¹⁴Kinodongogan i Eli in ombaḷ monia tatua, bo noḻibó in sia, “Onu in mokodowawá tatua?” Kon dodai intua intau koina noribatuk minayá kon i Eli; naonda in noyaput, pinotaauneadon in habar inta diá mopia tatua.

¹⁵Kon dodai intua ki Eli umurdon siow nopuḷú bo waḷu notaong bo matanea in diádon mosilang.

¹⁶Intau tatua noguman kon i Eli, “Akuoi noḷagui in singgai naa nongkon tampat pinoparangan bo bagupa nodapot.” Ki Eli noḻibó kon inia, “Naonda in habar, adíku?”

¹⁷Intau inta nodia kon habar tatua notubag, “Israel noḷagui kon intau in Pilistin. Kita in sinaḷow totok. Nobayong in intau in minatoi, ki adí doman i amá inta doyowa, ki Hopni bo ki Pinehas. Bo Poti Dodandian i Allah inagow in musung!”

¹⁸Naonda in intau tatua nopotaau in soaḷ Poti Dodandian tatua, ki Eli noḷabú noiboḻingkayang nongkon kaderanea kon ḻimako in ngara moḷoben. Nogoguyangdon totok in sia bo noḷongó dá naonda in noḷabú sigogownea noputoḷ, bo poḷat minatoi in sia. Sia in nobaḻí itoi kon Israel opat nopuḷú notaong in koonggotnea.

¹⁹Kon dodai intua ki buḷoi i Pinehas inta ki adí i Eli, sidiadon moḷoben, bo diádon moonggot in mononggadí. Naonda in dinongognea kon Poti Dodandian i Allah ain inagow, bo ki nunutonnea takin ki buḷoinea in minatoidon, daḻídon in sia nokorasa kon nakit sin mononggadí, bo diá noonggot kon tua nononggadídon in sia.

²⁰Naonda in sia gogiódon matoi, bobay mita inta notuḷung kon inia noguman, “Mokoposabarbí! Ḷoḷaki in ki adímu naa!” Tongá diábí in sia notubag ande nonarukiramai kon i monia.

²¹Adí tatua sinangoiannea ki Ikabod,[14] kainia, “Koangoian i Allah Inta Momulia nobuḻidon nongkon Israel.” — Inta imakusudnea tua in Poti Dodandian aindon inagow bo ki nunutonnea takin ki buḷoinea minatoi domandon. Tuamai sia noguman, “Koangoian i Allah Inta Momulia nobuḻidon nongkon Israel, sin Poti Dodandian i Allah inagowdon.”