Read Mongondow SAMUEL 1 6 Bible Online

SAMUEL 1 6 - Mongondow bible

SAMUEL 1 6

¹Naonda in Poti Dodandian i TUHAN tatua pitudon nobuḷan in koonggotnea kon Pilistin,

²intau in Pilistin nogoiní kon imang mita bo mososihir bo noḻibó, “Onuon naton in Poti Dodandian i TUHAN tatua? Aka pobuion naton kon tampatnea, yo naonda in mopobui?”

³Bo mosia in notubag, “Poti Dodandian i Allah in Israel tatua in dikabí tongá pobuion mako monimu natua, táe mustibí takinan in tombuinag sin potobut kon dosamu. Aka aidan monimu in natua dá undamandon in moiko, bo kotaauandon monimu nongonu sin ki Allah in Israel tatua in tantúbí mohukum kon i monimu.”

⁴“Tontobut onu in musti ogoi naton kon i-Nia?” intau mita tatua noḻibó. Tubag in imang mita tatua, “Ḻima in bobentuḷ buḷawan bo ḻima in boyod buḷawan, podudui in kobayong in datu mita in Pilistin. Kinotaauan bidon monimu kon bodito ná bobentuḷ mita bo boyod doman ain noiuma kon i monimu komintan, pinomayá rayat andeka datu?

⁵Dá moiko in musti momia popodayan kon bobentuḷ mita bo boyod inta koyogot in momogutú kon butá monimu. Aka natua dá moiko in mohoromat kon i Allah in Israel. Dika-dika bo mogogaidon in Sia mohukum kon i monimu, bo dewa mita takin butámu.

⁶Onubí in mangaḻenea in moiko mokopotontogat kon gina ná datu bo intau in Mesir koḻipod? Dika koḻiongan naonda in ki Allah nopoyambá kon i monia, nodapot in mosia notobat bo pinomayádon mako monia in intau Israel nonaḷámai kon Mesir.

⁷Tuamai, sadiadon in roda tobatú inta nobagu takin sapi doyowa inta koyogotpa in ponetéan, bo inta diápa kon dodai in onda in pinaké pinogugutan kon roda. Pasdon in sapi doyowa tatua kon roda, bo diádon in ki adí mita in sapi tatua kon ḷantung.

⁸Onda intua, gamádon in Poti Dodandian i TUHAN, podatogdon kon roda, bo ukatdon kon diugneamai in kas inta pinobonuan kon buḷawan mita inta musti posumba monimu kon i-Nia nobaḻí tontobut kon dosamu. Pobiódon mako in sapi bo roda tatua mayá tontaní.

⁹Tarukiradon in bobayánea; aka Poti Dodandian tatua diaan pobayá ná butánea tontaní, inta kon kotá in Bet-Semes, tua in mangaḻenea kon ki Allahdon in intau Israel inta ain nopouma in bodito inta motoyang tatua kon i naton. Táe aka roda tatua diá nopobayá ná tua, dá kotaauandon naton kon bodito tatua in deemanbí nongkon i Allah in Israel, táe tongábí noikoḷatmai natua.”

¹⁰Dinuduian in intau mita tatua; nogamá in mosia kon sapi doyowa inta koyogotpa in pinonetéan, bo pinas monia kon roda, táe ki adí mita in sapi tatua binonudon monia kon ḷantung.

¹¹Bo Poti Dodandian tatua pinodatogdon monia kon roda, takin doman kas inta pinobonuan kon boyod buḷawan bo bobentuḷ mita buḷawan inta pinodayan kon bobentuḷ mita tatua.

¹²Sapi mita tatua baḷú minayá ná Bet-Semes; Bobiagon mita tatua mayá sindaḷan moganggor, tongá diábí momarut kon daḷan moḷoben kon dotá in koḷoigi andeka koḷanan. Datu taya ḻima tatua tantú dinumudui nodapot kon sigad in Bet-Semes.

¹³Kon dodai intua intau mita kon Bet-Semes koyogot in nosipun kon bungai in boyó gandum kon ḷopá. Naonda in inontong monia in Poti Dodandian tatua, takin pia in gina sinontomu monia intua.

¹⁴Roda tatua nogogai kon diug in batu moḷoben kon gobá i Yosua, intau in Bet-Semes tobatú. Intau mita kon kotá tatua noniai kon kayu in roda tatua bodongka noratá kon sapi doyowa tatua sin baḻíon kuruban payongon kon i TUHAN.

¹⁵Onda intua intau mita in Lewi nopoponag in Poti Dodandian i TUHAN bo kas inta pinobonuan kon buḷawan mita tatua, bodongka inukat monia kon tudu in batu moḷoben tatua. Nopaḷut mako kon tua intau mita kon Bet-Semes noposumba in kuruban payongon bo kuruban mita ibanea kon i TUHAN.

¹⁶Naonda in datu in Pilistin taya ḻima tatua nokoontong kon bayongan tua nobuidon in mosia kon Ekron kon singgai doman tuata.

¹⁷Pinongin natua intau in Pilistin nobogoidon kon i TUHAN in sosumba potobut kon dosa in intau mita inta nogutun kon kotá ḻima inta pinarentaan in datu in Pilistin taya ḻima. Naa in tangoi in kotá mita tatua: Asdod, Gaza, Askelon, Gat bo Ekron. Kon sigad in kotá mita tatua oyúon in dininding oyúon doman in diá. Batúan in kotá tatua nokidia tumongo batu doman in bobentuḷ buḷawan bo boyod buḷawan tobatú. Tomponuot kon onu inta nobaḻí tatua in batu moḷoben tampat pinogukatan monia kon Poti Dodandian i TUHAN. Dapotpabí in tanaa batu tatua oyúonpa kon gobá i Yosua, intau in Bet-Semes tatua.

¹⁹Táe popisí in intau mita in Bet-Semes tatua iḷumongow kon bonu in Poti Dodandian i TUHAN, dá pitu nopuḷú in intau kon sigad monia tua in iḻimod i TUHAN. Bo rayat nonogumatoi sin ki TUHAN nopouma in bodito inta námai tua in koḷoben.

²⁰Bo intau mita in Bet-Semes noguman, “Ki inebí in mokotahang kon tayowon i TUHAN, Allah Inta Motusi tua? Kon onda in pogatodan naton kon poti tatua sinbá moiyayú kon i naton?”

²¹Bo nopotabá in mosia in intau minayá kon intau mita in Kiryat-Yearim takin koyow nanaa, “Intau mita in Pilistin nopobuidon in Poti Dodandian i TUHAN. Angoi bo diádon in poti tatua kon ḻipúmu.”